Tineniyeni, Viŵengepu Venivo Zukwanji?

“Chiŵengi chine chisimikizgu cha uzi winu [‘kuŵapu kwinu’ NW], ndi cha umari wa mgonezi wo?”—MAT. 24:3.

KUMBI MUNGAMUKA WULI?

Kumbi uchimi waku Yesu wakukwaskana ndi chisuzgu chikulu, ungufiskika kaŵi mu nthowa wuli?

Kumbi mo tavwiya ntharika ya mbereri ndi mbuzi vatichitiska kuti tiyiwonengi wuli nchitu yakupharazga?

Mwakukoliyana ndi Mateyu 24:29-51 ndipuso 25:1-46, kumbi Yesu wang’anamuwanga kuti wazengi zukwanji?

1. Nge mo anguchitiya akutumika, kumbi tikhumbisiska kuziŵanji?

 YESU we pafupi kumaliza uteŵeti waki, akusambira ŵaki akhumbisiskanga kuziŵa vo vatingi viziŵachitikiyengi kunthazi. Mwaviyo, kwati kwaja mazuŵa ngamanavi kuti wabayiki, akutumika anayi angumufumba kuti: “Viŵengepu venivo zuŵanji? Ndipu chiŵengi chine chisimikizgu cha uzi winu, ndi cha umari wa mgonezi wo?” (Mat. 24:3; Marko 13:3) Yesu wanguŵamuka mwakukonkhoska uchimi wo watingi uzifiskikengi pacharu chosi, wo ukulembeka m’buku la Mateyu chaputala 24 ndi 25. Mu uchimi wenuwu, Yesu wangukambiya limu vinthu vinandi vikuluvikulu vo vatingi vizichitikengi. Mazu ngaki ngakukhumbika ukongwa chifukwa nasi tikhumbisiska kuziŵa vo vichitikengi kunthazi.

2. (a) Kumbi taja tichipenja kuti tiziŵi vinthu nivi kwa vyaka vinandi? (b) Kumbi ndi mafumbu ngatatu nanga ngo tikambiskanengi?

² Abali akusankhika wo angulongozga pakusanda uchimi waku Yesu wakukamba za mazuŵa ngakumaliya, aja achiromba kwa vyaka vinandi pakusanda uchimi wenuwu. Yiwu akhumbanga kuziŵa nyengu yo mazu ngaku Yesu ngatingi ngafiskikiyengi. Kuti tikonkhoski vo tagomezganga pakwamba, tiyeni tikambiskani mafumbu ngatatu yanga: Kumbi “chisuzgu chikulu” chiyambengi zukwanji? Kumbi Yesu wayeruzgengi zukwanji ŵanthu kuja “mbereri” pamwenga “mbuzi”? Kumbi Yesu ‘wazengi’ zukwanji?—Mat. 24:21, 42; 25:31-33.

KUMBI CHISUZGU CHIKULU CHIYAMBENGI ZUKWANJI?

3. Kumbi kali taziŵanga kuti chisuzgu chikulu chikwamba zukwanji?

³ Kwa vyaka vinandi, tagomezganga kuti chisuzgu chikulu chikwamba mu 1914 chifukwa cha Nkhondu Yakwamba ya Pacharu Chosi. Yehova ‘wangufupikiska mazuŵa ngo’ mu 1918 nkhondu yati yamala kuti Akhristu akusankhika wo ŵenga ŵeche pacharu chapasi, aje ndi mwaŵi wakupharazga uthenga wamampha ku mitundu yosi. (Mat. 24:21, 22) Pa nyengu yo atingi amaliyengi nchitu yakupharazga, ufumu waku Satana watingi ubwangandulikengi. Ndichu chifukwa chaki tagomezganga kuti chisuzgu chikulu che ndi vigaŵa vitatu: Chatingi chiyambengi (1914-1918), chatingi chimengi  dankha (kutuliya mu 1918 kuluta kunthazi) ndipu chatingi chimalengi pa Aramagedoni.

