Akaboni aku Yehova akwamba kuzenga likulu lawu lasonu kufupi ndi Nyanja ya Sterling Forest (yo yiziŵika so kuti Blue Lake) kudera lakutali ku New York. Kumbi achita wuli kuti avikiriyi chilengedu?

Akaboni akuzenga mpanda wakukoliyapu waka kuzunguliya malu ngo azengapu kuti njoka kweniso tinyama tinyaki tileki kufika pamalu yanga ndi kupwetekeka. Mpanda uwu atiwuyendere kaŵikaŵi kuti awonesesi kuti tinyama tijumpha cha. Asani azimaliza kuzenga, azamutuzapu mpanda uwu. Ndipu asani njoka zazisanirika pamalu yanga, munthu yo wakusambizika umampha wazamuzisamisiyanga kumalu ngakwenere.

Tingudumuwa vimiti mu nyengu yakuzizira kuti tileki kutimbanyiza tiyuni ta Eastern bluebird pa nyengu yo tizenge vizimbu. Asani ntchitu yakuzenga yamala, pamalu yanga tazamuŵikapu timabokosi takuti tiyuni titayiyengemu. Ivi vazamuwovya kuti tiyuni iti tizileki kuthaŵa.

Tigwira so ntchitu yakunozga malu nganyaki kwambiya mu October mpaka March ndi chilatu chakuti nje za maluŵa kweniso vimiti vo visoŵa ukongwa vibuki. Mwakuyeruzgiyapu, nje za timaluŵa ta hyssop skullcap. Tichita venivi chinanga kuti kutuliya po tikwambiya kugwira ntchitu yidu pamalu yanga mu 2007, maluŵa ngenanga kweniso vimiti vinyaki tikuvisaniyapu cha.

Mu Nyanja ya Sterling Forest, musanirika viyuni va mitundu yakupambanapambana kweniso somba za mitundu mitundu. Kuti tivikiliyi nyanja iyi, wo anozga mapulani asankha nthowa zo zingavikiliya chilengedu. Nthowa izi zisazgapu kupanda uteka pachanya pa nyumba. Uteka uwu wazamuwovya kutowesa maji nga vuwa kweniso kuko maji kuti ngaleki kutchimbiya. Kweniso tiyesesa kuvikiliya vimiti ndi uteka wo we mumphepeti mwa nyanja iyi.

Kaboni munyaki yo wagwiraku ntchitu yeniyi wanguti, “Chinanga kuti kuchita venivi kukhumbika nyengu kweniso ndalama, te akunozgeka kuvikiliya chilengedu ku Warwick.”