Amuchuwa anthulumi atanja kumba mwakuwerezawereza kweniso mwambula kuvwika umampha. Ndipu kumba kwa muchuwa munthulumi kuvwika mbwenu chinanga vingaja kuti watumba pagulu la amuchuwa anyaki wo nawu so atumba. Akaswiri a va amuchuwa ku Japan, akusaniya kuti chisisi chikugona pakuti amuchuwa anthulumi wo ajaliya dera limoza atumba so mwakuyanana pakudana amuchuwa anthukazi.

 Ŵanaŵaniyani ivi: Amuchuwa anthulumi atumba kuti akopi amuchuwa anthukazi. Kumba kwenuku kutambiya mukati mwa khosi, ndipu kuvwika ukongwa asani kwafika pa minofu yo yitundumukiya kubwalu kwa khosi asani muchuwa yo watumba. Amuchuwa atumba mwakupambanapambana. Mwakuyeruzgiyapu mwakukoliyana ndi mtundu waki angavwika nge kumba kwa pitu, kabanthira, huta ya galimotu, chibaka pamwenga nge chinkhononu cha munthu.

 Kumbi amuchuwa anthulumi apambana wuli ndi amuchuwa anthulumi anyawu a mtundu umoza pamwenga a mtundu unyaki asani atumba? Akaswiri akusaniya kuti mumalu mwakumba ŵaka bweka wosi pamoza, amuchuwa wo ŵe pamoza atumbiya limoza mwakuchita kulondiyana. Venivi vitovya kuti aleki kupanga chiwawa pa nyengu yimoza, ndipu muchuwa weyosi wavwika umampha asani watumba. Vitovya so kuti aleki kunanga nthazi zinandi. Kusazgiyapu yapa, kumba mwandondomeku kwenuku kutovya kuti muchuwa weyosi waziŵengi po wakhumbika dankha kuma, asani watumba kuti amuchuwa anyaki nawu avwiki umampha.

 Akaswiri akuwona mo vipangizu va mazuŵa nganu vigwiriya ntchitu pakukambiskana, akusaniya nthowa yo titovya kuti data yeyosi yigwirengi ntchitu yaki, pa nyengu yaki. Venivi vawovya kuti data yeyosi yigwirengi ntchitu yakwenere kweniso chipangizu chimala nthazi zinandi cha za magesi.

 Kumbi yimwi muwona wuli? Kumbi kuti amuchuwa ambengi mwandondomeku viyo, vichitika ŵaka vija? Pamwenga walipu yo wakuvipanga?