Ezekiyeli 34:1-31
34 Yehova wangulongoro so nani, ndipu wangukamba kuti:
2 “Yiwi mwana wa munthu, kamba uchimi wakukwaskana ndi aliska a ku Isirayeli. Kamba uchimi ndipu ukambiyi aliska kuti, ‘Yehova, Ambuya Fumu Yikulu wakamba kuti: “Soka aliska a ku Isirayeli+ wo atijiliska ŵeneku! Asi aliska atenere kuliska mbereri?+
3 Yimwi muturya mafuta, mutijivwalika vakuvwala vaweya wa mbereri ndipuso mubaya nyama zakututuŵa ukongwa,+ kweni mbereri mutiziliska cha.+
4 Yimwi mwatchinthisanga cha mbereri zambula nthazi, mwachizganga cha zo zatama, mwamanganga cha zo zapwetekeka, mwawezanga cha zo zalanda ndipuso mwapenjanga cha zo zasoŵa;+ mumalu mwaki, mwazilongozganga mwaukali kweniso mwankhaza.+
5 Mwaviyo, zingumbininika chifukwa chakuti pengavi mliska;+ zingumbininika ndipu zinguryika ndi vinyama vamudondu.
6 Mbereri zangu zalandanga mumapiri ngosi kweniso mumitunthu yosi yitaliyitali; mbereri zangu zingumbininikiya pacharu chosi chapasi, kwambula munthu wakuzifufuza pamwenga kuzipenja kuti wazisaniyi.
7 “‘“Mwaviyo, yimwi aliska, vwani mazu ngaku Yehova:
8 ‘“Nge mo ini ndiliri wamoyu, Yehova Ambuya Fumu Yikulu ndiyu wakamba, “chifukwa chakuti mbereri zangu zakolekanga ndi nyama yeyosi yamudondu ndipu zajanga chakurya chaki, pakuti pengavi mliska, ndipuso aliska ŵangu azipenjanga cha mbereri zangu; mumalu mwaki ajiliskanga ŵeneku kweniso aziliskanga cha mbereri zangu,”’
9 mwaviyo, yimwi aliska, vwani mazu ngaku Yehova.
10 Yehova, Ambuya Fumu Yikulu wakamba kuti: ‘Ndilimbanengi ndi aliska, ndiŵambengi mulandu chifukwa cha mbereri zangu,* ndiŵakanizengi kuliska* mbereri zangu,+ ndipu aliska ajiliskengi so ŵeneku cha. Nditaskengi mbereri zangu kumulomu kwawu, ndipu zijengi so chakurya chawu cha.’”
11 “‘Pakuti Yehova, Ambuya Fumu Yikulu wakamba kuti: “Ini ndilipu, ndipenjengi mbereri zangu, ndipu ndiziphweriyengi.+
12 Ndiphweriyengi mbereri zangu nge mliska yo wasaniya mbereri zaki zo zingumbininika ndipu watiziliska.+ Ndizitaskengi mumalu ngosi ngo zingumbininikiya mu zuŵa la mitambu kweniso la mdima ukulu.+
13 Ndazakuzito kutuliya mu mitundu ya ŵanthu ndi kuziwunganisa pamoza kutuliya muvyaru vakupambanapambana, ndipu ndazakuziŵika mucharu chawu ndi kuziliska mumapiri nga ku Isirayeli,+ mumphepeti mwa misinji kweniso mumalu ngosi ngakujamu nga mucharu cho.
14 Ndazakuziliskiyanga mumalu nga uteka wamampha, ndipu zazamuryanga mumapiri ngatali nga ku Isirayeli.+ Zazamugonanga pasi pamalu nga uteka wamampha,+ ndipuso zazamuryanga uteka wamampha mumapiri nga ku Isirayeli.”
15 “‘“Ini ndamweni ndazamuliska mbereri zangu,+ ndipu ini ndamweni ndazakuzigoneka pasi,”+ Yehova, Ambuya Fumu Yikulu ndiyu wakamba.
16 “Ndazamupenja yo yasoŵa,+ ndazamuweza yo yalanda, ndazamumanga yo yapwetekeka, ndipu ndazamutchinthisa yambula nthazi; kweni ndazamubaya yakututuŵa ndipuso yanthazi. Ndazakuyipaska cheruzgu nge chakurya.”
