Ngāue ʻa e Kau ʻApositolo 8:1-40
8 Ko Saula, ʻi heʻene tafaʻakí, naʻá ne loto-lelei ki hono fakapoongi iá.+
ʻI he ʻaho ko iá naʻe malanga hake ha fuʻu fakatanga ki he fakatahaʻanga naʻe ʻi Selusalemá; naʻe movete atu ʻa e faʻahinga kotoa ʻi he kotoa ʻo e ngaahi feituʻu ʻo Siutea mo Samēliá+ tuku kehe pē ʻa e kau ʻapositoló.
2 Ka naʻe fata atu ʻe ha kau tangata mamahiʻi-lotu ʻa Sitīveni ke tanu ia, pea naʻa nau mātuʻaki tengihia ia.
3 Neongo ia, naʻe kamata ke ʻohofi anga-fakamanu ʻe Saula ʻa e fakatahaʻangá. Naʻá ne hū ʻi he fale ki he fale, ʻo ne toho mai ki tuʻa ʻa e kakai tangata mo e kakai fefine fakatouʻosi peá ne ʻave kinautolu ki he pilīsoné.+
4 Kae kehe, ko e faʻahinga ko ia naʻe movete atú naʻa nau ʻalu atu ʻi he kotoa ʻo e fonuá mo fanongonongo ʻa e ongoongo lelei ʻo e folofolá.+
5 Pea naʻe ʻalu hifo ʻa Filipe ki he kolo ko Samēliá*+ pea kamata ke ne malangaʻaki ʻa e Kalaisí kiate kinautolu.
6 Naʻe tokangataha kotoa ʻa e fuʻu kakaí ki he meʻa naʻe leaʻaki ʻe Filipé lolotonga ia ʻenau fanongo mo mamata ki he ngaahi mana naʻá ne fakahokó.
7 He naʻe tokolahi ʻa e faʻahinga naʻe ʻiate kinautolu ha ngaahi laumālie ʻuli, pea naʻe faʻa kaikaila leʻo-lahi ʻa e ngaahi laumālie ʻulí pea nau hū mai ki tuʻa.+ ʻIkai ko ia pē, ko e tokolahi naʻe mamatea mo heké naʻe fakamoʻui kinautolu.
8 Ko ia naʻe hoko ha fuʻu fiefia lahi ʻi he kolo ko iá.
9 Pea naʻe ʻi he koló ha tangata ko Saimone hono hingoá, ʻa ia ki muʻa hení, naʻá ne fai ʻa e ngaahi ngāue fakafaimana pea naʻe ofo ai ʻa e fonua ko Samēliá, ʻo ne taukaveʻi ko ha tokotaha lahi ia.
10 Ko kinautolu kotoa, mei he siʻi taha ki he lahi taha, naʻa nau tokanga kiate ia pea nau pehē: “Ko e tangatá ni ko e Mālohi ia ʻo e ʻOtuá, ʻa ia ʻoku ui ko e Lahí.”
11 Ko ia naʻa nau tokanga kiate ia koeʻuhí kuo fuoloa mai ʻene ʻai kinautolu ke nau ofo ʻi heʻene ngaahi ngāue fakafaimaná.
12 Ka ʻi heʻenau tui kia Filipé, ʻa ia naʻá ne talaki ʻa e ongoongo lelei ʻo e Puleʻanga ʻo e ʻOtuá+ pea mo e huafa ʻo Sīsū Kalaisí, naʻe papitaiso fakatouʻosi leva ʻa e kakai tangata mo e kakai fefine.+
13 Naʻe hoko foki mo Saimone tonu ko ha tokotaha tui, pea ʻi he hili ʻene papitaisó, naʻá ne hokohoko atu mo Filipe;+ pea naʻá ne ofo ʻi heʻene sio ki he ngaahi mana mo e ngaahi fuʻu ngāue fakaofo naʻe hokó.