4. Nchinthu wuli cho chatiwovya kuziŵa uchimi waku Yesu wakukamba za mazuŵa ngakumaliya?

⁴ Tati talutirizga kusanda uchimi waku Yesu wo ukamba za mazuŵa ngakumaliya, tawona kuti ukufiskika kakwamba ndipu ufiskikengi so kunthazi. (Mat. 24:4-22) Uchimi wenuwu ukufiskika ku Yuda, kwamba mu 33 C.E. kuzifika mu 70 C.E. ndipuso ufiskikengi pacharu chosi chapasi mu mazuŵa ngidu. Kuziŵa venivi kwatiwovya kuti tikonkhoski fundu zinandi. a

5. (a) Nchinthu wuli cho chikwamba mu 1914? (b) Kumbi nyengu ya maurwirwi yeniyi yiyanana ndi nyengu niyi?

⁵ Taziŵa so kuti chisuzgu chikulu chikwamba mu 1914 cha. Nchifukwa wuli tikamba viyo? Chifukwa chakuti uchimi wa m’Bayibolo ulongo kuti chisuzgu chikulu chazamuyamba ndi nkhondu za ŵanthu cha kweni kubwangandulika kwa visopa va boza. Mwaviyo, vo vingwamba kuchitika mu 1914, venga kwamba kwa chisuzgu chikulu cha kweni kwenga ‘kwamba kwa maurwirwi.’ (Mat. 24:8) “Maurwirwi” ngenanga, ngayanana ndi ngo nganguchitika ku Yerusalemu ndi ku Yuda kutuliya mu 33 C.E. kuzifika mu 66 C.E.

6. Nchinthu wuli cho chazamulongo kuti chisuzgu chikulu chayamba?

 ⁶ Nchinthu wuli cho chazamulongo kuti chisuzgu chikulu chayamba? Yesu wangukamba kuti: “Penipo muwonengi chinthu cha unyakazi cho chichitiskengi mapopa, chakukambika ndi Danyele mchimi yo, chichima mu malu ngakupaturika (yo waŵerenga wawemu), po ndipu ŵa mu Yuda ŵathaŵiyi ku mapiri.” (Mat. 24:15, 16, NW) Pakufiskika kwakwamba, ‘kuma mu malu ngakupaturika’ kukuchitika m’chaka cha 66 C.E. pa nyengu yo asilikali achiroma (“chinthu cha unyakazi”) anguyukiya Yerusalemu ndi nyumba yakusopiyamu (malu ngo Ayuda awonanga kuti ngakupaturika). Pakufiskika kwakumaliya, ‘kuma’ kwazamuchitika po wupu wa United Nations (“chinthu cha unyakazi” cha mazuŵa nganu) wazamuyukiya Visopa vachikhristu (vo ŵanthu wo akamba kuti mbakhristu ativiwona kuti vakupaturika) kweniso visopa vinyaki vosi vaboza. Venivi vikukonkhoskeka so pa lemba la  Chivumbuzi 17:16-18. Asani vinthu venivi vaziyamba kuchitika, kwazamuja kwamba kwa chisuzgu chikulu.

7. (a) Kumbi ŵanthu ‘angutaskika’ wuli mu 66 C.E.? (b) Nchinthu wuli cho tilindizga kuti chichitikengi kunthazi?

 ⁷ Yesu wangukamba so kuti: ‘Ngafupiskikengi mazuŵa ngo.’ Kufiskika kwakwamba kwa uchimi uwu, kunguchitika m’chaka cha 66 C.E., pa nyengu yo asilikali achiroma ‘angufupikiska’ nyengu, kung’anamuwa kuti ŵati azunguliya Yerusalemu anguja nyengu yimanavi, ndipu anguwerere. Pavuli paki, Akhristu akusankhika anguthaŵa ku Yerusalemu ndi Yuda, ivi vinguchitiska kuti ‘ataskiki.’ (Ŵerengani Mateyu 24:22; Mal. 3:17) Sonu nchinthu wuli cho tilindizga kuti chichitikengi kunthazi? Yehova ‘wazamufupikiska’ nyengu yo wupu wa U.N. wazamuyukiya visopa vaboza, ndipu Yehova wazamuzomerezga cha kuti chisopa chauneneska chizibwangandulikiyi limoza ndi visopa vaboza. Venivi vazamuchitiska kuti ŵanthu aku Chiuta azitaskiki.

8. (a) Ndi vinthu wuli vo vazamuchitika asani chisuzgu chikulu chakapu? (b) Kumbi munthu wakumaliya wa a 144,000 wazamulonde zukwanji mphotu yaki yakuluta kuchanya? (Wonani mazu ngakumaliya.)

