1, 2. (a) Nchifukwa wuli Ayisraele 24,000 angutondeka kulonde vitumbiku? (b) Kumbi vinthu vo vikuchitika kali vititiwovya wuli?

 AYISRAELE ŵati ŵaja kamanavi kuti asere m’charu chakulayizgika, anthurumi masauzandi nganandi angwamba kuchita ureŵi “ndi ŵana anthukazi ŵa Moabu.” Ivi vinguchitiska kuti Yehova wabayi ŵanthu 24,000. Pa nyengu iyi, Ayisraele anguja kamanavi kuti ahari charu cho anguchilindizga kwa nyengu yitali kweni angutondeka kulonde vitumbiku vamampha chifukwa cha kuchita ureŵi.​—Maŵ. 25:1-5, 9.

² Chakuwoniyapu chiheni ichi chikulembeke kuti tisambirepu kanthu chifukwa ndisi utifikiyengi ‘umari wa mgonezi’ uwu. (1 Ŵakor. 10:6-11) Sonu te mu “mazuŵa ngakumaliya” ndipu ateŵeti aku Chiuta ŵepafupi kusere m’charu chifya cha urunji. (2 Tim. 3:1; 2 Pet. 3:13) Kweni vakupaska chitima kuti ateŵeti anyaki aku Yehova aleka kuvikiliya mtima wawu. Yiwu anyengeka ndi mijalidu yiheni ndipu ivi vachitiska kuti akumani ndi masuzgu nganandi. Vakukayikisa kuti ŵanthu aviyo angazilonde vitumbiku vamuyaya.

3. Nchifukwa wuli ŵanthu akutorana akhumbika kuvwiya ulongozgi waku Yehova? (Wonani chithuzi cho che papeji 23.)

 ³ Chifukwa chakuti sonu charu chazaza ndi jalidu la ureŵi, ŵanthu akutorana akhumbika kuvwiya ulongozgi waku Yehova kuti avikiliyi umampha nthengwa yawu. (Ŵerengani Sumu 127:1) M’nkhani iyi tikambiskanengi vo ŵanthu akutorana angachita kuti nthengwa yawu yije yakukho mwakuviliya mtima wawu, kuja pa ubwezi ndi Chiuta, kuvwala umunthu wasonu, kukambiskana umampha kweniso kulongorana chanju munthowa zakupambanapambana.

4. Kumbi ndi vinthu wuli vo vichitiska kuti Akhristu anyaki achitengi vinthu viheni?

⁴ Kumbi vingachitika wuli kuti Mkhristu wachiti ureŵi? Kanandi, masu ndingu ngachitiska kuti munthu wachiti ureŵi. Yesu wangukamba kuti: “Yosi wakulereska munthukazi kumukhumbira, wareŵa nayu kali mumtima waki.” (Mat. 5:27, 28; 2 Pet. 2:14) Akhristu anandi achita ureŵi chifukwa chakuti atondeka kujikanizga ndipu awonere vinthu vakuyuska chiryokuryoku chakugonana pa Intaneti pamwenga pa vipangizu vinyaki kweniso aŵerenga mabuku ngakukamba vakugonana. Anyaki awonere mafilimu, mapulogilamu nga pa TV pamwenga vinthu vinyaki vakukwaskana ndi kugonana. Anyaki achereza m’madansi pamwenga aluta kuchiwonere ŵanthu wo achita masaza kwambula kuvwala.

5. Nchifukwa wuli tikhumbika kuvikiliya mtima widu?

⁵ Anyaki achita vinthu viheni chifukwa chakwanjana ndi ŵanthu aheni. M’charu chambula kulondo marangu ichi ndipuso cho chazaza ndi mijalidu yiheni, nkhwambula kusuzga kuti mtima widu uyambi kutinyenga kuti tiyambi kukhumbira munthu yo ndi muwolu pamwenga murumu widu cha. (Ŵerengani Yeremiya 17:9, 10.) Yesu wangukamba kuti: “Mu mtima mutuliya maŵanaŵanu ngaheni, zimbanda, maureŵi, mauyaya.”​—Mat. 15:19.

6, 7. (a) Kumbi mtima unganyenga munthu kuti wachiti vinthu viheni nivi? (b) Kumbi nchinthu wuli cho chingatiwovya kuti tileki kubudiya Yehova?

