Ngāue ʻa e Kau ʻApositolo 25:1-27
25 Ko ia ai, ʻi he hili ʻa e aʻu ʻa Fesito+ ki he vahefonuá ʻo ne puleʻi iá, naʻá ne ʻalu hake ʻi he hili ʻa e ʻaho ʻe tolu mei Sesalia ki Selusalema.
2 Pea ko e houʻeiki taulaʻeikí mo e kau tangata tuʻu-ki-muʻa ʻo e kau Siú naʻa nau ʻoange kiate ia ha fakamatala ʻo tukuakiʻi ʻaki ʻa Paula.+ Ko ia naʻe kamata ke nau kōlenga kia Fesito
3 ke fai muʻa ki honau lotó ʻo fekau atu kia Paula ke ne haʻu ki Selusalema. Ka naʻa nau palani ke lapasi ʻa Paula ʻo tāmateʻi ia ʻi he halá.+
4 Kae kehe, naʻe tali ange ʻe Fesito ʻe tauhi pē ʻa Paula ʻi Sesalia pea ko ia tonu ʻe taimi nounou pē peá ne foki ki ai.
5 “Ko ia tuku ki he faʻahinga ʻoku maʻu mafai ʻi homou haʻohaʻongá,” ko ʻene leá ia, “ke nau ʻalu hifo mo au ʻo talatalaakiʻi ia kapau moʻoni kuo fai ʻe he tangatá ha meʻa naʻe hala.”+
6 Ko ia ʻi he hili ʻene nofo atu ʻi honau haʻohaʻongá ʻi ha ʻaho nai ʻe valu pe hongofulu, naʻá ne ʻalu hifo ki Sesalia, pea ʻi he ʻaho hono hokó naʻá ne nofo hifo ʻi he nofoʻanga fakamāú peá ne fekauʻi atu ke ʻomai ʻa Paula.
7 ʻI heʻene aʻu maí, naʻe tuʻu takatakai ʻiate ia ʻa e kau Siu ko ia naʻe omi mei Selusalemá, ʻo nau fai kiate ia ha ngaahi tukuakiʻi mafatukituki lahi ʻa ia naʻe ʻikai malava ke nau fakamoʻoniʻi.+
8 Ka naʻe pehē ʻe Paula ʻi heʻene taukapó: “Kuo teʻeki ai te u fai ha faʻahinga angahala ki he Lao ʻa e kau Siú pe ki he temipalé pe kia Sisa.”+
9 ʻI he loto ʻa Fesito ke ne maʻu ʻa e leleiʻia ʻa e kau Siú,+ naʻá ne pehē ʻi heʻene tali kia Paulá: “ʻOkú ke loto ke ke ʻalu hake ki Selusalema pea fakamāuʻi koe ʻi ai ʻi hoku ʻaó ʻi he ngaahi meʻá ni?”
10 Ka naʻe pehē ʻe Paula: “ʻOku ou tuʻú ni ʻi he ʻao ʻo e nofoʻanga fakamaau ʻo Sisá, ʻa ia ʻoku totonu ke fakamāuʻi ai aú. Kuo ʻikai te u fai ha meʻa ʻoku hala ki he kau Siú, hangē foki ko ia ʻokú ke ʻilo lelei ki aí.
11 Kapau ko aú ko ha tokotaha faihala moʻoni pea kuó u fai ha meʻa ʻoku tuha mo e maté,+ heʻikai te u kole au ke u hao mei he maté; ka ʻo kapau ʻoku ʻikai ʻi ai ha moʻoni ʻi he ngaahi tukuakiʻi kuo fai ʻe he kau tangatá ni kiate aú, ʻoku ʻikai ha tangata te ne maʻu ʻa e totonu ke ne ʻave au kiate kinautolu ko ha fakahōhōʻiaʻi honau lotó. ʻOku ou tangi au kia Sisa!”+
12 Ko Fesito leva, ʻi he hili ʻene talanoa mo hono kau faleʻí, naʻá ne tali atu: “Ko Sisa kuó ke tangi ki aí; ko Sisa te ke ʻalu ki aí.”
13 ʻI he ʻosi atu ha ngaahi ʻaho, naʻe aʻu mai ʻa ʻAkilipa ko e tuʻí mo Pelenaise ki Sesalia ʻi ha ʻaʻahi ke fakahaaʻi ʻena fakaʻapaʻapa kia Fesito.
14 Koeʻuhi naʻá na nofo atu ai ʻi ha ngaahi ʻaho, naʻe fakahoko atu ʻe Fesito ʻa e meʻa fekauʻaki mo Paulá ki he tuʻí, ʻo ne pehē:
“ʻOku ʻi ai ha tangata naʻe kei tuku pilīsone ʻe Filike,
15 pea ʻi heʻeku ʻi Selusalemá naʻe ʻomi ai ʻe he houʻeiki taulaʻeikí mo e kau mātuʻa ʻo e kau Siú ha fakamatala ʻo kau kiate ia,+ ʻo nau kole ke fai hano fakamāuʻi ʻo fakahalaiaʻi ia.