 ⁸ Nchinthu wuli cho chazamuchitika asani chisuzgu chikulu chakapu? Mazu ngaku Yesu ngalongo kuti pazamujumpha nyengu yimanavi ndipu Aramagedoni yazamukuza. Ndi vinthu wuli vo vazamuchitika pa nyengu yeniyi? Tisaniya kwamuka pa lemba la Ezekiele 38:14-16 ndi Mateyu 24:29-31. (Ŵerengani.) b Asani Aramagedoni yaziza, pazamuja pakumaliya pa chisuzgu chikulu ndipu venivi vazamuyanana ndi kubwangandulika kwa Yerusalemu mu 70 C.E. (Mal. 4:1) Chisuzgu chikulu cho chituza chazamukuŵa chapade chifukwa “chakuti chengavi kuŵapu chaviyo kutuwa ku mtendeku wa charu.” (Mat. 24:21) Asani Aramagedoni yalutapu, Muwusu Waku Khristu wa Vyaka 1,000, wazamuyamba.

9. Kumbi uchimi wo Yesu wangukamba wa chisuzgu chikulu utiŵakwaska wuli ŵanthu aku Yehova?

⁹ Uchimi wenuwu wa chisuzgu chikulu utitichiska  ukongwa. Nchifukwa wuli tikamba viyo? Chifukwa utitovya kuziŵa kuti chinanga tingakumana ndi suzgu wuli, gulu la ŵanthu aku Yehova lazamupona pa chisuzgu chikulu. (Chiv. 7:9, 14) Kuruska vosi, tikondwa chifukwa pa Aramagedoni Yehova wazamulongo kuti ndiyu pe wakwenere kuwusa ndipuso wazamutoweska zina laki lakupaturika.—Sumu 83:18; Ezek. 38:23.

KUMBI YESU WAYERUZGENGI ZUKWANJI MBERERI NDI MBUZI?

10. Kumbi kali taziŵanga kuti kweruzga ŵanthu kuja mbereri pamwenga mbuzi kukwamba zukwanji?

¹⁰ Tiyeni tikambiskani so nyengu yo chigaŵa chinyaki cha uchimi waku Yesu chazamufiskikiya, cho chikonkhoska ntharika ya kweruzgika kwa mbereri ndi mbuzi. (Mat. 25:31-46) Kali tagomezganga kuti kweruzga ŵanthu kuja mbereri pamwenga mbuzi kungwamba m’chaka cha 1914 kuluta kunthazi. Tinguwona kuti wo akananga uthenga wa Ufumu ndipuso wo angufwa chisuzgu chikulu chechendayambi, ŵenga mu gulu la mbuzi, kung’anamuwa kuti atingi aziyuskikengi cha.

11. Nchifukwa wuli tingakamba kuti Yesu wakwamba mu 1914 cha kweruzga ŵanthu kuja mbereri pamwenga mbuzi?

¹¹ M’chaka cha 1995, mu Chigongwi cha Alinda cha Chichewa, akulikonkhoska so lemba la Mateyu 25:31, lo likamba kuti: “Penipo wakazanga Mwana wa munthu mu unkhankhu waki, ndi angelu wosi pamoza nayu, penipo wajariyengi pasi pa chitengu cha unkhankhu waki.” Vilongo kuti Yesu wakuja Fumu ya Ufumu waku Chiuta mu 1914, kweni wanguja cha “pa chitengu cha unkhankhu waki” nge Mweruzgi wa ‘mitundu yosi.’ (Mat. 25:32; yeruzgiyani ndi Danyele 7:13.) Ntharika yo yikamba za mbereri ndi mbuzi, yitimukonkhoska Yesu nge Mweruzgi. (Ŵerengani Mateyu 25:31-34, 41, 46.) Chifukwa chakuti Yesu wenga wechendapaskiki mazaza ngakuti waje Mweruzgi mu 1914, ndikuti kweruzga ŵanthu kuja mbereri pamwenga mbuzi kungwamba m’chaka chenichi cha. c Nanga ndi zukwanji po Yesu wayambengi kweruzga?

12. (a) Kumbi Yesu wazamuja zukwanji Mweruzgi wa mitundu yosi ya ŵanthu? (b) Ndi vinthu nivi vo vikonkhoskeka pa lemba la Mateyu 24:30, 31 ndi Mateyu 25:31-33, 46?

