Vo Vingatiwovya Kuti Tije Bwezi Chayilu
KUMBI mukukumanapu ndi suzgu yikulu mwakuti mwajivwanga kuti palivi yo wangakuwovyani? Tija mu “nyengu zakusuzga ukongwa” ndipu venivi vingachitiska kuti tiguŵengi kweniso tijivwengi kuti te tija. (2 Timo. 3:1) Kweni asani takumana ndi masuzgu, tikhumbika cha kumalana nangu tija. Bayibolu likamba umampha wakuja ndi mabwezi chayingu ngo ngatitiwovya mu “nyengu ya suzgu.”—Nthanthi 17:17.
MO MABWEZI CHAYINGU NGATITIWOVYE
Chinanga kuti Paulo wenga pa ukayidi wa panyumba kweni wafiskanga kuchita uteŵeti waki chifukwa chakuti anyaki amuwovyanga
Wakutumika Paulo wayendanga ndi anyaki po wachitanga umishonale, ndipu yiwu amuwovyanga mu nthowa zinandi. (Ako. 4:7-11) Pa nyengu yo wenga mujeri ku Roma, mabwezi ngaki ngamuwovyanga kugwira ntchito zo iyu wafiskanga cha kuzigwira. Mwakuyeruzgiyapu, Epafurodito wangupingiya Paulo vinthu vo abali ndi azichi a ku Filipi angumutumiziya. (Afi. 4:18) Tukiko wangupereka makalata ngo Paulo wangulemba ku mipingu yakupambanapambana. Chifukwa chakuti mabwezi ngaki ngamuwovyanga, Paulo wangufiska kuchita uteŵeti waki chinanga kuti wenga pa ukayidi wapanyumba kweniso wenga kwakuyija mujeri. Kumbi mungachita wuli kuti muje bwezi chayilu?
Abali ndi azichi mazuŵa nganu alongo kukhumbika kwakuja bwezi chayilu. Tiyeni tikambiskani chakuwoniyapu cha mzichi munyaki yo wenga bwezi laku Elisabet. Mzichi mwenuyu ndi mpayiniya wa nyengu zosi ku Spain. Anyina aku Elisabet ŵati aŵasaniya ndi khansa, mzichi uyu wangulembe Elisabet mameseji nganandi ngakumuchiska ngo ngenga ndi mavesi nga mu Bayibolu. Elisabet wangukamba kuti: “Mameseji ngenanga ngandiwovyanga kuti ndileki kujivwa kuti nde ndija ndipu ngandipaskanga nthazi kuti ndifiski kuchita vinthu vo ndakhumbikanga kuchita zuŵa lelosi.”—Nthanthi 18:24.
Tingaŵachiska Akhristu anyidu asani te pamaunganu pamwenga tipharazgiya nawu limoza. Mwakuyeruzgiyapu, mungachito mubali pamwenga mzichi wakukota ndi kuluta nayu ku maunganu pamwenga mu uteŵeti. Asani muchitengi viyo, muŵachiskengi kweniso nawu akuchiskeningi. (Aro. 1:12) Kweni Akhristu anyaki afiska cha kutuwapu pa nyumba. Kumbi tingachita wuli kuti tiŵawovyi?
MUWOVYENGI ŴANTHU WO ANGAFISKA CHA KUTUWAPU PANYUMBA
Abali ndi azichi anyaki atama kweniso akumana ndi masuzgu nganyaki ngo ngatiŵatondekeska kuwungana pamasu ndi pamasu. Tiyeni tikambiskani vo vinguchitikiya David, yo watama matenda nga khansa. Kwa myezi yakujumpha 6, iyu walondiyanga munkhwala wa khansa wa chemotherapy. Pa nyengu yosi yo walondiyanga munkhwala wenuwu, David ndi muwolu waki Lidia avwisiyanga maunganu ŵe kunyumba kwawu.
Kumbi abali ndi azichi mu mpingu anguŵawovya wuli? Asani maunganu ngamala, abali ndi azichi anyaki wo aza ku Nyumba ya Ufumu akambiskananga ndi David kweniso Lidia kuziya pa vidiyokoniferensi. Kweniso asani David ndi Lidia amukapu pa maunganu, alondiyanga mameseji ngakuchiska kutuwa kwa abali ndi azichi asani maunganu ngamala. Kumbi venivi vinguŵawovya wuli? David ndi Lidia ajivwanga kuti ŵe ŵija cha.
