KUMBI munthu weyosi wangalutirizga kugomezgeka kwaku Chiuta asani wayeseka mwakujumpha mwesu ndipuso asani kuvwiya kwaki kungachitisa kuti waleki kusaniya vinthu vakuliŵavu? Fumbu lenili ndilu lingufumbika ndipuso kumukika pa nkhani yaku Jobu.

Panyengu yo Ayisraele ŵenga ŵeche ku Egipiti, Jobu yo wenga mubali waku Abrahamu wajanga m’charu cho sonu chidanika kuti Arabia. Panyengu yinyaki angelu kuchanya anguwungana pamasu paku Chiuta ndipu Satana nayu wenga penipo. Pa unganu wenuwu, Yehova wangukamba za chigomezgu chaki mwa muteŵeti waki wakugomezgeka Jobu. Yehova wangukamba kuti pengavi munthu yo wenga mkongorekwa kuluska Jobu. Kweni Satana wangususka ndipu wangukamba kuti Jobu wateŵetiyanga Chiuta chifukwa chakuti wangumutumbika ndipuso wangumuvikiriya. Satana wangukamba so kuti Jobu watukengi Chiuta asani wangalondeka vinthu vosi vo we navu.

Chiuta wanguzomereza kuti Satana walondi Jobu, chakwamba chuma ndi ŵana ŵaki ndipu pavuli paki wakwasi liŵavu laki. Kwambula kuziŵa kuti Satana ndiyu wachitisanga ivi, Jobu wanguvwisisa cha chifukwa cho Chiuta wanguzomerezge kuti wakumani ndi mayeseru ngenanga. Kweni Jobu wangumutuka cha Chiuta.

Mabwezi ngatatu ngaboza nganguza kwaku Jobu. Yiwu angukamba mazu ngakupambanapambana ngo ngakulembeka m’buku la Jobu, mabwezi ngo nganguyesa kumuchitisa Jobu kuti waŵanaŵani kuti Chiuta wamulanganga chifukwa cha maubudi ngo wanguchita ku ubendi. Yiwu angukamba so kuti Chiuta wakondweseka cha ndi ateŵeti ŵaki ndipuso watiŵagomezga cha. Jobu wangususka fundu zawu zaboza. Jobu wangukamba ndi chigomezgu kuti, watayengi cha ukongorekwa waki mpaka nyifwa.

Kweni Jobu wangunangisa chifukwa wangujiwona nge murunji ukongwa. Mubwezi waki wachinyamata zina laki Elihu yo wavwisiyanga vosi vo vakambikanga, wangumususka Jobu ndi mabwezi ngaki ngaboza. Elihu wangususka Jobu chifukwa chakutondeka kuziŵa kuti kukwezeka kwa Muwusu waku Yehova Chiuta ndiku nkhwakukhumbika ukongwa kuluska kukweza ŵanthu. Elihu wangukalipiya so mabwezi ngaboza ngaku Jobu, mwanthazi.

Pavuli paki Yehova Chiuta wangukambiskana ndi Jobu kuti wamunyoro maŵanaŵanu ngaki. Iyu wangumulongo vinthu vakuziziswa va m’chilengedu, iyu wangumusambiza Jobu mwa kuyeruzgiya kupeleŵere kwa munthu ndi ukulu waku Yehova. Jobu wanguzomereza kuchenyeka ndi Yehova mwakujiyuyuwa. Chifukwa chakuti Yehova ngwa chanju chikulu ndipuso lisungu, wanguliweziyapu liŵavu laku Jobu ndi chuma chaki kuluska pakwamba ndipu wangumutumbika ndi ŵana 10. (Yakobe 5:11) Chifukwa cha ukongorekwa waki kwaku Yehova panyengu yo wangukumana ndi mayeseru ngakulu, Jobu wangumuka vo Satana wakambanga, kuti ŵanthu angaja akugomezgeka cha kwaku Chiuta asani akumana ndi masuzgu.

​—Nkhani iyi yatuliya m’buku la Jobu.