Chinthu chimoza chakukondwesa ukongwa cho Akaboni aku Yehova alindizanga chaka chinu, nkhutuzgika kwa vidiyo ya Chigaŵa Chakwamba cha Nkhani Yakukwaskana ndi Uteŵeti Waku Yesu. Ŵanthu mamiliyoni akuwonere vidiyo yeniyi. Ndipu ntchigaŵa chakwamba pa vigaŵa 18! Kumbi ndi vinthu wuli vo abali ndi azichi achita kuti afiski kujambula mavidiyo ngenanga, nanga tingaŵawovya wuli?

 Ku nthambi ya ku Australasia, Ko vigaŵa venivi va mavidiyo vijambulikiya, ŵanthu pafufupi 50 mpaka 80 atuŵa akunozgeka po chigaŵa chechosi chijambulika. a Chakurya chamusana,chamazulu,ndipuso takurya tausaza viperekeka kwaku weyosi. Mwaviyo chakurya anozge limu. Esther yo wateŵete mu Dipatimenti Yakuwonere Vakurya wangukonkhoska kuti; “Tigula vakurya kutuliya ku ŵanthu akupambanapambana ndi chilatu chakuti tiguli vakurya vamampha kweniso pa mitengu yamampha. “Titesesa kusintha mo tibikiya chakurya kuti tileki kunanga ndalama zinandi.” Zuŵa lelosi tigwiriskiya ntchitu ndalama zaku america zakukwana 4 dolazi pa munthu yumoza.

 Tikhumbika kuwapasa chakurya pe cha abali wosi yaŵa, kweni akhumbika so kuŵavikiliya. Kuŵavikiliya ku vinthu wuli? Ku Australia kuja lumwi lanthazi kweniso lambula mitambu ndipu kufunda ,mwaviyo abali akhumbika kuvikililika ku kotcha kwanthazi. Kuti aleki kupwetekeka ndi chifundizi, abali wo atovya pakujambula angujintha ma tenti kweniso angupanga malu ngakuti ŵanthu apumuliyengepu kamanavi.Yiwu awonesesanga kuti vinthu vakujivikiliya ku lumwi nge mafuta, ma amburela kweniso maji vilipu. Kevin yo wateŵete ndi timu ya vinthu vakuvwisiya kweniso mavidiyo wangukamba kuti: “Anandi mwa abali ndi azichi wo agwira ntchitu yeniyi mbateweti anyengu zosi apa beteli akwesa kwende. Yiwu agwira ntchitu zenizi kweniso zinyaki mwakukondwa kweniso mwakujiyuyuwa. Mwaviyo tatingi tifiskengi cha kugwira ntchitu yeniyi kwambula chovyu cha abali ndi azichi.”

 Vakusuzga kuti vigaŵa vinyaki vijambulikiyi pa ofesi ya nthambi, chinanga ndi mukati mu situdiyo. Asani veviyo, vidiyo yitachijambulikiya kubwaru. Kuti afiski kujambula vigaŵa va mu Bayibolu va mu nyengu yakali, akhumbika kuluta kutali kuvigaŵa vakumuzi ko kulivi magesi,misewu ya thala kweniso ko kulivi nyumba zakumangika mwasonu. Pakuluta pakhumbikanga kupakila vakuvwara kweniso vinthu vosi vo amugwiriskiya ntchitu ndi kuvipinga mwakuvikililika kuchifika ko amujambuliya. Wechendayambi kujambula,mubali yo wateŵete nge wakovya wakukumanisa wakhumbika kusimikiziya kuti; jinileta ,maji ngakumwa ngamampha kweniso vimbuzi vilipu. Abali wo ajambula kweniso ŵanthu wosi wo ajambulika afikiya mu nyumba za abali ndi azichi akwenuku.

 Kujambula vidiyo kungananga ndalama zinandi, kungato nyengu yitali kweniso kungaja kwakuvukisa kwaku weyosi. Mwaviyo, mu 2023, Wupu Wakulongozga unguzomereza kuti ndalama zakukwana 2.5-miliyoni ziwovyi pakugula masikirini ngakulungakulu ngakujambuliya mavidiyo. Nthowa yeniyi yilongo mavidiyo ngakuwoneka umampha ukongwa ngo ngawoneka nge kuti awonesa kweni po mphanyengu yakujambula, venivi vikoliyana ndi chilatu chakuti chinanga mphabwaru po pe ukweru ukulu vidiyo yiwonekengi umampha. Venivi vitovya kuti tileki kuluta kumalu ngakutali kuchijambula vidiyo. Darren wamukomiti ya nthambi yaku Australasia wangukamba kuti: “nthowa yakugwiriskiya ntchitu masikilini yitovya abali wo ajambula kweniso wo ajambulika kuti alekengi kuvuka ukongwa ,kupwetekeka masu ndipuso angawereza kujambula maulendu nganandi. Mwakuyeruzgiyapu, asani tijambuliya pabwaru, tikhumbika kujambula lumwi panyengu yo lisere kwa maminute ngamanavi ukongwa lechendasere. Kweni asani tigwirisiya ntchitu masikilini yanga, tingajambula kuti lumwi lisere maulendu ngananandi ŵaka po takhumbiya.”

 Abali ndi azichi anandi apenjeka kuti ajambuliki mu vigaŵa va vidiyo yakuti Uthenga wamampha. Kumbi abali ndi azichi wenaŵa atuvwa wuli pa vosi vo vichitika pakuŵaphwere?

 Amber, yo wayendanga mtunda wa 700 kilomitazi(435 mi) kutuwa kunyumba kwawu ku Melbourne, wangukamba kuti: “Kutuwa po ndingusikiya waka ndegi, abali ndi azichi apa Beteli angundiphwere umampha ukongwa. Abali wo ajaliya pa beteli andidananga kuchirya nawu chakurya pamwenga kuchimwa tea. Kumalu so ko ajambuliyanga, abali ndi azichi andiwovyanga kuti ndije wakufwatuka kweniso kuti ndijivwengi kuti nditanjika. Mwaviyo,ndingulonde vitumbiku vinandi paulendu uwu. Ndajivwanga nge kuti ndajiperekapu so cha!”

 Derek yo wateŵete mu dipatimeti ya yakupanga mavidiyo wangukamba kuti: “Madipatiment ngakupambanapambana ngangutiwovya kutuwa pakwamba. Ndiwonga ukongwa kuja limoza ndi abali ndi azichi wo angupereka nyengu yawu,nthazi zawu kweniso vinthu vawu vakupambanapambana pa ntchitu yeniyi. Abali ndi azichi ŵenaŵa atovyana,mbalisungu kweniso akhumbisiska kufiska uteŵeti wenuwu. Mwaviyo Yehova watiŵatumbika kweniso nasi watititumbika. Ndiziŵa kuti Iyu waŵanaŵaniya mo ntchitu yeniyi yamaliya pe cha kweni waŵanaŵaniya so vo ntchitu yeniyi yafiska.”

 Tiwonga ukongwa vakupereka vinu vo mupereka kusazgiyapu vo viperekeka kuziya pa intaneti pa donate.mt1130.com.