⁶ Asani maŵanaŵanu ngaheni ngayamba kujalikiskika mumtima wawu wakunyenga, ŵanthu wo akopana angayamba kukambiskana nkhani zo zikhumbika kuti akambiskanengi ndi muwolu pamwenga murumu wawu pe. Kweniso, atesesa kusaniya mpata wakuti achezengi pafupipafupi ndipuso achita vinthu vambula kwenere nge kuti vachitika ŵaka mwangozi. Asani ayamba kwanjana ukongwa atamba kuchita vinthu mwakutayiliya ndipu pavuli paki atondeka kuvileka chinanga kuti aziŵa umampha kuti vo achita viheni.​—Nthanthi 7:21, 22.

⁷ Yiwu aluwa fundu za m’Malemba za mijalidu yamampha ndipu atamba kuphatanaphatana, kufyofyonthana ndi vinyaki vo vikhumbika kuti achitengi ndi munthu yo akutorana nayu pe. Pavuli paki, ateseka “pakuguguzika ndi likhumbira.” Ndipu asani likhumbira lakuwa “lipapa ulakwi.” Pavuli paki achita ureŵi. (Yak. 1:14, 15) Ivi vakupaska chitima ukongwa! Yiwu angachita cha vinthu viheni venivi asani awona nthengwa nge mo Yehova watiyiwone. Kumbi akutorana angachita wuli kuti awonengi nthengwa kuti njakutumbikika?

8. Kumbi kuja pa ubwezi ndi Yehova kungatiwovya wuli kuti tileki kuchita ureŵi?

⁸ Ŵerengani Sumu 97:10. Kuja pa ubwezi ndi Yehova kungativikiliya kuti tileki kuchita ureŵi. Kusambira mijalidu yamampha yaku Chiuta ndipuso kuyesesa kuti tije “ŵakumwezga  Chiuta, uli mbana ŵakwanjiwa,” kungatiwovya kuti tikani ‘ureŵi ndipuso ukazuzi wewosi.’ (Ŵaef. 5:1-4) Kuziŵa kuti “areŵi . . . waŵayeruzgengi Chiuta,” kungawovya akutorana kuti ayesesengi kuchita vinthu vo vingawovya kuti nthengwa yawu yije yakutumbikika ndipuso yambula kufipiskika.​—Ŵah. 13:4.

9. (a) Kumbi Yosefe wangukana wuli kuchita ureŵi? (b) Kumbi tisambiranjipu pa chakuwoniyapu chaku Yosefe?

⁹ Ateŵeti anyaki aku Chiuta aleka kulondo fundu za mijalidu yamampha chifukwa cha kucheza ndi ŵanthu wo mbakaboni cha kunchitu. Yosefe yo wenga mnyamata wakutowa ukongwa nayu wangukumana ndi mayeseru ko wagwiranga nchitu. Muwolu wa bwana waki wakhumbanga kuti wachiti nayu ureŵi. Zuŵa ndi zuŵa, wayesesanga kumunyengere kuti wagoni nayu. Pavuli paki, “wangumuko, wanguko vivwaru vaki, wanguti, ‘Ugoni nani.’” Kweni Yosefe wanguthaŵa. Kumbi nchinthu wuli cho chinguwovya Yosefe kuti walutirizgi kuja ndi mijalidu yamampha pa nyengu yo wayesekanga? Iyu wakhumbanga cha kunanga ubwezi waki ndi Chiuta wo wamuvikiliyanga kuti waleki kuchita ureŵi ndipuso kuti walutirizgi kugomezgeka. Chifukwa chakuti wangukana kuchita vinthu viheni, angumulekesa nchitu ndipuso angumumanga chinanga kuti wangunanga cha. Kweni Yehova wangumutumbika. (Chiy. 39:1-12; 41:38-43) Kaya kungaja kunchitu pamwenga kumalu nganyaki, Akhristu akhumbika cha kukopana ndi munthu yo ndi muwolu pamwenga murumu wawu cha.

