Pa nyengu yo Yesu ndi akusambira ŵaki anayi apharazganga “mumasinagogi . . . mu Galileya mosi,” mbiri ya vinthu vakukondwesa vo Yesu wachitanga yinguvwika muvigaŵa vakutali. (Mariko 1:39) Mbiri yeniyi yinguvwika so mutawuni yinyaki yo kwajanga munthu yo watamanga makhati. Luka yo wenga dokotala, wangukonkhoska kuti munthu mwenuyu wenga ndi “makhati liŵavu losi.” (Luka 5:12) Asani makhati ngasapariya ukongwa muliŵavu, ngananga viŵalu va munthu.

Mwaviyo, munthu mwenuyu wawonekanga mwakuvwisa lisungu ndipuso wakhumbikanga kuja kutali ndi ŵanthu. Kweniso asani ŵanthu ŵe pafupi, wakhumbikanga kudaniriza kuti “Wakufipiskika, wakufipiskika!” Venivi vaŵawovyanga kuti aleki kuja nayu pafupi ukongwa kuti waleki kuŵayambuzgiyaku matenda ngenanga. (Ŵalevi 13:45, 46) Sonu kumbi munthu mwenuyu wanguchita wuli wati wawona Yesu? Iyu wanguluta pafupi ndi Yesu ndi kugwada pa masu paki, ndipu wangumupempha kuti: “Ambuya, asani mukhumba, munganditowesa.”—Mateyu 8:2.

Munthu uyu wangulongo kuti wamugomezganga ukongwa Yesu! Iyu wawonekanga mwakuvwisa lisungu ukongwa chifukwa cha matenda ngenanga. Kumbi Yesu wanguchitanji? Kumbi imwi mwatingi muchitengi wuli asani mwengapu pa nyengu yeniyi? Yesu wangumuvwiya lisungu ndipu wangutambasuwa janja laki ndi kumuko. Pavuli paki, Yesu wangumukambiya kuti: “Ndikhumba! Towa.” (Mateyu 8:3) Munthu mwenuyu wanguchira nyengu yeniyo ndipu makhati ngaki ngangumala. Kweni venga vakusuzga kuti ŵanthu anyaki agomezgi venivi.

Kumbi mungayanja kuja ndi Fumu yo yichitiya lisungu ŵanthu kweniso yo yikhumbisiska kuŵawovya nge mo Yesu wachitiyanga? Vo Yesu wanguchita pakovya munthu mwenuyu, vilongo kuti asani iyu waziyamba kulamuliya charu chosi nge Fumu, uchimi unyaki wa m’Bayibolu wazamufiskika. Uchimi uwu ukamba kuti: “Iyu wazamuchitiya lisungu munthu wakunyozeka kweniso mukavu, ndipu wazamutaska maumoyu nga ŵanthu akavu.” (Sumu 72:13) Pa nyengu yeniyi, Yesu wazamufiska chilatu chaki chakukhumba kuwovya ŵanthu wosi wo asuzgika.

Kumbukani kuti Yesu wechendachizgi munthu yo wenga ndi makhati, ŵanthu anandi akondwanga ndi uteŵeti wo iyu wachitanga. Pa nyengu iyi, yiwu atenere kuti anguvwa so nkhani yakukondwesa yakuti wachizga munthu wamakhati. Kweni Yesu wakhumbanga cha kuti ŵanthu amugomezgengi chifukwa cha vinthu vo ŵavwa. Iyu wawuziŵanga uchimi wo ukamba kuti “mazu ngaki ngazamuvwika cha mumsewu” ndi chilatu chakuti wakopi ŵanthu. (Yesaya 42:1, 2) Mwaviyo, Yesu wangukambiya munthu wamakhati yo wangumuchizga kuti: “Uwonesesi kuti ungakambiyanga weyosi cha, kweni luta kajilongo ku wasembi ndi kupereka chawanangwa nge mo Dangu laku Mozesi likambiya.”—Mateyu 8:4.

Kweni chifukwa chakuti munthu mwenuyu wangukondwa ukongwa kuti wachizgika, wangutondeka kuvwiya vo Yesu wangumukambiya ndipu wakambiyanga weyosi vo vinguchitika. Venivi vinguchitisa kuti ŵanthu aje ndi mtima wakukhumbisiska kuziŵa vinandi vakukwaskana ndi Yesu. Chifukwa cha venivi, Yesu wangwamba kuluta mutawuni mwachisisi, ndipu kwa nyengu yitaliku, wajanga kwaku yija. Kweni ŵanthu akutuliya muvigaŵa vakupambanapambana azanga mbwenu kuti waŵasambizi ndi kuŵachizga.