Tekkinoloji Nga Ilalunyongania Biyeni Lukwatano Lwanu?
Kuti tekkinoloji yabelesegwa munzila iilikabotu ilakonzya kusimya lukwatano lwanu. Muchikozyano, ilakonzya kukugwasya kuti waambuule aamuntu ngukwetenaawe chiindi nimutalaamwi.
Pesi bamwi bali mulukwatano tabayibelesyi kabotu pe tekkinoloji aalubo ngazyazoopa kuti . . .
-
batajani chiindi chakubaamwi.
-
bakkale kabali bbizi azintu zyakumulimu nikuba kabali aang’anda.
-
bayeeyelane naakuti batasyomani.
NZWEELEDE KUZIBA
KUJANA CHIINDI CHAKUBAAMWI
Umwi mwaalumi uutegwa Michael wakaamba kuti: “Nikuba kuti chimwi chiindi ngatuli mung’anda iimwi amwanakazi wangu pesi kwaamba choonzyo ngatatulaamwi pe. Nga ulibbizi afooni yakwe alubo ngawaamba kuti, ‘Lino nindichijana chiindi chakujata fooni.’” Mwaalumi uutegwa Jonathan wakaamba kuti, “bantu bachita zintu zili boobu ngabalaamwi pesi kwaamba choonzyo ngakwaba mbuli kuti umwi uli kuli iimwi nyika.”
NZWEELEDE KUYEEYA: Ufoonenana aabantu naakuti kusendelana aabo mameseji kwaziindi zyiingi biyeni chiindi nulikwaambuula aamuntu ngukwetenaawe?—BAEFESO 5:33.
MULIMU
Bamwi bantu babeleka milimu iibatobela kumaanda aabo zyakuti ngabeelede kuvwiila mafooni aamulimu naakuti kusandula mameseji mansiku. Nikuba kuti bamwi milimu yabo ilabazumizya kuti bajane chiindi chiingi chakubaamwi ampuli zyabo pesi ngabachita zintu zyakumulimu nikuba kabali aang’anda. Umwi mwaalumi uutegwa Lee wakaamba kuti: “Nkuyumu loko kuleka kuvwiila fooni yakumulimu naakuti kuleka kusandula meseji aachiindi nchindeelede kubaamwi amwanakazi wangu.” Mwanakazi uutegwa Joy wakaamba kuti: “Ndibelekela aang’anda. Eezi zyaamba kuti ndikkala kandili aamulimu. Nkinkaako, ziyanda kuti ndibeleke changuzu kuti ndizibe chiindi nchindeelede kubeleka akuti ndizibe chiindi chakubaamwi amulumaangu.”
NZWEELEDE KUYEEYA: Ulaswiilisisya na chiindi muntu ngukwetenaawe nalikwaambuula aanduwe?—LUKA 8:18.
KUSYOMEKA
Bantu biingi bali mulukwatano bakaamba kuti bakalwana aamuntu ngubakwetenaawe akaambo kakuti ngwakwetenaawe wakamusisila zintu nzyaakabikka aanzila zyakwaambuuzyania. Alubo bamwi bali mulukwatano bakaamba kuti bakabikka zintu aanzila zyakwaambuuzyania kabatayandi pe kuti muntu ngubakwetenaawe azizibe.
Bantu biingi baamba kuti nzila zyakwaambuuzyania zilakonzya kupa kuti bantu bali mulukwatano banjile mumapenzi. Alubo zilakonzya kupa kuti umwi uuli mulukwatano awonane aamuntu ngwatakwetenaawe. Bamwi maloya bakaamba kuti, bantu biingi mazubaano balikulekana akaambo kazintu nzibachita aanzila zyakwaambuuzyania.
NZWEELEDE KUYEEYA: Ulamusisila na muntu ngukwetenaawe zintu nzwaalikwaambuula awumwi muntu ngumusiyene zizo?—TUSIMPI 4:23.
NZUKONZYA KUCHITA
BIKKA ZINTU ZIYANDIKANA MUBUSENA BWAKUSAANGUNA
Muntu uutayandi kulya chakulya chiyaka mubili ulakonzya kujatwa malwazi. Munzila iikozyenie, muntu uutayandi kujana chiindi chakubaamwi amuntu ngwakwetenaawe ulakonzya kupa kuti lukwatano lwabo lutabotezyi.—Baefeso 5:28, 29.
MALAYILILE AAMUBBAYIBBELE: “Musinizye zintu ziyandika kapati.”—BAFILIPI 1:10.
Wambuula aamuntu ngukweetenaawe, mubone mbumukonzya kubelesya zintu zili munsi alubo mulakonzya kulemba zimwi nzimubona kuti zilakonzya kumugwasya kuti tekkinoloji itanyonganyi lukwatano lwanu.
-
Atujane chiindi chakulyaamwi buzuba abuzuba
-
Atujane chiindi chakubaamwi mpawo twaabikke kule mafooni eesu
-
Atusale buzuba bwakuti tukalikondelezye katulaamwi
-
Tweelede kuzima mafooni mansiku mpawo twaabikke kule ankutoona
-
Atujane chiindi chakwaambuulaamwi buzuba abuzuba kwamaminiti aali 15 biyo katutajisi mafooni
-
Tweelede kusala chiindi nchitweelede kuleka kubelesya intaneti buzuba abuzuba
