Kugowoka kung’anamuwa kuwona nge kuti munthu waleka kunangisa cha pamwenga kuti wanangisa kanthu kamana. Kweni kung’anamuwa kuleka kuŵanaŵaniya vo munthu munyaki wanangisa kweniso kuleka kusunga chakukhosi.

FUNDU YA M’BAYIBOLU: “Lutirizgani kuzizipizgiyana kweniso kugowokiyana ndi mtima wosi chinanga munyaki wangaŵa ndi chifukwa chakudandawuliya vakukwaskana ndi munyaki.”—Akolose 3:13.

“Asani utanja munyaku, uluwaku vinthu vo wanangisa m’malu mwaki uwona ŵaka vinthu vamampha vo watesesa kuchita.”—Aaron.

Asani musunga chakukhosi mungayamba kutama, kusuzgika maŵanaŵanu kweniso mungatimbanyizga nthengwa yinu.

“Zuŵa linyaki, mulumu wangu wangundipepesa chifukwa wangundiguŵisa ukongwa. Venga vakusuzga ukongwa kuti ndimugowoke. Pati pajumpha nyengu ndingumugowoke, kweni ndidandawula kuti ndingumugowoke liŵi cha. Kuleka kugowoka liŵi kunguchitisa kuti tilekengi kukoliyana.”—Julia.

MUKANI MAFUMBU YANGA PAKUMWIJA

Asani nyengu yinyaki mwaziguŵa ndi vo munthu yo mukutorana nayu wachita pamwenga kulongoro, muzijifumbi kuti:

• ‘Kumbi ndiswera cha kuguŵa?’

• ‘Kumbi munyangu wandinangiya chinthu chikulu mwakuti ndikhumba kuti wandipepesi pe, pamwenga ndingaluwaku ŵaka?’

KAMBISKANANI NDI MUNTHU YO MUKUTORANA NAYU

• Kumbi pato nyengu yitali wuli kuti tigowokiyani asani munyaki wanangisa?

• Kumbi tingachita wuli kuti tigowokiyanengi mwaliŵi?

FUNDU ZAKOVYA

• Asani munthu yo mukutorana nayu wakunangiyani, lekani kuŵanaŵana kuti wenga ndi vilatu viheni pakuchita viyo.

• Mugowokiyengi munthu yo mukutorana nayu asani wanangisa ndipu mukumbukengi kuti “tosi tiguŵa nyengu zinandi.”—Yakobe 3:2.

“Vija vipusu kugowokiyana asani mosi mwanangisa, kweni vija vakusuzga ukongwa asani yo wananga ndi munthu yumoza. Munthu wakhumbika kujiyuyuwa ukongwa kuti wagowoke munyaki kweniso kuti wazomerezengi asani munyaki watimupepesa.”—Kimberly.

FUNDU YA M’BAYIBOLU: “Umaliskengi liŵi nkhani.”—Mateyu 5:25.