17 “‘Kweni yimwi, mbereri zangu, Yehova, Ambuya Fumu Yikulu wakamba kuti: “Nde pafupi kuyeruzga pakati pa mbereri ndi mbereri yinyaki ndipuso pakati pa mbereri zinthulumi ndi aphongu.+
18 Kumbi mwakhorwa cha ndi kurya uteka wamampha ukongwa? Kumbi mukandakanda so uteka wo wajaku ndi maphazi nginu? Pavuli pakumwa maji ngakutowa ukongwa, kumbi mudumbusiya maji mwakungavunduwa ndi maphazi nginu?
19 Kumbi mbereri zangu ziryi uteka wo mwawukandakanda ndi maphazi nginu kweniso zimwi maji ngo mwangadumbusiya mwakungavunduwa ndi maphazi nginu?”
20 “‘Mwaviyo, Yehova, Ambuya Fumu Yikulu wakamba kuti: “Ini ndilipu, ndipu ini ndamweni ndazamuyeruzga pakati pa mbereri yakututuŵa ndi mbereri yakonda,
21 pakuti mwatutuzganga mbereri zosi zo zatama ndi mbaŵala zinu kweniso mapewa nginu, ndipuso mwazibwanyuwanga ndi masengwi nginu, mpaka po munguzimbininiskiya kutali.
22 Ndazamutaska mbereri zangu, zazamuliwa so cha+ ndipu ndazamuyeruzga pakati pa mbereri ndi mbereri yinyaki.
23 Mbereri zangu ndazakuziyuskiya mliska,+ mteŵeti wangu Davidi,+ ndipu wazakuziliska. Iyu wazakuziliska ndipu wazamuja mliska wawu.+
24 Ini Yehova ndazamuja Chiuta wawu,+ ndipu mteŵeti wangu Davidi wazamuja mulongozgi pakati pawu.+ Ini Yehova, ndalongoro.
25 “‘“Ndazamuchita nazu phanganu lachimangu,+ ndipu ndazamudikisa vinyama vakofya vamudondu mucharu cho,+ kuti zizijengi mwakuvikilirika muchipululu kweniso kuti zizigonengi mumalisuwa.+
26 Ndazakuzitumbika kweniso ndazamutumbika malu ngo ngakuzunguliya phiri langu,+ ndipu ndazamuchitiska kuti vuwa yiziwengi pa nyengu yaki. Vitumbiku vazamukuwa nge vuwa.+
27 Vimiti vamudondu vazamupasanga vipasu, dongu lazamuperekanga vipasu vaki,+ ndipu mbereri zangu zazamujanga mwakuvikilirika mucharu cho. Izu zazamuziŵa kuti ini ndini Yehova asani ndaziphwanya magoli ngawu+ ndi kuzitaska ku ŵanthu wo anguziko ukapolu.
28 Mitundu ya ŵanthu yazakuzirya so cha, vinyama vamudondu va pacharu chapasi vazakuzimeza so cha, ndipu zazamujanga mwakuvikilirika, pazamuŵavi cho chazakuziwofya.+
29 “‘“Ndazakuzinozge munda wo wazamuja wakutchuka,* zazamufwanga so ndi nja cha mucharu cho,+ ndipuso zazamulengesekanga so cha ndi mitundu ya ŵanthu.+
30 ‘Yiwu azamuziŵa kuti ini Yehova Chiuta wawu, nde nawu ndipuso kuti yiwu, a munyumba yaku Isirayeli, mbanthu ŵangu,’+ Yehova, Ambuya Fumu Yikulu ndiyu wakamba.”’
31 “‘Kweni yimwi mbereri zangu,+ mbereri zo nditiziphwere, ndimwi ŵanthu, ndipu ini ndini Chiuta winu,’ Yehova, Ambuya Fumu Yikulu ndiyu wakamba.”
Mazu Ngam'mphata
^ Pamwenga kuti, “Ndiŵakambiyengi kuti andiweze mbereri zangu.”
^ Pamwenga kuti, “kuphwere.”
^ Mazu ngaki chayingu, “wazamuja ndi zina.”