Mupharazgengi limoza ndi Akhristu wo angafiska cha kutuwapu panyumba
Kumbi tinganozga vakuti tipharazgiyengi limoza ndi ŵanthu wo atuwapu cha panyumba? Tingasintha vinthu vimanavimana kuti tipharazgiyengi limoza ndi ŵanthu ŵenaŵa. Asani tichita viyo, tilongo kuti titiŵaluwa cha. (Nthanthi 3:27) Nyengu zinyaki mungapharazgiya nawu limoza mwakugwiriskiya ntchitu makalata pamwenga kuziya pa foni. Ŵara anganozga vakuti Akhristu wo atuwapu cha panyumba ajengepu pa unganu wakunozgeke uteŵeti kuziya pa vidiyokoniferensi. David ndi Lidia awonganga ukongwa kuti ŵara a mu mpingu wawu achitanga venivi. David wangukamba kuti: “Kuja limoza ndi abali ndi azichi pa nyengu yakunozgeke uteŵeti kweniso kuvwisiya pempheru lo laperekekanga, vatichiskanga ukongwa.” Asani nkhwamachitika kweniso mphakwenere kuchita viyo, nyengu ndi nyengu mupemphengi mubali pamwenga mzichi yo watuwapu cha panyumba kuti muzichitiyi sambiru linu la Bayibolu kunyumba kwaki.
Asani tichitiya vinthu limoza ndi abali ndi azichi wo atuwapu cha panyumba kweniso tiwona mijalidu yawu yamampha, vititiwovya kuti tiyanjanengi nawu ukongwa. Mwakuyeruzgiyapu, asani tipharazgiya nawu limoza ndipu tiwona mo agwiriskiya ntchitu mwalusu Mazu ngaku Chiuta kuti amufiki pa mtima munthu, vititiwovya so kuti tiŵayanjengi ukongwa. Asani mutovya Akhristu anyinu pa vinthu vakukwaskana ndi kusopa, vingakuwovyani kusaniya mabwezi nganandi ngasonu.—2 Akori. 6:13.
Paulo wachiskikanga ukongwa ndi mubwezi waki Tito. (2 Akori. 7:5-7) Nkhani iyi yititikumbusa kuti tikhumbika kuŵakambiya mazu ngakuchiska pe cha abali ŵidu. Kweni tipatuwengi nyengu yakuchitiya nawu vinthu limoza ndipuso tichitengi vosi vo tingafiska kuti tiŵawovyi.—1 Yoha. 3:18.
MUWOVYENGI ANYINU WO ATOMBOZGEKA
Abali ndi azichi ŵidu ku Russia alongo chakuwoniyapu chamampha pa nkhani yakuwovyana. Tiyeni tikambiskani vo vinguchitikiya Sergey ndi muwolu waki Tatyana. Apolisi ŵati afufuza munyumba yawu, anguŵatole ku polisi kuti akaŵafumbi mafumbu. Tatyana ndiyu angwamba kumutuzga ndipu wanguwere kunyumba. Sergey wangukamba kuti: “[Tatyana] wati wafika ŵaka kunyumba, mzichi munyaki wachiganga wanguza kunyumba kwidu. Abali ndi azichi anguza ndipu angwamba kutiwovya kunozga vinthu munyumba.”
Sergey wangukamba so kuti: “Nditanja ukongwa lemba la Nthanthi 17:17, lo likamba kuti: ‘Bwezi chayilu litanja nyengu zosi ndipu ilu ndi mubali yo wakubalika kuti wakuwovyi pa nyengu ya suzgu.’ Mazu ngenanga ngakukhumbika ukongwa kwaku ini pa nyengu yinu po nditombozgeka, chifukwa ndingafiska cha kukunthiyapu pakundija. Yehova wandipaska anyangu wo alivi mantha kuti andiwovyi.” a
Po tikumana ndi masuzgu ngakulu, tikhumbika mabwezi kuti ngatiwovyengi. Ndipu mabwezi ngenanga ndingu ngazakutiwovya ukongwa pa chisuzgu chikulu. Mwaviyo, tiyeni tiyesesi kuja bwezi chayilu pasonu panu!—1 Petu. 4:7, 8.
a Wonani nkhani ya pa jw.org yamutu wakuti, “Yehova Wandipaska Anyangu wo Alivi Mantha Kuti Andiwovyi.”
