Tikhumbika kuja ndi chivwanu kuti tikondwesi Yehova. Kweni Bayibolu likamba kuti “mbanthu wosi cha wo ŵe ndi chivwanu.” (2 Ate. 3:2) Wakutumika Paulo wachikamba mazu yanga wakambanga “ŵanthu akupweteka ndi aheni,” wo amutombozganga. Kweni mazu ngakukwaskana ndi chivwanu ngo Paulo wangukamba ngangagwiriskikiya ntchitu mu nthowa zinandi. Ŵanthu anyaki asankha kukaniya dala ukaboni wakuti kwe Chiuta yo ndi Mlengi. (Aro. 1:20) Anyaki akamba kuti ŵe ndi chivwanu mu chinthu chinyaki chanthazi ukongwa. Kweni kugomezga venivi nkhwakukwana cha kuti tije ndi chivwanu cho chikhumbika kuti tikondwesi Yehova.

Tikhumbika kugomezga kuti Yehova waliku ndipu wapereka mphotu ku ŵanthu wo ŵe ndi chivwanu chakukho. (Ahe. 11:6) Chivwanu ndi jalidu lo mzimu wakupaturika utuzga. Kupemphera kwaku Yehova kungawovya munthu kuti walonde mzimu wakupaturika. (Luka 11:​9, 10, 13) Chinthu chinyaki chakukhumbika ukongwa kuti tilonde mzimu wakupaturika, nkhusambira Mazu ngaku Chiuta. Pavuli paki, tilungurukengi pa vo taŵerenga ndipu tiyesesengi kuvigwiriskiya ntchitu. Asani tichita venivi, ndikuti tizomereza kuti mzimu waku Yehova utiwovyengi kuti tichitengi vinthu vakulongo kuti te ndi chivwanu cho chitimukondwesa.