NDERENI KUFUPI NDI CHIUTA
Awonani Ndipanga Vinthu Vosi Kuti Viŵi Vifya
Kumbi mukhumba kuja ndi umoyu wamampha kweniso wambula kumala limoza ndi banja linu? Kumbi mukhumbisiska kuja m’charu chambula matenda, masuzgu ndi nyifwa? Yanga ndi maŵanaŵanu ŵaka cha. Charu chifya chaurunji chijengeku nadi pambula kuswera yapa chifukwa ndivu Yehova Chiuta wakhumba. Awonani mo wazamufiskiya khumbu laki nge mo wakonkhoske pa Chivumbuzi 21:3-5.—Ŵerengani.
““[Chiuta] waleskengeku sozi losi ku masu ngawu.” (Chivumbuzi 21:4) Kumbi ndi masozi wuli ngo wazamuleska? Iyu wazamuleska masozi nga likondwa pamwenga ngo ngavikiliya masu ngidu cha kweni masozi ngo ngatuza chifukwa cha masuzgu ndipuso chitima. Chiuta wazamuchitiska kuti masu ngazileki kutuwa masozi cha kweni wazamutuzgapu masuzgu ndi vinthu vo vichitiska chitima, vo viliriska ŵanthu.
“Nyifwa kuti yikaŵangapu so cha.” (Chivumbuzi 21:4) Kumbi pe chinthu chinyaki cho chiliriska ŵanthu kuluska nyifwa? Yehova wazamutuzgapu nyifwa kuti ŵanthu akuvwiya azileki kusuzgika. Kumbi wazamuchita wuli? Iyu wazamutuzgapu ubudi wo tikuhara kwaku Adamu, wo ndi suzgu yikulu yo yizisa nyifwa. (Ŵaroma 5:12) Yehova, wazamuchitiska ŵanthu akuvwiya kuja akufikapu chifukwa cha sembi yaku Yesu ya uwombozi. a Pavuli paki, murwani wakumaliya, nyifwa, ‘wazamuwayulika.’ (1 Ŵakorinte 15:26) Ŵanthu akugomezgeka, azamuja kwamuyaya ndipuso kwambula kutama nge mo Chiuta wakhumbiyanga pakwamba.
“Chingana mburwirwi.” (Chivumbuzi 21:4) Kumbi mburwirwi wuli wo kwazamuŵavi? Kusuzgika maŵanaŵanu ndi kuŵaŵa kwa liŵavu, vo viŵapu chifukwa cha ubudi kweniso kuleka kufikapu ndipu vichitiska kuti ŵanthu anandi asuzgikengi, kwazamuŵavi.
Umoyu wambula nyifwa, kuliya ndi kupweteka waŵandika. Mungafumba kuti, ‘nunkhu?’ ‘Kumbi Chiuta walayizga kuti tamuja kuchanya?’ Awa. Chifukwa chakuti, layizgu lenili litamba ndi mazu ngakuti ‘hema lo laku Chiuta le mukati mu ŵanthu,’ ŵanthu aja pacharu chapasi. (Chivumbuzi 21:3) Chachiŵi, likamba charu cho “nyifwa kuti yikaŵangapu so cha,” charu cho kali kwenga nyifwa kweni yazamuŵaku so cha. Kuchanya kulivi nyifwa kweni panu pasi ndipu paja nyifwa kwa nyengu yitali. Mwaviyo, layizgu laku Chiuta lo likamba za umoyu wamampha lazamufiskika penipanu pasi.
Chiuta wazamuleska masozi ngo ngatuza chifukwa cha masuzgu ndi vinthu vakuchitiska chitima
Yehova wakhumba kuti tigomezgengi vo walayizga kuti kwazamuja charu chifya cha urunji. Wati wakonkhoska vitumbiku vo vituza, wangusimikizgiya kufiskika kwa layizgu laki mwakukamba kuti: ‘Awonani [ndipanga, NW] vinthu vosi kuti viŵi vifya.’ Iyu wangulutirizga kuti: “Mazu yanga ngamagomekezgeka ndi ngakuneneska.” (Chivumbuzi 21:5) Mwaviyo, sambirani vinandi va mo yimwi ndi a m’banja linu mungachitiya kuti muje mu gulu la ateŵeti aku Chiuta, wo azamuwona kufiskika kwa layizgu laki.
Machaputala ngo Mungaŵerenga
1 Petro 1-5; 2 Petro 1-3; 1 Yohane 1-5; 2 Yohane 1-13; 3 Yohane 1-14; Yuda 1-25–Chivumbuzi 1-22
a Kuti muziŵi vinandi pankhani ya sembi ya uwombozi waku Khristu, wonani mutu 5, m’buku lakuti, Kumbi Bayibolo Lisambizanji Weniukongwa? lakupharazgika ndi Akaboni aku Yehova.