10. Kumbi kuvwala umunthu wasonu kutitiwovya wuli?

¹⁰ Ŵanthu akutorana akhumbika kuja akukho mwauzimu chifukwa chakuti umunthu wawu wasonu ‘ulengeka mu urunji wauneneska’ ndipu aja akugomezgeka mwakukoliyana ndi khumbu laku Chiuta. (Ŵaef. 4:24) Ŵanthu wo avwala umunthu wasonu, achitiska viŵaru vawu kuja ‘vakufwa’ ku “ureŵi, wuyu, ulakalaka, likhumbira liheni ndi bina.” (Ŵerengani Ŵakolose 3:5, 6.) Fundu yakuti tichitiski viŵaru vidu kuti vije ‘vakufwa’ yilongo kuti tikhumbika kuyesesa kulimbana ndi likhumbira la vinthu viheni vakuliŵavu. Venivi vingatiwovya kuti tileki kukhumbira munthu yo ndi muwolu pamwenga murumu widu cha. (Jobu 31:1) Asani tichita khumbu laku Chiuta, vitiwovyengi kuti ‘titinkhengi uheni, ndi kumeremete ku umampha.’​—Ŵar. 12:2, 9.

11. Kumbi umunthu wasonu ungawovya wuli kuti nthengwa yije yakukho?

¹¹ Tingalongo kuti tiyezga Yehova asani tivwala umunthu wasonu. (Ŵakol. 3:10) Anthurumi ndi anthukazi akutorana atumbikika ukongwa asani ayesesa kuja ndi mijalidu yamampha nge “lisungu, ulemu, kujiyuyuwa, upovu, chilekerezga.” (Ŵakol. 3:12) Yiwu achita so vinthu mwakukoliyana asani azomerezga kuti “chimangu chaku Khristu chiusi mu mitima” yawu. (Ŵakol. 3:15) Ŵanthu akutorana atumbikika ukongwa asani achitiyana “lisungu”! Yiwu akondwa ukongwa asani weyosi waku yiwu waja panthazi pa nkhani ‘yakulongo ulemu’ munyaki.​—Ŵar. 12:10.

12. Kumbi ndi mijalidu niyi yo muwona kuti njakukhumbika kuti ŵanthu akutorana akondwengi?

¹² Sid wati wafumbika kuti wakambi mijalidu yo yitovya kuti nthengwa yawu yije yalikondwa, wangumuka kuti: “Chanju ndi jalidu lakukhumbika ukongwa ndipu tiyesesa kuti tije nalu. Tiwona so kuti kufwasa nkhwakukhumbika ukongwa.” Muwolu waki, Sonja wanguzomerezga vo murumu  waki wangukamba ndipu wangukamba so kuti: “Ulemu utovya so kuti banja lije lalikondwa. Kweniso tiyesesa kujiyuyuwa chinanga kuti vakusuzga.”

13. Kumbi nchinthu wuli cho chingawovya kuti nthengwa yije yakukho, nanga nchifukwa wuli?

¹³ Tikayika cha kuti kukambiskana umampha kutovya kuti nthengwa yije yakukho. Vakuchitiska chitima ukongwa kuti ŵanthu anyaki akutorana akambiskana mwaulemu ndi viŵetu pamwenga ŵanthu anyaki kweni atondeka kukambiskana viyo ndi yo akutorana nayu! Nthengwa yikho cha asani ŵanthu akutorana athaŵiriya ‘kulunda, kukwiya, kandundu, kugazamuka’ ndipuso kukamba mazu ngachipongu. (Ŵaef. 4:31) Mazu ngaulemu, lisungu ndipuso chanju vingawovya akutorana kuti ubwezi wawu uje wakukho m’malu mwakujaliya kupindana ndi kususkana.​—Ŵaef. 4:32.

14. Kumbi ndi vinthu wuli vo tikhumbika cha kuchita?

¹⁴ Bayibolo likamba kuti pe “nyengu yakuja chisisi.” (Wak. 3:7) Ivi ving’anamuwa kuti titondekengi kukambiskana cha. Munthukazi wakuyirwa wa ku Germany wangukamba kuti: “Vingamupwetaka ukongwa munyidu asani tija ŵaka cheti.” Iyu wangukamba so kuti: “Chinanga kuti nkhwakusuzga kuwuko mtima asani tasuzgika maŵanaŵanu, kweni tikhumbika cha kukamba pamwenga kuchita chinthu chinyaki cho chingapweteka munthu yo tikutorana nayu chifukwa vingachitiska kuti nkhani yo yikuwi.” Kukamba uneneska, ŵanthu akutorana angamaliska cha nkhani asani akalipiyana pamwenga asani akana kukambiskana. M’malu mwaki, nthengwa yawu yingaja yakukho asani aleka kupindana.