 ¹² Uchimi waku Yesu wakukwaskana ndi mazuŵa ngakumaliya ulongo kuti Yesu wazamuja Mweruzgi wa mitundu yosi asani visopa vaboza vazibwangandulika. Nge mo vakonkhoskeke mundimi 8, vinthu vinyaki vo vazamuchitika pa nyengu yeniyo, vikulembeka pa Mateyu 24:30, 31. Asani musanda mavesi ngenanga, muwonengi kuti Yesu wakamba vinthu vakuyanana ndi vo wakukamba mu ntharika ya mbereri ndi mbuzi. Mwakuyeruzgiyapu, Mwana wa munthu watuza mu unkhankhu waki, ndi angelu wosi pamoza nayu; ndipu ngakawunjikikanga paurongo paki mafuku ndi mitundu yosi; wo ayeruzgika nge mbereri ‘atumphuska mitu yawu’ chifukwa alindizga “umoyu wamuyaya.” d Wo ayeruzgika nge mbuzi, atijipuma ko ‘atenje,’ chifukwa alindizga “chilanga chamuyaya.”—Mat. 25:31-33, 46.

13. (a) Kumbi Yesu wazamuyeruzga zukwanji ŵanthu kuja mbereri pamwenga mbuzi? (b) Kumbi kuziŵa uchimi wenuwu kutiwovyengi kuti tiyiwonengi wuli nchitu yakupharazga?

 ¹³ Kumbi sonu tingakamba kuti tasambiranji? Tasambira kuti Yesu wazamuyeruzga ŵanthu kuja mbereri pamwenga mbuzi po waziyengi pa nyengu ya chisuzgu chikulu. Pa Aramagedoni po mphakumaliya pa chisuzgu chikulu, ŵanthu wosi wo azamuja mbuzi ‘azamulangika’ kwamuyaya kung’anamuwa kuti azamubayika. Kumbi kuziŵa uchimi wenuwu kutiwovyengi kuti tiyiwonengi wuli nchitu yakupharazga? Kutiwovyengi kuziŵa kuti kupharazga nkhwakukhumbika ukongwa. Kwambiya sonu mpaka po chisuzgu chikulu chiyambiyengi, peche nyengu yakuti ŵanthu asinthi maŵanaŵanu ngawu kuti ayendi mu nthowa yifinyu “yakurongozge ku umoyu.” (Mat. 7:13, 14) Vingachitika kuti ŵanthu angawoneka nge mbereri pamwenga mbuzi chifukwa cha vakuchita vawu kweni titenere kukumbuka kuti pa chisuzgu chikulu ndipu ŵanthu azamuyeruzgika  kuja mbereri pamwenga mbuzi. Mwaviyo, te ndi chifukwa chakuvwika chakulutirizgiya kupharazga uthenga wa Ufumu, kuyesesa kuchita vo tingafiska kuti tipharazgiyi ŵanthu anandi wo angavwisiya ndi kuchitapu kanthu.

KUMBI YESU WAZENGI ZUKWANJI?

14, 15. Ndi fundu zinayi nizi zo zilongo kuti kunthazi Khristu wazengi nge Mweruzgi?

¹⁴ Kumbi vo takambiskana vakukwaskana ndi uchimi waku Yesu, vilongo kuti tikhumbika kusintha vo takambanga, vakukwaskana ndi nyengu yo mauchimi nganyaki ngakukhumbika ukongwa ngafiskikiyengi? Tisaniyengi kwamuka mu uchimi wenuwu. Tiyeni tiwoni mo umukiyengi.

¹⁵ Uchimi waku Yesu wo ukulembeka pa Mateyu 24:29-51 ndipuso 25:1-46, Yesu wakonkhoska vinthu vinyaki vo viyambengi kuchitika mu nyengu ya mazuŵa ngakumaliya ngenanga ndipuso pa chisuzgu chikulu cho chituza. Mu uchimi wenuwu, Yesu wakonkhoskamu fundu 8 zakukwaskana ndi ‘kuza’ kwaki. Pa nkhani ya chisuzgu chikulu, Yesu wangukamba kuti: ‘Mafuku . . . ngawonengi Mwana wa munthu wachiza pa mitambu.’ ‘Mulivi kuziŵa zuŵa mwaku lenilo Ambuyamwi aziyengi.’ ‘Mwana wa munthu wazengi mu ora lenilo mulivi kulunguruka.’ Ndipu mu ntharika yaki ya mbereri ndi mbuzi, Yesu wangukamba kuti: ‘Wakazanga Mwana wa munthu mu unkhankhu waki.’ (Mat. 24:30, 42, 44; 25:31) Fundu zosi zinayi zilongo kuti kunthazi Khristu wazengi nge Mweruzgi. Kumbi malemba nganyaki nganayi tingangasaniya mu uchimi nuwu waku Yesu?

