Chiuta wati walenga munthulumi ndi munthukazi wakwamba, wanguŵapanga kuja nthengwa. Iyu wakwambisa nthengwa pakati pa munthulumi ndi munthukazi kuti ngaje malu ngamampha ukongwa kwaku yiwu kweniso ku ŵana ŵawu.—Genezesi 1:27, 28; 2:18.

 Chiuta wakhumba kuti ŵanthu akutolana akondwengi. (Nthanthi 5:18) Mu Bayibolu, mwe ulongozgi ndipuso fundu zo zingawovya ŵanthu akutolana kuti vinthu viŵayendiyengi umampha.

Mu nkhani iyi tikambiskanengi mafumbu yanga:

•  Kumbi ndi fundu zaku Chiuta nizi zakukwaskana ndi nthengwa?

•  Nanga Bayibolu likambanji pa nkhani ya kupatukana pamwenga kumalisa nthengwa?

•  Kumbi ŵanthu akutorana akhumbika kuchilembesa nthengwa yawu ku boma kuti yije yakuzomerezeka kwaku Chiuta?

•  Kumbi Bayibolu lilongo kuti munthulumi ndi munthukazi ŵe ndi udindu wuli?

•  Kumbi Chiuta wakhumba kuti ŵanthu akutorana ajengi ndi ŵana mazuŵa nganu?

•  Kumbi Bayibolu lingawovya wuli nthengwa yangu?

•  Mavesi nga mu Bayibolu ngakukwaskana ndi nthengwa

 Kutuwa pakwamba, Chiuta wangwambisa nthengwa kuti munthulumi ndi munthukazi yumoza aje akukoliyana. (Genezesi 2:24) Chiuta wazomereza cha mta, kutorana kwa anthulumi pe pamwenga anthukazi pe pamwenga ŵanthu ambula kutorana kuti ajaliyengi limoza. (1 Akorinto 6:9; 1 Atesalonika 4:3) Yesu wangusambiza akusambira ŵaki kuti avwiyengi ulongozgi waku Chiuta pa nkhani ya nthengwa.—Mariko 10:6-8.

 Chiuta wakhumba cha kuti nthengwa yimalengi. Asani munthulumi ndi munthukazi atorana, yiwu alayizgana kuti ajengi akugomezgeka ku yumoza ndi munyaki ndipuso kuti ajengi limoza kwa umoyu wawu wosi. Chiuta wakhaza kuti yiwu afiskengi vo akulayizga.—Mariko 10:9.

 Pe nyengu zinyaki zo munthulumi ndi muwolu waki atenere kupatukana, nge asani yumoza wakhumba kuchiphwere ŵanthu a mubanja laki pa vinthu vamabuchibuchi. Kweni Bayibolu lichiska cha kuti ŵanthu akutorana apatukani chifukwa cha masuzgu nganyaki nga mubanja. Mumalu mwaki lichiska ŵanthu akutorana kuti akambiskanengi asani apambana maŵanaŵanu.—1 Akorinto 7:10.

 Chigololu ndichu chifukwa chija cha mu Malemba chakumalisiya nthengwa. (Mateyu 19:9) Kweni, asani munthulumi pamwenga munthukazi wasankha kupatukana pamwenga kulekana ndi mulumu pamwenga muwoli waki chifukwa cha vifukwa vinyaki kupatuwapu chigololu, Bayibolu lizomereza cha kuti munthu yo wachiti chibwezi ndi munthu munyaki pamwenga kuyirwa so.—Mateyu 5:32; 1 Akorinto 7:11.

