Kulisumpula kulakonzya kupa kuti tusaluule bamwi. Muntu uulisumpula ulibona kayandikana loko kwiinda bamwi. Ulibona kasumpukide alubo ubalangililaansi bantu basiyene anguwe. Muntu woonse ulakonzya kuchegwa akakole aaka. Bbuku litegwa Encyclopædia Britannica lyakaamba kuti: “Misyobo myiingi ibona kuti zintu zibalya, nzibazwaata, nzibachita, nzibasyoma, nzibayanda azimwi zilisumpukide kwiinda zyabamwi.” Kujana twaatantamuka biyeni maboneno aaya atali kabotu?

“Amucite zintu zyoonse cakulicesya akubona bamwi kuti balamwiinda.”—BAFILIPI 2:3.

Zyaambaanzi? Kuti tuleke kulisumpula, tweelede kulibombya. Kulibombya kutugwasya kubona kuti bamwi bantu balatwiinda kuli zimwi zintu. Taakwe musyobo wabantu uchita zintu zilikabotu luzutu alubo ukonzya kuchita zintu zyoonse.

Bona chikozyano chaStefan. Wakakomenena munyika yakali kweendelezegwa amaCommunist pesi wakazunda penzi lyakusaluula  bantu bakali kukkala munyika zyakatali kweendelezegwa amaCommunist. Wakati: “Ndakabona kuti kubona bamwi kuti balakwiinda kulagwasya kuti uzunde penzi lyakusaluula. Teezyoonse pe nzindizi. Ndilakonzya kwiiya zimwi zintu kuli bamwi bantu.”

Libone munzila iilikabotu alubo uzibe kuti kuli zimwi zintu nzutakonzyi pe. Zumina kuti kuli zintu nzutakonzyi bamwi nzibakonzya. Utayeeyi kuti bantu boonse bawumwi musyobo balaabuntu butali kabotu bufanana.

Muchiindi chakumuyeeyela zintu zitali kabotu muntu uuzwa kuli umwi musyobo libuzye kuti:

• ‘Buntu mbundizonda aamuntu ooyu mbubi na naakuti nkusiyana luzutu?’

• ‘Kujana muntu ooyu wabona zintu zibi na mulindime?’

• ‘Nziili zintu muntu ooyu nzyakonzya nzinditakonzyi pe?’

Kuti wasandula mibuzyo eeyi chakusyomeka uyoozunda penzi lyakusaluula alubo uyoobona kuti muntu ooyo kuli zintu zilikabotu nzyachita.