15. Kumbi kukambiskana umampha kungawovya wuli kuti nthengwa yije yakukho?

¹⁵ Nthengwa yija yakukho asani akutorana asaniya nyengu yakukambiskana vakukhosi. Vo tingakamba vingaja vamampha asani tavikamba munthowa yakwenere. Mwaviyo, muyesesengi kusankha mazu ngakwenere  ndipu mungakambengi mwaulemu chinanga mphanyengu yo mwapambana maŵanaŵanu. Ivi vingawovya munyinu kuti wakuvwisiyeningi. (Ŵerengani Ŵakolose 4:6.) Munthurumi ndi muwolu waki angakambiskana umampha asani akamba mazu “ngamampha . . . kuti ngapaski wezi” ku munyawu.​—Ŵaef. 4:29.

16, 17. Nchifukwa wuli ŵanthu akutorana akhumbika kuziŵa vo munyawu wakhumba pa nkhami ya kugonana?

¹⁶ Ŵanthu akutorana angaja ndi nthengwa yakukho asani weyosi waŵika panthazi vakukhumba va munyaki. (Ŵaf. 2:3, 4) Wosi akhumbika kuziŵa vo munyawu wakhumba pa nkhani yakugonana.​—Ŵerengani 1 Ŵakorinte 7:3, 4.

¹⁷ Nchachitima kuti ŵanthu anyaki akutorana atondeka kulongo munyawu chanju pamwenga akana kugonana. Kweniso anthurumi anyaki awona kuti kuchita vinthu mwalisungu kungalongo cha kuti mbanthurumi nadi. Bayibolo linyaki likamba kuti: “Mwanthurumi, yesesani kuŵavwisisa awolu ŵinu.” (1 Petro 3:7, Phillips) Munthurumi watenere kuziŵa kuti ŵanthu akutorana akhumbika kulongorana chanju m’nthowa zakupambanapambana kuluska ŵaka kugonana. Munthukazi wangakondwa ukongwa asani murumu waki watimulongo so chanju munthowa zinyaki kuluska pa nyengu yakugonana pe. Asani wosi aŵanaŵaniyana, vingawovya kuti akondwengi munthengwa.

18. Kumbi munthurumi ndi muwolu waki angachita wuli kuti nthengwa yawu yije yakukho?

¹⁸ Palivi chifukwa chakuvwika chakuleke kugomezgeka munthengwa. Kweni asani muleka kulongorana chanju, munyinu wangayamba kupenja munthu munyaki kuti ndiyu walongoranengi nayu chanju. (Nthanthi 5:18; Wak. 9:9) Ndichu chifukwa chaki Bayibolo likambiya ŵanthu akutorana kuti: “Mungakaniyananga cha [kugonana], kweni iku asani mpha phanganu kwakanyengu.” Chifukwa wuli? Kuti Satana waleki “kumwesani” chifukwa cha kuleka kujiko. (1 Ŵakor. 7:5) Asani yumoza munthengwa waleka kujiko, Satana wangasaniriyapu mwaŵi ndipu venivi vingachitiska kuti munyaki wachiti ureŵi. Kweniso, weyosi munthengwa wakhumbika cha kujipenje “umampha wa pakuyija kweni yosi” waŵanaŵaniyengi so munyaki. Yiwu atenere kugonana chifukwa chakuti atanjana, m’malu mwakuwona nge kuti ndi nchitu ŵaka. Kuchita viyo, kungawovya kuti nthengwa yawu yije yakukho.​—1 Ŵakor. 10:24.

19. Kumbi tikhumbika kuchitanji, nanga nchifukwa wuli?

¹⁹ Te pafupi kusere m’charu chifya chaurunji. Ndichu chifukwa chaki tikhumbika cha kukhumbira vinthu viheni chifukwa vingachitiska kuti tizileki kutaskika nge mo venge ndi Ayisraele 24,000 wo angufwiya mu Dambu la Moabu. Pakukamba za vo vinguchitika pa nyengu iyi, Bayibolo lititcheŵeska kuti: “Yo ngwakujipima kuti watuma, watcheŵi vinu wangawa.” (1 Ŵakor. 10:12) Mwaviyo, tikhumbika kulutirizga kuja akugomezgeka kwa Awuskefwi akuchanya ndipuso kwaku yo tikutorana nayu kuti nthengwa yidu yije yakukho. (Mat. 19:5, 6) Sonu ndipu tikhumbika kuyesesa kuti tizisaniriki ‘ambula banga ndi ambula kalema, mu chimangu.’​—2 Pet. 3:13, 14.