16 Ka naʻá ku tali ange kiate kinautolu ʻoku ʻikai ko ha founga ngāue faka-Loma ia, ke tuku atu ha tangata ko hano fakahōhōʻiaʻi ha taha ki muʻa ke fehangahangai mata ki he mata ʻa e tangata fakaʻiloá mo hono kau talatalaakí mo ne maʻu ha faingamālie ke ne lea ʻo taukapoʻi ia fekauʻaki mo e lāungá.+
17 Ko ia ʻi heʻenau aʻu mai ki hení, naʻe ʻikai te u toe fakatatali, ka ʻi he ʻaho hono hokó naʻá ku tangutu hifo ʻi he nofoʻanga fakamāú peá u fekau atu ke ʻomai ʻa e tangatá.
18 ʻI he tuʻu hake ʻa e kau talatalaakí, naʻe ʻikai te nau tukuakiʻi ia ʻaki ha taha ʻo e ngaahi meʻa fulikivanu naʻá ku ʻamanekina fekauʻaki mo iá.+
19 Ko ʻenau fekīhiaki pē mo ia fekauʻaki mo ʻenau lotu ki honau ʻotuá*+ pea fekauʻaki mo ha tangata ko hono hingoá ko Sīsū, ʻa ia naʻe pekia ka naʻe toutou fakamatematē mai ʻa Paula kuó ne moʻui.+
20 ʻI he ʻikai ʻilo pe ʻe anga-fēfē hano fakaleleiʻi ʻa e fakakikihí ni, naʻá ku ʻeke ai pe te ne loto ke ʻalu ki Selusalema ʻo fakamāuʻi ai ia fekauʻaki mo e ngaahi meʻá ni.+
21 Ka ʻi he tangi ʻa Paula ke tauhi pōpula pē ia ʻo fakatatali ki ha fili ʻe fai ʻe ʻAokosi ʻUluakí,*+ naʻá ku tuʻutuʻuni ai ke tauhi ia kae ʻoua ke u toki tuku atu ia kia Sisa.”
22 Naʻe pehē ange leva ʻe ʻAkilipa kia Fesito: “ʻOku ou fie fanongo ki he tangatá.”+ “Ko ʻapongipongi,” ko ʻene tala angé ia, “te ke fanongo ai kiate ia.”
23 Ko ia ʻi he ʻaho hono hokó, naʻe haʻu ʻa ʻAkilipa mo Pelenaise ʻi ha fuʻu fakalāngilangi lahi ʻo na hū ki he fale fakamāú fakataha mo e kau ʻeikitaú pea pehē foki ki he kau tangata tuʻu-ki-muʻa ʻi he koló; pea ʻi he tuʻutuʻuni ʻa Fesitó, naʻe ʻomi ai ʻa Paula.
24 Pea naʻe pehē ʻe Fesito: “ʻE Tuʻi ʻAkilipa mo kimoutolu kotoa ʻoku tau ʻi hení, ʻoku mou vakai mai ki he tangatá ni ʻa ia kuo fai mai ʻe he kotoa ʻo e fuʻu kakai Siú ha kole kiate au ʻi Selusalema pea ʻi heni foki, ʻo nau kalanga ʻo pehē ʻoku totonu ke ʻoua te ne kei moʻui.+
25 Ka ʻoku mahino kiate au naʻe ʻikai te ne fai ha meʻa ʻokú ne tuha ai mo e maté.+ Ko ia ʻi he taimi naʻe tangi ai ʻa e tangatá ni kia ʻAokosi ʻUluakí, naʻá ku tuʻutuʻuni ai ke ʻave atu ia.
26 Ka ʻoku ʻikai te u maʻu ha meʻa pau ke u faitohi atu ai ʻo fekauʻaki mo ia ki he ʻemipolá.* Ko ia ʻoku ou ʻomi ai ia ki he ʻao ʻo kimoutolú hono kotoa, pea tautefito kiate koe, ʻe Tuʻi ʻAkilipa, koeʻuhí ka hili hono fai ʻa e fakaʻeke fakaefakamāú, ʻe lava ke u maʻu ai ha meʻa ke u fai ai ha tohi kia ʻAokositusi.
27 He ʻoku hā fakavalevale kiate au ke u ʻave atu ha pōpula pea ʻikai foki ke u fakahaaʻi atu ʻa e ngaahi tukuakiʻi kuo fai kiate iá.”
Fakamatala ‘i Lalo
^ Pe “mo ʻenau lotú.”
^ Ko ha hingoa fakalakanga ki he ʻemipola Lomá.
^ Fakafoʻilea, “ki he ʻEikí.”
