YEHOVA ndi Chiuta wakupasa. (Yak. 1:17) Vinthu vo ve kuchanya ndi panu pasi vilongo kuti iyu ngwakupasa.—Sumu 65:12, 13; 147:7, 8; 148:3, 4.

Munthu munyaki yo wakulembaku buku la Sumu wanguwonga ukongwa vo Chiuta wakulenga. Ndichu chifukwa chaki wangulemba sumu za kuthamika ntchitu zaku Yehova. Ŵerengani chaputala 104 cha buku la Sumu kuti muwoni asani mulekengi kukoliyana ndi vo wangukamba. Iyu wangukamba kuti: “Ndimbiyengi Yehova umoyu wangu wosi. Ndimbengi sumu za kuthamika Chiuta mu umoyu wangu wosi.” (Sumu 104:33) Kumbi ndivu namwi mukhumba?

Yehova wakhumba kuti tije akupasa nge mo iyu waliri. Watitipasa so vifukwa vakuvwika vo titenere kujaliya akupasa. Wonani vo wangutuma Paulo kuti walembi. Iyu wangulemba kuti: “Lamula ŵanthu a chuma mu mgonezi wunu kuti aleki kujikuzga, ndipu angagomezganga chuma chambula kuthembeka cha, kweni agomezgengi Chiuta, yo watitipasa vinthu vinandi kuti tikondwengi. Akambiyi kuti achitengi vamampha, aje asambasi pa ntchitu zamampha, akupasa, akunozgeka kugaŵiyaku anyawu ndipuso ajiŵikiyi fawundeshoni yamampha ya munthazi, alinga kuti ako mwanthazi umoyu weneku.”—1 Tim. 6:17-19.

Mu kalata yachiŵi yo Paulo wangulembe mpingu wa ku Korinte, wangukonkhoska mtima wo munthu watenere kuja nayu pakupereka. Iyu wangukamba kuti: “Weyosi wapereki mwakuyana ndi mo wasimikizgiya mumtima mwaki, mwachigwinini cha pamwenga mwakuchichizgika, chifukwa Chiuta watanja yo wapereka mwakukondwa.” (2 Ŵakor. 9:7) Pavuli paki, Paulo wanguzumbuwa wo anguyanduwa ndi mtima wakupasa. Wo angulonde angusaniya vinthu vo asoŵanga ndipu wo angupereka nawu angusaniya vitumbiku.—2 Ŵakor. 9:11-14.

Paulo wangumaliza nkhani ya vakupereka mwakupereka ukaboni wakuti Chiuta ngwakupasa. Iyu wangulemba kuti: “Tiwonga Chiuta chifukwa cha chawanangwa chaki chambula makambika.” (2 Ŵakor. 9:15) Chawanangwa chaku Yehova chisazgapu vinthu vosi vamampha vo Chiuta wapasa ŵanthu ŵaki kuporote mwaku Yesu Khristu. Chawanangwa ichi ncha pachanya ukongwa mwakuti tingakonkhoska cha kuzirwa kwaki.

Kumbi tingalongo wuli kuti tiwonga vosi vo Yehova ndi Mwana waki atitichitiya sonu kweniso vo atichitiyengi kunthazi? Tingalongo kuti tiwonga asani tipereka nyengu, nthazi ndi ndalama kuti tilutisi panthazi kusopa kwa uneneska, kaya vije vimana pamwenga vinandi.—1 Mik. 22:14; 29:3-5; Luka 21:1-4.