14 ʻI he fanongo ʻa e kau ʻapositolo ʻi Selusalemá kuo tali ʻe he kakai ʻo Samēliá ʻa e folofola ʻa e ʻOtuá,+ naʻa nau fekau atu ʻa Pita mo Sione kiate kinautolu;
15 pea naʻe ʻalu hifo ʻa e ongo meʻá ni ʻo lotu maʻanautolu ke nau maʻu ʻa e laumālie māʻoniʻoní.+
16 He kuo teʻeki ai ke ʻalu hifo ia ki ha taha ʻo kinautolu, ka kuo nau hoko pē ʻo papitaiso ʻi he huafa ʻo e ʻEiki ko Sīsuú.+
17 Naʻá na hilifaki leva hona nimá ʻiate kinautolu,+ pea naʻe kamata ke nau maʻu ʻa e laumālie māʻoniʻoní.
18 ʻI he sio leva ʻa Saimone naʻe foaki ʻa e laumālié fakafou ʻi he hilifaki ʻo e nima ʻo e ongo ʻapositoló, naʻá ne talaʻofa te ne ʻoange kiate kinaua ha paʻanga,
19 ʻo ne pehē: “Foaki mai foki kiate au ʻa e mafaí ni, koeʻuhi ke ʻilonga ha taha te u hilifaki ki ai hoku nimá ke ne lava ʻo maʻu ʻa e laumālie māʻoniʻoní.”
20 Ka naʻe pehē ʻe Pita kiate ia: “Ke ke ʻauha fakataha mai mo hoʻo silivá, koeʻuhi naʻá ke fakakaukau ʻe lava ke ke maʻu ʻa e meʻaʻofa taʻetotongi ʻa e ʻOtuá ʻaki ʻa e paʻangá.+
21 ʻOku ʻikai hao kaunga pe ʻinasi ʻi he meʻá ni, he ʻoku ʻikai totonu ho lotó ʻi he vakai mai ʻa e ʻOtuá.
22 Ko ia fakatomalaʻi ʻa hoʻo koví ni, pea kōlenga kia Sihova,* kapau ʻe malava, ke fakamolemoleʻi ʻa e taumuʻa fulikivanu ʻo ho lotó;
23 he ʻoku ou vakai atu ko ha meʻa kona mo tamala* koe pea ko ha pōpula ʻa e taʻemāʻoniʻoní.”
24 ʻI he tali ki aí naʻe pehē ange ʻe Saimone kiate kinaua: “Mo fai muʻa ha hū tōtōaki kia Sihova* maʻaku ke ʻoua naʻa hoko mai kiate au ha taha ʻo e ngaahi meʻa kuó mo leaʻakí.”
25 Ko ia ai, ʻi he hili ʻena fai ha fakamoʻoni fakaʻāuliliki mo leaʻaki ʻa e folofola ʻa Sihová,* naʻá na kamata foki ki Selusalema, pea naʻá na ʻalu atu mo talaki ʻa e ongoongo leleí ki he ngaahi kolo lahi ʻo e kau Samēliá.+
26 Kae kehe, naʻe lea ʻa e ʻāngelo ʻa Sihová*+ kia Filipe ʻo pehē: “Tuʻu hake ʻo ʻalu ki he tongá ki he hala ʻoku ʻalu hifo mei Selusalema ki Kesá.” (Ko ha hala toafa eni.)
27 Ko ia naʻá ne tuʻu hake ʻo ne ʻalu, pea vakai, ko ha ʻiunoke* ʻItiopea, ko ha tangata maʻu mafai ʻi he malumalu ʻo Kanetake, ko e kuini ʻo e kau ʻItiopeá, pea naʻá ne pule ki he koloa kotoa ʻa e kuiní. Kuó ne ʻalu ki Selusalema ke lotu,+
28 pea naʻá ne foki ʻokú ne tangutu ʻi heʻene salioté ʻo lau leʻo-lahi ʻa e tohi ʻa e palōfita ko ʻAiseá.