16. Kumbi ndi malemba nanga nganyaki ngo ngakamba za kuza kwaku Yesu?

¹⁶ Pa nkhani ya muŵanda wakugomezgeka ndi wazeru, Yesu wakamba kuti: ‘Ngwa mwaŵi muŵanda yo, mweniyo mbuyaki wachiza wamusaniyengi ngwakuchita viyo.’ Mu ntharika ya mbeta, Yesu wakamba kuti: ‘Ndipu zichiruta kwachigula [mafuta], wanguza mweni-nthengwa yo.’ Ndipu mu ntharika ya matalente, Yesu wakonkhoska kuti: ‘Ndipu pavuli pa nyengu yitali wanguza mweneku wa ŵaŵanda yaŵa.’ Mu ntharika so yeniyi, mweneku wa ŵaŵanda wakamba kuti: ‘Ndati ndaza, mphanyi ndalonde . . . langu.’ (Mat. 24:46; 25:10, 19, 27) Kumbi malemba nganayi ngenanga ngalongo kuti Yesu wazengi zukwanji?

17. Mwakukoliyana ndi mazu ngakuti wachiza ngo nge pa Mateyu 24:46, kumbi kali takambanga kuti Yesu wanguza zukwanji?

 ¹⁷ Nyengu yakuvuli tikukonkhoska m’mabuku ngidu kuti malemba nganayi ngenanga ngalongonga kuti Yesu wanguza mu 1918. Mwakuyeruzgiyapu, wonani mazu ngaku Yesu ngo ngakamba za “muŵanda wamagomekezgeka yo ndi wakuwamu [wazeru, NW].” (Ŵerengani Mateyu 24:45-47.) Kali tagomezganga kuti mazu ngakuti “wachiza” ngo nge muvesi 46 ngang’anamuwanga kuti Yesu wanguza mu 1918 kuziwona asani Akhristu akusankhika ŵenga weche pa ubwezi wakukho ndi Yehova kweni kusankha muŵanda kuti wawoneriyengi vinthu vosi va Mbuyaki, kunguchitika mu 1919. (Mal. 3:1) Tati tasanda so uchimi wenuwu, tawona kuti tikhumbika kusintha mo taziŵiyanga kali pa nkhani ya kufiskika kwa fundu zinyaki za uchimi waku Yesu. Nchifukwa wuli tikamba viyo?

18. Kumbi kusanda uchimi wosi waku Yesu kwatiwovya kuziŵanji pa nkhani ya kuza kwaki?

 ¹⁸ M’lemba la Mateyu 24:46, mavesi ngo nge pavuli pa vesi 46, mwe mazu ngakuti “wazengi.” Mazu ngenanga, ngalongo kuti Yesu wazengi kuzipereka cheruzgu pa chisuzgu chikulu. (Mat. 24:30, 42, 44) Nge mo tawone mu ndimi 12, ‘kuza’ kwaku Yesu ko kuzumbulika pa Mateyu 25:31, kulongo so kuti Yesu wazamupereka cheruzgu kunthazi. Mwaviyo, mphakuvwika kukamba kuti, fundu yo ye pa Mateyu 24:46, 47, yo yikamba kuti pa nyengu yo Yesu waziyengi, wazamupaska muŵanda wamagomekezgeka ndi wakuwamu udindu wakuti wawoneriyengi vinthu vaki vosi, yazamufiskika so kunthazi pa chisuzgu chikulu. Kukamba uneneska, kusanda uchimi wosi waku Yesu kutiwovyengi kuvwisa umampha kuti fundu 8 zo zikamba za kuza kwaki, zilongo kuti iyu wazamupereka cheruzgu kunthazi pa chisuzgu chikulu.

