Kabunga Keendelezya ninkamu niini yamaKristu basimide mubukombi bapa malayilile kuli Bakamboni baJehova bali munyika yoonse. Mulimu wabo uli muzipanzi zibili:

•   Mbubalangania mulimu wakupa malayilile aamuBbayibbele kwiinda mumabbuku, kumiswaangano azikolo zyaBakamboni baJehova.—Luka 12:42.

•   Mbubalanganya mulimu wamunyika yoonse waBakamboni baJehova kubikkilizya amulimu wesu wakukambawuka, mbuzibelesegwa zintu zisangwa amakani aakusala baalumi beelela kuti bapegwe mikuli.

 Kabunga Keendelezya katobela chikozyano ‘chabaapostolo alimwi abaalu bamu Jerusalemu’ bamumwaanda wamunyaka wakusaanguna, bakali kusala mumakani aayandikana kapati aakali kujatikizya mbungano yamaKristu yoonse. (Milimo 15:2) Mbuli baalumi basyomeka aabo, bamuKabunga Keendelezya teebasololi bambunga yesu pe. Batobela malayilile aamuBbaibbele, kabazi kuti Jehova Leza wakasala Jesu Kristu kuti abe Silutwe wambungano.—1 Bakorinto 11:3; Baefeso 5:23.

 Kuzwa muJanuary 2015, bali muKabunga Keendelezya kuli Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson aDavid Splane. Babelekela kumawofesi eesu mapati kuBrooklyn, New York, U.S.A.

 BamuKabunga Keendelezya bakapanga makkomiti aali 6 aalangania milimu iisiyene-siyene alubo umwi awumwi ulangania kkomiti iimwi naakuti kwiinda waawo.

•   Kkomiti Yabeendelezi: Ilangania makani aamilawu amakani aamapenzi aalichitikila, makani aajatikizya kupenzegwa kwaBakamboni baJehova akaambo kanzibasyoma mumakani aaswaanizya bukombi, amakani aachibukilambuta aajatikizya Bakamboni baJehova.

•   Kkomiti Iilangania Babelesi: Ilangania nzibayandikana bamumpuli yaBbeteli.

•   Kkomiti Iilangania Zipupululwa: Ilangania mulimu wakupulinta akutumizya mabbuku aapandulula zyamuBbayibbele akuyaka masena aakukombela, mawofesi aabasanduluzi amitabi.

•   Kkomiti Yamulimu: Ilangania mulimu wesu wakukambawuka “makani mabotu aa Bwami.”—Matayo 24:14.

•   Kkomiti Yakuyiisya: Ilangania malayilile aambuchibambwa chakulya chamubukombi chipegwa kwiinda mumiswaangano, zikolo amapulogilamu aajatikizya zyakulekkooda.

•   Kkomiti Yakulemba: Ilangania malayilile aambuchibambwa chakulya chamubukombi chipegwa kwiinda mumabbuku aakapupululwa azili aawebbusayiti yesu alubo njiilangania mulimu wakusandulula.

 Kuyungizya amulimu ngubachita kwiinda mumakkomiti aaya, bamuKabunga Keendelezya balaswaanana mviki amviki kabalanga-langa ziyandikana mumbunga. Mumiswaangano eeyi, bamuKabunga Keendelezya baambuula atala azyaambwa aaMagwalo alubo batobela nzibazulwidwa aamuuya waLeza uusalala kuchitila kuti bazuminane chintu chimwi.—Milimo 15:25.

 Aaba maKristu basyomeka bagwasilizya makkomiti aaKabunga Keendelezya. (1 Bakorinto 4:2) Bakwesu aaba balaabusongo aluzibo mumilimu iilanganisigwa aakkomiti mubabelekela ambabo balajanika mumiswaangano njibachita mviki amviki bamuKabunga Keendelezya. Nikuba kuti nga tabatoli lubazu mukusala zintu, basikugwasilizya bapa lulayo lugwasya atala aamwi makani ngibazi, kubelesya nzibasala bamumakkomiti akubona eezyo zyasalwa mbuzigwasya. Alubo balakonzya kupegwa mulimu wakuswaya bakwesu mumasena aasiyene-siyene munyika yoonse naakuti kupegwa nkani kumiswaangano yamunyaka naakuti chiindi basichikolo nibamaninsya kuChikolo chaGileyadi.