KUKONKHOSKA MAVESI NGA MU BAYIBOLU

Salimo 23:4—“Chinanga Kuti Nditenda Mudambu la Mdima wa Nyifwa”

JULANI

“Chinanga kuti nditenda mudambu la mdima ukulu, nditopa chechosi cha, pakuti yimwi, mwe nani; nthonga yinu ndi nduku yinu vitindichiska.”—Salimo 23:4, Bayibolu la Charu Chifya.

“Nanga nditenda mu dambu la mudima wa nyifwa; kuti ndopenge uheni cha; chifukwa imwe mwe pamoza nane; nthonga yinu ndi ndodo yinu vitindisangaruska.“—Salimo 23:4, King James Version.

Vo Lemba la Salimo 23:4 a Ling’anamuwa

Chiuta wavikiliya kweniso kuphwere ŵanthu wo atimusopa chinanga kuti angakumana ndi masuzgu pa umoyu wawu. Pakukhumba kulongo mo Chiuta waphwere ŵanthu wo atimusopa, lemba ili likamba va muliska yo waphwere mbereri zaki. b Asani ŵanthu wo asopa Chiuta akumana ndi masuzgu ngakulu ngo pa lemba ili angayeruzgiya ndi mdima ukulu pamwenga kuti mdima wa nyifwa, yiwu atopa cha. Mumalu mwaki atijivwa kuti mbakuvikilirika chifukwa vija nge kuti Chiuta we kujanja lawu lamaryi.

Mu nyengu yakali, mliska wagwiriskiyanga ntchitu nthonga pamwenga nduku pakuvikiliya mbereri ku vinyama vakofya. Ndipu nthonga yo wagwiriskiyanga ntchitu, kanandi yaŵanga yitali kweniso yakugoŵeka kunthazi kuti walongozgi mbereri pamwenga kuziguziya ku malu ngakuvikilirika. Mwakuyanana waka, Yehova Chiuta we nge Mliska wachanju ndipu wavikiriya kweniso kulongozga ŵanthu wo atimusopa. Chinanga kuti angakumana ndi masuzgu ngakulu wuli pa umoyu wawu, kweni Yehova watiŵaphwere mu nthowa zakupambanapambana. Mwakuyeruzgiyapu:

Watiŵasambiza kweniso kuŵapembuzga kuziya mu Mazu ngaki, Bayibolu.—Aroma 15:4.
Wavwisiya mapempheru ngawu ndipu watiŵapaska chimangu cha mumtima.—Afilipi 4:6, 7.
Watiŵachiska mwakugwiriskiya ntchitu Akhristu anyawu.—Aheberi 10:24, 25.
Watiŵalayizga vinthu vamampha vamunthazi, pa nyengu yo wazamutuzgapu vinthu vosi viheni vo akumana navu pasonu panu.—Salimo 37:29; Chivumbuzi 21:3-5.

Nkhani ya pa Salimo 23:4

Lemba la Salimo 23 lingulembeka ndi Davidi yo wenga mliska wa viŵetu pa nyengu yo wenga mnyamata ndipu pati pajumpha nyengu wanguja fumu ya mtundu wa Ayisirayeli. (1 Samuyeli 17:34, 35; 2 Samuyeli 7:8) Salimo ili litamba ndi mazu ngo ngakonkhoska kuti Yehova ndi Mliska yo walongozga, waryiska ndipuso kusisipuwa wo atimusopa nge mo mliska wa viŵetu wachitiya ndi mbereri.—Salimo 23:1-3.

Pa Salimo 23:4, Davidi wangugwiriskiya ntchitu mazu ngakuti ‘yimwi’ mumalu mwa mazu ngakuti ‘iyu.’ Wanguchita venivi kuti walongo kuti Chiuta wavikiriya nadi wo atimusopa. Mazu ngo Davidi wangugwiriskiya ntchitu pa lemba ili ngalongo kuti wenga pa ubwezi wamampha ndi Yehova. Ndipu Davidi waziŵanga kuti Chiuta watimuphwere kweniso waziŵanga mayeseru ngo iyu wakumananga nangu. Venivi vingumuwovya Davidi kuti waleki kopa chinthu chechosi chakofya.

Pa Salimo 23, vesi 5 ndi 6, mumalu mwakukamba va muliska ndipuso mbereri, Davidi wangukamba vakukwaskana ndi mweneku wanyumba ndipuso mulendu. Nge mweneku wanyumba yo walonde umampha alendu, Yehova wangulonde Davidi nge mulendu wakutumbikika. Ndipu chinanga mbarwani aku Davidi nawu, ŵengavi nthazi zakutondekesa Chiuta kuti waleki kumuphwere Davidi. Kukumaliya kwa salimo ili, Davidi wangulongo kuti wenga ndi chigomezgu kuti Chiuta wamulongongi umampha waki kweniso chanju kwa umoyu waki wosi.

Mazu ngo ngakugwiriskikiya ntchitu pa Salimo 23 ngakonkhoska mo Chiuta walongore kuti watanja kweniso kuphwere ŵanthu wo atimusopa.—1 Peturo 2:25.

a Mu Mabayibolu nganyaki, lenili ndi Salimo 22. Chinanga kuti pe Masalimo ngakukwana 150, kweni mu Mabayibolu nganyaki, Masalimo yanga ngakulembeka mwakukoliyana ndi ndondomeku ya malemba nga Chiheberi ngo ngakulembeka ndi Amasoreti. Ndipu mu Mabayibolu nganyaki ngakulembeka mwakukoliyana ndi ndondomeku ya malemba nga Chigiriki nga Septuagint. Lenili ndi buku la malemba nga Chiheberi ngo ngangumalizika kulembeka mu vyaka va mu ma 100 B.C.E.

b Chiuta, yo zina laki ndi Yehova, kanandi Bayibolu litimuzumbuwa kuti ndi Muliska walisungu. Ŵanthu wo atimusopa akambika kuti ndi mbereri ndipu athemba Iyu kuti waŵavikiliyi kweniso kuŵawovya.—Salimo 100:3; Yesaya 40:10, 11; Yeremiya 31:10; Ezekiyeli 34:11-16.