Chiuta walongoro nasi mwakugwiriskiya ntchitu Bayibolu. Titenere kulisambira kuti timuziŵi umampha yo wakulilemba. (Yohane 17:3; 2 Timote 3:16) Mwenumu ndimu Yehova wakuvumbuwa vo wakhumba kuzichitiya ŵanthu kweniso charu chapasi.​—Genezesi 3:15; Chivumbuzi 21:​3, 4.

Palivi so buku linyaki lo litovya ukongwa ŵanthu kuphara Bayibolu. Bayibolu lititiwovya kuti tiyezgengi mijalidu yaku Yehova nge chanju, lisungu kweniso chitima. Lititipaska chilindizga ndipuso lititiwovya kukunthiyapu masuzgu chinanga ngangaŵa ngakulu. Kweniso livumbuwa mijalidu yiheni ya mucharu ichi yo yikoliyana cha ndi khumbu laku Chiuta.​—Salimo 119:105; Aheberi 4:12; 1 Yohane 2:​15-17.

Pakwamba, Bayibolu lingulembeka mu Chiheberi, Chigiriki kweniso Chiaramu. Kweni sonu Bayibolu losi lamphumphu pamwenga vigaŵa vaki likufwatulikiya mu vineneru pafufupi 3,000. Pa mabuku ngosi, ndi Bayibolu pe lo likufwatulikiya mu vineneru vinandi ukongwa kweniso lo lisanirika ndi ŵanthu anandi. Titenere kuzizwa cha ndi venivi. Uchimi wa mu Bayibolu ukamba kuti: “Uthenga wamampha uwu wa Ufumu [yeniyi ndiyu fundu yikulu ya mu Bayibolu], wazamupharazgika pacharu ­chosi chapasi kuti uje ukaboni ku ŵanthu amitundu yosi, ndipu pavuli paki umaliru uzengi.”​—Mateyu 24:14.

Chifukwa chakuti tiziŵa kuti uthenga wa mu Bayibolu ngwakukhumbika ukongwa, chilatu chidu chenga chakuti tituzgi Bayibolu lo likoliyana ukongwa ndi mo malemba ngangulembeke pakwamba, lakuvwika umampha kweniso lambula kusuzga kuŵerenga. Nkhani zo ze mu Fundu Zakukumaliya zo zisanirika pavigaŵa vakuti “Fundu zo Zitovya Pakufwatuliya Bayibolu,” “Vinthu vo Ve mu Bayibolu Ili,” ndipuso “Vo Vinguchitika Kuti Bayibolu Lifiki Kwaku Isi,” zikonkhoska fundu zinyaki zo tagwiriskiya ntchitu pakufwatuliya Bayibolu ili kweniso zikonkhoska vinthu vinyaki vo ve mu Bayibolu ili.

Ŵanthu wo atanja Yehova Chiuta kweniso wo atimusopa, akhumbisiska kuti aje ndi Bayibolu lo likufwatulikiya mwauneneska kweniso lambula kusuzga kuvwa. (1 Timote 2:4) Mwaviyo, tatuzga Bayibolu ili mu Chitonga (Malawi) chifukwa tikhumba kuti Bayibolu la Charu Chifya lisaniriki mu vineneru vinandi. Tigomezga kuti muchiŵerenga Bayibolu ili, likuwovyeningi kuti ‘mupenji Chiuta ndipuso kuti mumusaniyi.’​—Machitidu 17:27.