KUYUSKIKA kwaku Yesu ndi nkhani ŵaka cha chinanga kuti yikuchitika kali kweni njakukhumbika ukongwa kwaku isi mazuŵa nganu. Wakutumika Paulo wangulongo kukhumbika kwaki po wangulemba kuti: “Wayuskika Khristu ku ŵakufwa, mruwuku waku wo mbakura [akufwa]. Chifukwa mwakuti mu munthu yikuza nyifwa, mu munthu so chikuza chiyuska cha ŵakufwa. Chifukwa uli ndimo mwaku Adamu ŵafwiya wosi, viyo so mwaku Khristu wosi asanduskikengi ŵamoyu.”—1 Ŵakorinte 15:20-22.

Yesu wanguyuskika pa Nisani 16, 33 C.E., zuŵa lenili Ayuda aperekanga kwaku Yehova Chiuta, vipasu vakwambiriya va mbewu zawu zakwamba zo alimanga. Yiwu alutanga ndi mbewu zenizi ku nyumba yakusopiyamu, ya ku Yerusalemu. Po Paulo wangukamba kuti Yesu wenga mruwuku [chipasu chakwamba], wang’anamuwanga kuti pazamuja so ŵanthu anyaki wo azamuyuskika.

Mazu nganyaki ngo Paulo wangukamba ngakonkhoska vinthu vo vikufiskika chifukwa chakuyuskika kwaku Yesu. Paulo wakukamba kuti: “Mu munthu yikuza nyifwa, mu munthu so chikuza chiyuska cha ŵakufwa.” Chifukwa chakubuda kwaku Adamu ndipuso kuleka kufikapu, tosi titufwa. Kweni Yesu wakutiwovya kuti tifwatuliki ku ubudi ndi nyifwa chifukwa chakuti wakupereka umoyu waki wakufikapu nge sembi ndipuso wakuyuskika. Kuti wavwikisi umampha nkhani iyi, pa Ŵaroma 6:23, Paulo wakulemba kuti: “Mphotu ya ulakwi ndi nyifwa; kweni chawezi chaku Chiuta mbumoyu wamuyaya mwaku Khristu Yesu Ambuyafwi.”

Yesu wangukonkhoska kukhumbika kwa nyifwa yaki ndipuso kuyuskika kwaki. Iyu wangukamba kuti: “Kutenere Mwana wa munthu kusoskeka: alinga kuti yosi wakuvwana mwaku iyu waŵi ndi umoyu wamuyaya. Pakuti Chiuta wangwanja viyo charu, viyo kuti wangupaska Mwana waki wakuwa yija, alinga kuti yosi wakuvwana mwaku iyu wareki kutayika, kweni waŵi ndi umoyu wamuyaya.”​—Yohane 3:14-16.

Aŵanaŵaniyani za kuzija ndi umoyu wambula kuvwa kuŵaŵa, kusuzgika pamwenga kuliya! (Chivumbuzi 21:3, 4) Ichi nchilindizga chamampha ukongwa! Munthu munyaki wakulemba kuti: “Asani tiwona masanu ngatitikumbuska kuti umoyu ngufupi kweni chiyuka chititisimikiziya kuti nyifwa nja kanyengu kamanavi ŵaka.” Kukamba uneneska, kuyuskika kwaku Yesu kwawovya nadi ŵanthu kuti azisaniyi umoyu wamuyaya!