VO BAYIBOLU LIKAMBA
Nkhondu
M’nyengu yakali, Yehova Chiuta wanguzomereza Ayisraele kuti achitengi nkhondu. Kumbi ivi ving’anamuwa kuti Chiuta wazomereza nkhondu zo zichitika mazuŵa nganu?
Ntchifukwa wuli Ayisraele achitanga nkhondu?
VO ŴANTHU ANYAKI AKAMBA
Ayisraele asopanga “chiuta wankhondu” yo wenga wakwanja ndewu ukongwa.
VO BAYIBOLU LIKAMBA
Chiuta wanguzomereza Ayisraele kuchita nkhondu ndi mitundu yo yachitanga vinthu vankhaza kweniso mijalidu yinyaki yiheni nge kugona nyama, kugonana pa chibali ndipuso kupereka ŵana sembi. Chiuta wangukambiya mitundu yeniyi kuti yisinthi vo yachitanga kweni yingusintha cha. Pati pajumpha vyaka vinandi, wangukambiya Ayisraele kuti: “Mitundu yo nditiyidikisa pamasu pinu, yajifipisa ndi vinthu vosi venivi.”—Ŵalevi 18:21-25; Yeremiya 7:31.
“Yehova Chiuta winu watiyidikisa mitundu iyi pamasu pinu chifukwa cha vinthu viheni vo yichita.”—Marangu 9:5.
Kumbi Chiuta watovya ŵanthu wo achita nkhondu mazuŵa nganu?
VO VICHITIKA
Asani nkhondu yichitika, alongozgi a matchalitchi akamba kuti Chiuta wawovyengi gulu la asilikali a m’charu chawu. Buku linyaki likamba kuti: “Kanandi matchalitchi ngatovya pa nkhondu zosi zo zichitika.”—The Causes of War.
VO BAYIBOLU LIKAMBA
Akhristu azomerezeka cha kuchita nkhondu ndi arwani ŵawu. Wakutumika Paulo wangulembe Akhristu kuti: “Asani nkhwamachitika, jani mwachimangu ndi ŵanthu wosi, nge mo mungafiskiya. . . . Mungaweziyanga mwija cha.”—Ŵaroma 12:18, 19.
M’malu mwakukambiya akusambira ŵaki kuti achitengi nkhondu, Yesu wanguŵakambiya kuti: “Lutirizgani kwanja arwani ŵinu ndipu mupempheriyengi ŵanthu wo atikutombozgani, kuti mulongo kuti ndimwi ŵana ŵa Awusemwi wo ŵe kuchanya.” (Mateyu 5:44, 45) Akhristu akhumbika cha kuchitaku nkhondu chinanga kuti charu chawu chichita nkhondu ndi charu chinyaki. Ve viyo chifukwa yiwu ‘mba charu cha.’ (Yohane 15:19) Chiuta wakhumba kuti ŵanthu wo atimusopa ayanjengi arwani ŵawu kweniso angasereriyanga cha muvakuchitika va charu. Ivi vilongo kuti Chiuta watiŵawovya cha ŵanthu wo achita nkhondu mazuŵa nganu.
“Ufumu wangu ngwacharu ichi cha. Asani Ufumu wangu wenga wa charu ichi, mphanyi ateŵeti ŵangu achita nkhondu kuti ndileki kuperekeka kwa Ayuda. Kweni Ufumu wangu ngwakutuliya kucharu ichi cha.”—Yohane 18:36.
Kumbi nkhondu yazamumala?
VO ŴANTHU ANYAKI AKAMBA
Nkhondu yazamumala cha. Buku linyaki likamba kuti: “Nkhondu zilutiriyengi kuchitika. Vazamuchitika cha kuti pacharu chapasi paje chimangu.”—War and Power in the 21st Century.
VO BAYIBOLU LIKAMBA
Nkhondu zazamumala, ndipu munthu weyosi wazamuŵavi maŵanaŵanu ngakuti wachiti nkhondu. Pambula kuswera, Ufumu waku Chiuta uphwanyengi vidya vosi va nkhondu ndipu wazamuwovya ŵanthu wosi kuti ajengi mwachimangu. Ufumu wenuwu ndi boma lakuchanya. Bayibolu likamba kuti Chiuta “wazamunyolosa vinthu vakukwaskana ndi mitundu yanthazi yakutali. Ŵanthu azamusambusa malipanga ngawu kuja vakulimiya ndi mikondu yawu kuja vidya vakuphatiya vimiti. Mtundu wazamuyukiya so mtundu unyaki cha ndi lipanga, ndipu ŵanthu azamusambira so nkhondu cha.”—Mika 4:3.
Bayibolu likamba kuti mu Ufumu waku Chiuta palivi boma lo lazamulimbana ndi boma linyaki kuti lifiski vo likhumba, lipangi marangu ngo ngachiska ŵanthu kuti achitengi viwawa pamwenga kuchiska ŵanthu kuti asankhanengi mtundu. Venivi vilongo kuti nkhondu zazamumala. Chiuta wakulayizga kuti: “Vazamupwetekana cha pamwenga kusakazana, chifukwa charu chapasi chazamuzaza ndi ŵanthu akuziŵa Yehova nge mo maji ngazaziya nyanja.”—Yesaya 11:9.
“Iyu walekesa nkhondu pacharu chosi chapasi. Wafyo uta ndipuso wavikita mkondu. Wawotcha magaleta nga nkhondu ndi motu.”—Sumu 46:9.
Mungayanja Kuŵerenga so Nkhani Izi
MAFUMBU NGO BAYIBOLU LIMUKA
Kumbi Nkhondu ya Aramagedoni ndi Nkhondu Wuli?
Mazu ngakuti Aramagedoni ngasanirika waka malu ngamoza mu Bayibolu, kweni nkhondu yo mazu yanga ngamiya yikonkhoskeka ukongwa mu Malemba.
MAFUMBU NGO ŴANTHU AFUMBA KAŴIKAŴI
Nchifukwa Wuli Akaboni aku Yehova Aleka Kuchitaku Nkhondu?
Akaboni aku Yehova aziŵika pacharu chosi kuti akana kuchitaku nkhondu. Ziŵani chifukwa cho akaniya.
