Kumbi Tingasambiranji ku Munthu Muheni?
SAMBIZANI ŴANA ŴINU
Kumbi Tingasambiranji ku Munthu Muheni?
Munthu muheni yo tisambirengi, ndi yo Yesu wakambiskana nayu pachithuzi yapa. Munthu mwenuyu wachita chitima chifukwa cha maubudi ngaki. Iyu wakambiya Yesu kuti: “Undikumbuki, uchiza mu ufumu waku.” Nge mo uwone pachithuzi yapa, Yesu wakamba nayu. Kumbi waviziŵa vo Yesu watimukambiya?— a Yesu watimulayizga kuti: ‘Nadi ndikunene le, wazamukuŵa mu Paradayisu pamoza nani.’
Kumbi uŵanaŵana kuti Paradayisu mwenuyu wazamukuŵa wuli?— Kuti tisaniyi kwamuka, tiyi tikambiskani za Paradayisu yo Chiuta wangupangiya Adamu ndi Eva. Kumbi Paradayisu mwenuyu wenga pani? Kumbi wenga kuchanya pamwenga panu pasi?—
Asani ungakamba kuti panu pasi, uneneska. Mwaviyo, asani tiŵanaŵana za munthu muheni kuti wazamuja ‘mu Paradayisu,’ tiŵanaŵanengi kuti wazamuja panu pasi pa nyengu yo charu chazamuja paradayisu. Kumbi Paradayisu yo wazamukuŵa wuli?— Tiyi tiwoni.
Yehova Chiuta wati walenga Adamu ndi Eva, Bayibolo likamba kuti wanguŵaŵika m’munda wa “Edene” pacharu chapasi. Kumbi uŵanaŵana kuti munda wa “Edene” wenga wakutowa wuli?— Kukamba uneneska, wenga munda wamampha ndipuso wakutowa ukongwa kujamu kuluska malu ngosi ngo munthu wakuwonapu!
Kumbi uŵanaŵana kuti Yesu wazamuja panu pasi ndi munthu mwenuyu?— Awa. Yesu wazamuja nge Fumu kuchanya wachiwusa charu chapasi. Mwaviyo, Yesu wazamuja nayu, kung’anamuwa kuti wazakumuyuska kweniso wazamuwonesesa kuti wasoŵa chechosi cha mu Paradayisu. Nanga nchifukwa wuli Yesu wazamuzomerezga kuti munthu yo wenga muheni waje mu Paradayisu?— Tiyi tikambiskani fumbu lenili.
Mbuneneska kuti munthu mwenuyu wakuchita vinthu viheni ukongwa. Ndimu achitiya so ŵanthu mabiliyoni nganandi pacharu chapasi, chifukwa chakuti anandi mwa ŵanthu ŵenaŵa akusambizikapu cha zaku Yehova ndipuso aziŵa cha vo wakhumba.
Mwaviyo, ŵanthu ŵenaŵa, kusazgiyapu munthu muheni yo Yesu wakambiskananga nayu pa chimiti chakutombozgekiyapu, azamuyuskikiya mu Paradayisu pacharu chapasi. Azamusambizika khumbu laku Chiuta. Pavuli paki, azamulongo kuti atanja nadi Yehova.
Kumbi uziŵa mo angalongore kuti atanja nadi Chiuta?— Angalongo venivi asani achita vo Chiuta wakhumba. Vazamukuŵa vakukondwesa ukongwa kuzija mu Paradayisu nyengu zosi ndi ŵanthu wo atanja Yehova kweniso atanjana!
Ŵerengani Mavesi Yanga
[Mazu ngam’mphata]
a Asani muŵerenga ndi mwana, kamuzeri kukumaliya kwa fumbu katikukumbuskani kuti mulekezgi dankha kamanavi ndipuso kuti muchiski mwana yo kuti wamuki.
[Chithuthuzi papejie 30]
[Chithuthuzi papeji 31]
[Chithuthuzi papeji 31]
[Chithuthuzi papeji 31]