29 Ko ia naʻe pehē ʻe he laumālié kia Filipe: “ʻAlu atu ʻo fakaofiofi ki he saliote ko ení.”
30 Naʻe lele atu ʻa Filipe ʻi he tafaʻakí ʻo ne fanongo ki heʻene lau leʻo-lahi ʻa e tohi ʻa ʻAisea ko e palōfitá, pea naʻá ne pehē: “ʻOkú ke ʻiloʻi* moʻoni ʻa e meʻa ʻokú ke laú?”
31 Naʻá ne pehē ange: “ʻE lava fēfē ke faifai ange peá u ʻiloʻi ʻo ka ʻikai ʻi ai ha taha ke ne tataki au?” Ko ia naʻá ne kōlenga kia Filipe ke ne heka hake ʻo tangutu fakataha mo ia.
32 Ko e konga leva eni ʻo e Folofolá naʻá ne laú: “Naʻe ʻomi ia ʻo hangē ha sipi ke tāmateʻí, pea ʻi he hangē ha lami ʻoku fakalongomate ʻi he ʻao ʻo e tokotaha ʻokú ne kosi iá, ʻoku pehē ʻa e ʻikai te ne leaʻaki ha foʻi lea ʻe taha.+
33 Lolotonga hono fakamāʻí, naʻe ʻikai fai ha fakamaau totonu kiate ia.+ Ko hai te ne tala ʻa e ngaahi fakaikiiki ʻo hono tupuʻangá? Koeʻuhi ʻe tuʻusi ʻa ʻene moʻuí mei he māmaní.”+
34 Pea naʻe pehē ange ʻe he ʻiunoké kia Filipe: “ʻOku ou kole atu kiate koe, ko e lea eni ʻa e palōfitá ʻo fekauʻaki mo hai? ʻO fekauʻaki mo ia tonu pe fekauʻaki mo ha toe tangata ʻe taha?”
35 Naʻe kamata ke lea ʻa Filipe ʻo kamata mei he potu folofola ko ení, ʻo ne fakahā kiate ia ʻa e ongoongo lelei ʻo fekauʻaki mo Sīsuú.
36 Pea ʻi heʻena ʻalu atu ʻi he halá, naʻá na aʻu ai ki ha vai, pea naʻe pehē ʻe he ʻiunoké: “Vakai! Ko ha vai ē; ko e hā ha meʻa ʻokú ne taʻofi au mei haʻaku papitaisó?”
37 *——
38 Ko ia naʻe fekau ʻe he ʻiunoké ke tuʻu ʻa e salioté, pea naʻe fakatou ʻalu hifo ʻa Filipe mo e ʻiunoké ki he vaí, pea naʻá ne papitaiso ia.
39 ʻI heʻena ʻalu hake mei he vaí, naʻe taki fakavave ʻe he laumālie ʻo Sihová* ʻa Filipe, pea naʻe ʻikai ke toe sio kiate ia ʻa e ʻiunoké, ka naʻe ʻalu atu ʻa e ʻiunoké ʻi hono fonongá ʻokú ne fiefia.
40 Kae kehe, naʻe fakatokangaʻi hake ʻe Filipe ʻokú ne ʻi ʻAsitoti, pea naʻá ne ʻalu atu ʻi he kotoa ʻo e feituʻú mo hanganaki talaki ʻa e ongoongo leleí ki he kotoa ʻo e ngaahi koló ʻo aʻu ki Sesalia.+
Fakamatala ‘i Lalo
^ Pe ngalingali, “ki ha kolo ʻo Samēlia.”
^ Sio ki he Fakamatala Fakalahi A5.
^ Fakafoʻilea, “ko ha ʻahu kona.”
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Pe “ʻōfisa lotoʻā.”
^ Pe “mahinoʻi.”
^ Sio ki he Fakamatala Fakalahi A3.
^ Sio ki he Fakamatala Fakalahi A5.
