Pa nyengu iyi ndipu pajumpha vyaka pafufupi vitatu kutuliya po Yesu wangubatizikiya ndipu kwenga kukumaliya kwa chaka cha 32 C.E. Yapa, ndipu pajumpha ŵaka nyengu yimanavi kutuliya po iyu ndi akusambira ŵaki ŵenga ku Phwandu la Mahema ku Yerusalemu. Yiwu atenere kuti ŵenga chakufupi ndi Yerusalemu. (Luka 10:38; Yohane 11:1) Sonu kunguja myezi 6 kuti Yesu wabayiki ndipu wangupharazga ukongwa muchigaŵa cha Yudeya pamwenga cha Pereya cho chenga kusirya linyaki la Msinji wa Yorodani. Ntchitu yakupharazga yenga yakukhumbika ukongwa muvigaŵa venivi.

Kumbukani kuti pavuli pa Phwandu la Pasika wa mu 30 C.E., kwa myezi yinandiku, Yesu wanguchipharazga ku Yudeya ndipu wangujumpha muchigaŵa cha Samariya. Pavuli paki, ŵe pafupi kuchita Phwandu la Pasika mu chaka cha 31 C.E., Ayuda wo ajanga ku Yerusalemu akhumbanga kubaya Yesu. Kutuliya pa nyengu iyi, Yesu wangumala chaka ndi hafu wachisambiza ŵanthu kunkhondi kwa Galileya. Pa nyengu yeniyi, ŵanthu anandi anguja akusambira ŵaki. We ku Galileya, Yesu wangusambiza akusambira ŵaki mo angapharazgiya ndipu pavuli paki wanguŵapaska ulongozgi wakuti: “Mukapharazgengi kuti: ‘Ufumu wakuchanya waŵandika.’” (Mateyu 10:5-7) Kweni sonu, Yesu wakhumbanga kugwira ntchitu yapade yakupharazga muchigaŵa cha Yudeya.

Kuti Yesu wayambi kugwira ntchitu yapade yeniyi, wangusankha akusambira ŵaki 70 ndipu wanguŵagaŵa ŵaŵiŵaŵi kuti akapharazgi. Venivi vilongo kuti penga magulu 35 nga ŵanthu wo apharazganga za Ufumu muchigaŵa cho mwenga ‘ntchitu yikulu yakuvuna kweni antchitu ŵenga amana.’ (Luka 10:2) Yiwu angudanjiya kuchiyamba ntchitu yakupharazga ndipu Yesu wazanga muvuli mwawu. Akusambira 70 ŵenaŵa, achizganga ŵanthu wo atamanga kweniso apharazganga uthenga wo Yesu wapharazganga.

Chifukwa chakuti Yesu wanguŵakambiya kuti akapharazgengi munyumba za ŵanthu, akusambira ŵenaŵa apharazganga ukongwa cha mumasinagogi. Iyu wanguŵakambiya kuti: “Munyumba yeyosi yo mwamusere, mukakambengi dankha kuti: ‘Chimangu chiŵi panyumba iyi.’ Asani munyumba yo mwe munthu wakwanja chimangu, chimangu chinu chiŵi paku iyu.” Kumbi yiwu apharazganga uthenga wakuti wuli? Yesu wanguti: ‘Mukaŵakambiyengi kuti: “Ufumu waku Chiuta wakuziyani pafupi.”’—Luka 10:5-9.

Ulongozgi wo Yesu wangupaska akusambira ŵaki 70 wenga wakuyanana ndi wo wangupaska akutumika ŵaki 12 wo wanguŵatuma kuti akapharazgi pafufupi chaka kuvuli. Iyu wanguŵatcheŵeska kuti ndi ŵanthu wosi cha wo akuŵalondere umampha. Kweni ntchitu yakupharazga yo yiwu angugwira, yingunozgekeresa mitima ya ŵanthu wo akhumbanga kuvwisiya uneneska. Ndipu Yesu wati wafika, anandi mwa ŵanthu yaŵa ŵenga akukhumbisisa kuwona Mbuya wa akusambira ŵenaŵa, kweniso kusambira vinandi kutuliya kwaku iyu.

Pechendajumphi nyengu yitali akusambira aku Yesu wo angugaŵika mumagulu 35 kuti akapharazgi uthenga wa Ufumu, anguwere kwaku Yesu. Yiwu angukambiya Yesu mwalikondwa kuti: “Ambuya chinanga ndi  viŵanda vativwiyanga asani tagwiriskiya ntchitu zina linu.” Yesu watenere kuti wangukondwa ukongwa wati wavwa nkhani yakukondwesa yeniyi. Ndipu wangukamba kuti: “Ndiwona Satana kuti wawa kali nge limphezi kutuwa kuchanya. Awonani! ndakupaskani mazaza kuti mukandengi njoka ndi vipiriri.”—Luka 10:17-19.

Yesu wachikamba kuti akusambira ŵaki apaskika nthazi kuti akandengi njoka kweniso vipiriri, waŵasimikiziyanga kuti azamuthereska vinthu vakofya. Venivi vinguŵasimikiziya kuti kunthazi Satana wazamuponyeka pacharu kutuwa kuchanya. Yesu wanguwovya so akusambira ŵaki 70 ŵenaŵa kuziŵa vinthu vakukhumbika ukongwa. Iyu wanguti: “Mungakondwanga chifukwa chakuti mizimu yakuvwiyani cha, kweni kondwani chifukwa chakuti mazina nginu ngalembeka kuchanya.”—Luka 10:20.

Yesu wangukondwa ukongwa ndipu wanguthamika awisi pa masu pa ŵanthu chifukwa chakuti angugwirisiya ntchitu akusambira ŵaki akujiyuyuwa ŵenaŵa kuchita vinthu vanthazi. Pavuli paki, wangung’anamukiya kwa akusambira ŵaki ndipu wanguŵakambiya kuti: “Mbakutumbikika ŵanthu wo masu ngawu ngawona vinthu vo yimwi muwona. Chifukwa nditikukambiyani kuti achimi anandi ndi mafumu nganandi angukhumbisiska kuwona vinthu vo yimwi muwona kweni anguviwona cha, ndipuso angukhumbisiska kuvwa vinthu vo yimwi mutuvwa kweni anguvivwa cha.”—Luka 10:23, 24.