4 | Bbayibbili Lilaamalayilile Aagwasya
NZILYAAMBA BBAYIBBILI: “Magwalo woonse . . . alagwasya.”—2 TIMOTI 3:16.
Eezi Zyaamba Kuti
Nikuba kuti Bbayibbili teebbuku lyabusilisi, pesi lilaamalayilile aagwasya. Malayilile aaya alakonzya kugwasya muntu ulaapenzi lyakukataazikana. Atulange zimwi zikozyano.
Zitugwasya Biyeni?
“Bantu batachiswi tabayandi musilisi pe, pesi bachiswa mbabo bayanda musilisi.”—MATEYO 9:12.
Bbayibbili litusungwaazya kuti chimwi chiindi tulakonzya kuyanduula busilisi. Bantu biingi bakagwasigwa kwiinda mukuziba zyiingi atala abulwazi bwabo akwiinka kumadokotela.
‘Ku-ekisesayiza kulagwasya.’—1 TIMOTI 4:8, makani aamunsi.
Kubelesya chiindi amanguzu eesu kuti tuchite zintu zisimya mibili yesu kulakonzya kutugwasya kuti tutakataazikani loko. Eezi ziswaanizya ku-ekisesayiza chiindi achiindi, kulya chakulya chiyaka mubili akujana chiindi chiingi chakoona.
“Moyo uukkomene musamu mubotu uuponya, pele kupengana mumizeezo kupa kuti muntu amaninwe nguzu.”—TUSIMPI 17:22.
Kubala zipanzi zyamuBbayibbili zisungwaazya akulibikkila zipeekezyo nzitukonzya kuzuzikizya, kulakonzya kutugwasya kuti tukkale katuli kubotelwa. Kubikkila maanu kuzintu zibotu akusyoma kuti zintu zizoobota kunembo, kutugwasya kuti tulisimye kupenzi lyakukataazikana mumizeezo.
“Aabo balibombya mbabajisi busongo.”—TUSIMPI 11:2.
Kulakonzeka kuti kuli zimwi zintu nzutakonzyi kuchita awulikke, nkinkaako weelede kuzumina kugwasigwa abamwi. Beenzinyokwe abamumpuli balilipedelede kukugwasya pesi tabazi nzibeelede kuchita. Babuzye zintu nzuyanda kuti bakuchitile. Utalangilili kuti bakuchitile zintu zyiingi loko alubo balumbe azintu nzibakuchitila.
Mbubalikugwasigwa Aabbayibbili Bantu Baswaanana Aapenzi Lyakukataazikana
“Ndakamvwa kuti kuli chintu chitali kabotu mumubili wangu nkinkaako, ndakayinka kuyoobona dokotela. Mpawo wakandibuzya bulwazi mbundakali kuchiswa. Eezi zyakandigwasya kuti nditambule chiimo changu mpawo ndiyanduule busilisi bukonzya kundigwasya.”—Nicole, a uuchiswa bulwazi bwa-bipolar.
“Ndakabona kuti kubala Bbayibbili buzuba-abuzuba amwanakazi wangu kulikundigwasya kuti ndiyeeye zintu zilikabotu. Amwi mazuba ninditali kabotu ngandabala vesi iindisika aamoyo alubo induumbulizya.”—Peter ulaapenzi lyakukataazikana.
“Zyakali kundiyumina kubuzya bantu atala abulwazi bwangu nkaambo ndakali abweeme. Pesi umwi mweenzuma wakali kundimvwisisisya alubo wakali aluzyalo. Wakandigwasya kuti ndilimvwe kabotu akuti ndilimvwe kuti tandili andilikke pe.”—Ji-yoo ulaapenzi lyakulya zyiindilide.
“Bbayibbili lyakandigwasya kuti ndibe amaboneno aali kabotu atala amulimu akulyookezya. Busongo buli muBbayibbili bwakandigwasya kuti ndikonzye kulwana penzi lyakukataazikana.”—Timothy ulaapenzi litegwa obsessive-compulsive disorder.
a Amwi mazina akachinchwa.