19. Kumbi ndi fundu nizi zo zasintha zo takambiskana, ndipu ndi mafumbu nanga ngo ngazamumukika mu nkhani zakulondopu?

¹⁹ Kumbi tasambiranji kutuliya pa fundu zosi zo zakonkhoskeka? Kukwamba kwa nkhani iyi, tafumba mafumbu ngatatu. Takambiskana kuti chisuzgu chikulu chikwamba mu 1914 cha, kweni chiyambengi pa nyengu yo wupu wa U.N. wazamuyukiya Babiloni Mukulu. Pavuli paki, tawona chifukwa cho tikambiya kuti Yesu wakwamba mu 1914 cha kweruzga ŵanthu kuja mbereri pamwenga mbuzi kweni mpha chisuzgu chikulu. Pakumaliya, tawona kuti ndi chaka cha 1919 cha, po Yesu wanguziya kuzipaska udindu muŵanda wakugomezgeka wakuwonere vinthu vaki vosi kweni wazakumupaska kunthazi pa chisuzgu chikulu. Mwaviyo, mafumbu ngatatu ngo ngafumbika mu ndimi yachiŵi, ngakamba za nyengu yakuyanana, vosi vazamuchitika pa chisuzgu chikulu. Kumbi kusintha kwenuku kutikwaskengi wuli pa mo taziŵiyanga ntharika ya muŵanda wakugomezgeka? Nanga kutiwovyengi kuti tiziŵenji pa nkhani ya ntharika zinyaki zaku Yesu zo zifiskika m’mazuŵa nganu ngakumaliya? Mafumbu ngakukhumbika ngenanga ngamukikengi mu nkhani zakulondopu.

MAZU NGAKUMALIYA: (Asani muŵerenga ndimi, mazu yanga ngaŵerengeki nge mazu nga mumphata.)

[Mazu ngam’mphata]

[Mafumbu]

[Chithuzi papeji 9]

[Tchati papeji 10, 11]

VO VAZAMUCHITIKA PA CHISUZGU CHIKULU KWENISO PAVULI PAKI

VO VIFISKIKENGI

MAZUŴA NGAKUMALIYA

VO VINGUFISKIKA MU NYENGU YA AKUTUMIKA VO VIYANANA NDI VO VIFISKIKENGI

Wupu wa United Nations (“chinthu chaunyakazi”) wazamuyukiya Visopa va Chikhristu (“malu ngakupaturika”) ndipuso vinyaki vosi vaboza (Chiv. 17:16-18)

KUBWANGANDULIKA KWA VISOPA VABOZA

Asilikali achiroma (“chinthu chaunyakazi”) anguyukiya Yerusalemu ndi nyumba yakusopiyamu (“malu ngakupaturika”)

‘Chinthu cha unyakazi . . . chama mu malu ngakupaturika.’ (Mat. 24:15, 16 NW) (Wonani  pandimi 6)

Yehova ‘wazamufupikiska’ nyengu yo visopa vaboza vazamuyukilika;

Ŵanthu aku Chiuta azamutaskika

Asilikali achiroma angufupikiska nyengu, Akhristu a ku Yerusalemu ndi Yuda anguthaŵa

‘Chifukwa cha akusankhika ngafupiskikengi mazuŵa ngo’ (Mat. 24:22)

(Wonani  pandimi 7)

UTALI WA NYENGU

UZIŴIKA CHA

Yesu wazamuyeruzga ŵanthu a mitundu yosi kuja mbereri pamwenga mbuzi (Mat. 25:31-46)

(Wonani  pandimi 12, 13)

VO VAZAMUCHITIKA

“Sosonukweni pavuli pa suzgu ya mazuŵa ngo . . .” (Mat. 24:29-31)

(Wonani  pandimi 8)

Yesu wazamupaska muŵanda wakugomezgeka udindu wakuti wawoneriyengi “vaki vosi” (Mat. 24:46, 47)

(Wonani  pandimi 18)

Kubwangandulika kwa mitundu (Chiv. 16:16)

ARAMAGEDONI

Kubwangandulika kwa Yerusalemu

KHRISTU WATAMBA KUWUSA VYAKA 1,000

[Chithuzi]

[Chithuzi]

[Chithuzi]

[Chithuzi papeji 13]

Kwambiya sonu mpaka po chisuzgu chikulu chiyambiyengi, peche nyengu yakuti ŵanthu asinthi maŵanaŵanu ngawu (Wonani  pandimi 13)