Mary ndi mulumu waki John, a aja mucharu cho ŵanthu anandi akutuliya ku Philippines akuza kuzigwira ntchitu ndipu yiwu atiŵapharazgiya uthenga wamampha. Pa nyengu ya muliri wa COVID-19, Mary wangwamba kusambira Bayibolu ndi ŵanthu a mucharu cho iyu waja kweniso a muvyaru vinyaki. Kumbi iyu wangufiska wuli kuchita venivi?

Mary wafumbanga ŵanthu wo waŵasambizanga Bayibolu kuti, “Kumbi muziŵa munthu weyosi yo wangayanja kusambira Bayibolu?” Asani amuka kuti hinya, iyu waŵafumbanga asani wangakambiskana nawu. Kufumba fumbu lipusu lenili kanandi kutovya ukongwa. Chifukwa wuli? Chifukwa ŵanthu wo atanja Mazu ngaku Chiuta kanandi akhumba kukambiyaku abali ŵawu kweniso anyawu vo asambira mu Bayibolu. Kumbi ndi vinthu wuli vo vichitika asani munthu wafumba ŵanthu wo wasambira nawu Bayibolu fumbu lenili?

Jasmin yo wasambizika Bayibolu ndi Mary wanguwovya Mary kusaniya ŵanthu anayi kuti wasambirengi nawu Bayibolu. Yumoza wa ŵanthu ŵenaŵa wenga Kristine. Iyu wakondwanga ukongwa ndi vo wasambiranga mwakuti wangupempha Mary kuti asambirengi kaŵi sabata yeyosi. Mary wati wafumba Kristine asani waziŵa munthu weyosi yo wangayanja kusambira Bayibolu, Kristine wangumuka kuti, “Hinya, pe anyangu anyaki wo angayanja kusambira.” Mu masabata ngamanavi, Kristine wangukambiya Mary mazina nga mabwezi ngaki nganayi ngo ngakhumbanga kusambira Bayibolu. Pati pajumpha nyengu, Kristine wangukambiya so Mary mazina nga mabwezi ngaki nganyaki ngo ngakhumbanga kusambira. Ndipu ŵanthu wo nawu akambanga so mazina nga ŵanthu anyaki wo akhumbanga kusambira.

Kristine wakhumbanga so kuti ŵanthu a mu banja laki ku Philippines nawu asambiri Bayibolu. Mwaviyo, iyu wangukambiya mwana waki munthukazi Andrea. Pakwamba, Andrea waŵanaŵananga kuti, ‘Akaboni aku Yehova nkhagulu ka mpatuku, atimugomezga cha Yesu kweniso agwiriskiya ntchitu Chipanganu Chakali pe.’ Kweni wati wasambira kamoza pe, wanguwamu kuti vo waŵanaŵananga venga vaboza. Asani wasambira fundu yinyaki yasonu kutuwa mu Bayibolu, iyu wakambanga kuti, “Asi Bayibolu ndilu lakamba venivi, mbwenu ndikuti vauneneska!”

Pati pajumpha nyengu, Andrea wangukambiya Mary kuti mabwezi ngaki ngaŵi kweniso munyaki yo wagwiranga nayu ntchitu nawu akhumba kwamba kusambira Bayibolu. Kweniso kwambula kuziŵa, ankhazi aku Andrea a Angela wo ŵenga ambula kuwona nawu avwisiyanga asani Andrea wasambira. Zuŵa linyaki, Angela wangukambiya Andrea kuti wamukambiyi Mary kuti nayu wakhumba kusambira Bayibolu. Angela waviyanjanga ukongwa vo wasambiranga. Mu mwezi umoza pe, iyu wanguloŵeza malemba nganandi ndipu wangupempha kuti wasambirengi kanayi sabata yeyosi! Iyu wangwamba kusanirika  pa maunganu nyengu zosi kuziya pa vidiyokoniferensi, ndipu Andrea ndiyu wamuwovyanga.

Mary wati waziŵa kuti Joshua mulumu waku Kristine nayu wavwisiyanga asani Kristine wasambira, Mary wangumufumba asani nayu wangayanja kwamba kusambira Bayibolu. Joshua wangumuka kuti: “Ini ndivwisiyengi ŵaka, kundifumbanga mafumbu cha. Asani mwandifumba pe, mbwenu ndituwengepu.” Wati wavwisiyaku kwa maminisi ngankhondi pe, Joshua wangufumba mafumbu nganandi kuluska Kristine ndipu wangukamba kuti nayu wakhumba kusambira Bayibolu.

Fumbu lipusu lo Mary wafumbanga ŵanthu, linguwovya kuti ŵanthu anandi ayambi kusambira Bayibolu. Chifukwa chakuti wangusaniya ŵanthu anandi wo akhumbanga kusambira Bayibolu, wangupempha abali ndi azichi anyaki kuti asambirengi nawu. Mary wangwamba kusambira Bayibolu ndi ŵanthu 28 akutuliya muvyaru vinayi.

Jasmin yo tamuzumbuwa kukwamba, wakubatizika mu April 2021. Kristine wakubatizika mu May 2022 ndipu wakuwere kwawu ku Philippines kuti wakajengi ndi ŵanthu a mubanja laki. Ŵanthu anyaki so ŵaŵi wo Kristine wangukambiya Mary kuti waŵasambizengi Bayibolu nawu akubatizika. Angela wakubatizika pati pajumpha ŵaka myezi yimanavi kutuliya po Kristine wangubatizikiya ndipu sonu ndi mpayiniya wa nyengu zosi. Joshua mulumu waku Kristine, mwana wawu munthukazi Andrea kweniso ŵanthu anyaki anandi, nawu aluta panthazi mwauzimu.

Mu nyengu yaku Yesu kweniso ya akutumika, ŵanthu anandi akambiyanga ŵanthu a mubanja lawu kweniso mabwezi ngawu uthenga wamampha wo angusambira. (Yoha. 1:​41, 42a; Machi. 10:​24, 27, 48; 16:​25-33) Mungachita umampha ukongwa kufumba ŵanthu wo musambira nawu Bayibolu kweniso ŵanthu anyaki kuti, “Kumbi muziŵa munthu weyosi yo wangayanja kusambira Bayibolu?” Asani mwafumba fumbu lipusu lenili, panyaki namwi musaniyengi ŵanthu anandi wo angayanja kusambira Bayibolu!