 Chiuta wakhumba kuti Akhristu avwiyengi arara amazaza pa nkhani yakukwaskana ndi nthengwa. (Tito 3:1) Asani ŵanthu akutorana alembesa nthengwa yawu ku boma, alongo kuti atumbika arara amazaza ndipuso ulongozgi waku Chiuta wakuti nthengwa ndi nkhani ya umoyu wosi. a

•   Udindu wo ŵanthu akutorana ŵenawu. Munthulumi ndi munthukazi akhumbika kulongorana chanju ndipuso ulemu. (Aefeso 5:33) Akhumbika kuŵanaŵaniya vakukhumba va munyawu pa nkhani yakugonana ndipu atenere kuchita venivi mwachanju ndipuso akhwechengi chechosi cho chingaŵachitiska kuti aje ambula kugomezgeka. (1 Akorinto 7:3; Aheberi 13:4) Asani ŵe ndi ŵana, munthulumi ndi awolu waki, akhumbika kovyana pakulera ŵana ŵawu.—Nthanthi 6:20.

   Bayibolu likonkhoska vinandi cha pa nkhani ya mo ŵanthu akutorana atenere kuchitiya ndi ntchitu yakulembeka kweniso ntchitu zapakhomu. Yiwu angasankha vo vingawovya banja lawu kuti liyendengi umampha.

•   Udindu wa munthulumi. Bayibolu likamba kuti “munthulumi ndiyu mutu wa muwolu waki.” (Aefeso 5:23) Iyu ndi mutu wabanja chifukwa chakuti wakhumbika kulongozga banja laki ndipuso kupanga vakusankha vo vingawovya muwolu waki ndipuso ŵana ŵaki.

   Iyu wakhumbika kuwonesesa kuti yiwu ŵe ndi vo akhumbikiya kuti aje ndi liŵavu lanthazi, akondwengi ndipuso kuti aje paubwezi wakukho ndi Chiuta. (1 Timote 5:8) Iyu wawonga mijadu yamampha yo muwolu waki wenayu, wagwiriya limoza ntchitu ndi muwolu waki, waŵanaŵaniya mwakuphwere mo muwolu waki wavwiya ndipuso watumbika maŵanaŵanu nga muwolu waki pa nkhani yakusankha vakuchita. (Nthanthi 31:11, 28) Bayibolu likamba kuti munthulumi wakhumbika kuphwere banja laki mwachanju.—Akolose 3:19.

•   Udindu wa munthukazi. Bayibolu likamba kuti “munthukazi nayu wamutumbikengi ukongwa mulumu waki.” (Aefeso 5:33) Chiuta wakondwa asani munthukazi watumbika mulumu waki.

   Udindu waki nkhovya mulumu waki pakupanga vakusankha vamampha ndipuso mo wangalongozge banja laki. (Genezesi 2:18) Bayibolu likamba vamampha vakukwaskana ndi munthukazi yo wafiska udindu waki munthengwa.—Nthanthi 31:10.

 Awa. Kali, Chiuta wangulamula ŵanthu anyaki wo amusopanga kuti aje ndi ŵana. (Genezesi 1:28; 9:1) Kweni dangu ili ligwira ntchitu cha kwa Akhristu. Yesu wanguŵalamulapu cha akusambira ŵaki kuti aje ndi ŵana. Chinanga mbakusambira aku Yesu akwambiriya angukambapu cha kuti ŵanthu akutorana ajengi ndi ŵana. Ŵanthu akutorana angasankha ŵija kuja ndi ŵana pamwenga cha.

 Mu Bayibolu mwe fundu zo zingawovya mabanja kuja ndi nthengwa yamampha. Fundu za mu Bayibolu zingawovya so ŵanthu akutorana kuti akhwechi pamwenga amalani ndi masuzgu.

 Fundu za mu Bayibolu zingawovya ŵanthu akutorana kuti . . .

•   ayanjanengi.—1 Akorinto 13:4-7; Akolose 3:14.

•   amalisengi mphindanu.—1 Akorinto 10:24.

•   avwisiyanengi.—Yakobe 1:19.

•   atumbikanengi.—Aroma 12:10.

•   agowokiyanengi.—1 Peturo 4:8.

•   ajengi akugomezgeka.—Mariko 10:9.

•   azikirengi.—Aefeso 4:2, 3.

•   agwiriyengi ntchitu limoza.—Wakutawula 4:9.

•   akhoresengi nthengwa yawu.—Sumu Yaku Solomoni 8:7.