• Kusalwa aaLeza. “Mebo lwangu, ndabikka mwami wangu . . . Ndilakupa masi kuti abe lukono lwako alimwi anyika yoonse kuti ibe lubono lwako.”—Intembauzyo 2:6, 8.

• Kuba waluzubo lwaMwaami Davida. “Twazyalilwa mwana, twapegwa mwana musankwa . . . Bupati bwabweendelezi bwakwe alimwi aluumuno tazikamani pe, aacuuno cabwami ca Davida alimwi amubwami bwakwe kutegwa abusitikizye.”—Isaya 9:6, 7.

• Kuzyalilwa kuBbetelehemu. “O Betelehemu . . . , mulinduwe muyoozwa yooyo uuyoondibeda muleli . . . Bupati bwakwe buyoosika kumagolelo aanyika.”—Mika 5:2, 4.

• Kukakwa aabantu akujayigwa. “Wakali kunyansyigwa, alimwi twakali kumubona kuti unyina mpindu. . . Wakayaswa akaambo kansotoko zyesu; wakapwaigwa akaambo kazinyonyoono zyesu.”—Isaya 53:3, 5.

• Kubusigwa akusumpulwa. “Tokandisiyi mu Cuumbwe. Tokalekeli uusyomeka wako kuti abone cilindi. . . . Kujanza lyako lyalulyo kuli lukkomano mane kukabe kutamani.”—Intembauzyo 16:10, 11.

Jesu Kristu nguwe uuyelelwa aabupanduluzi oobu. Mungelo wakabuzya Mariya, bayina aaJesu kuti: “Leza uyoomupa cuuno cabwami ca Davida usyi, . . . alimwi Bwami bwakwe tabukamani.”—Luka 1:31-33.

Jesu taakwe naakayendelezya aanyika. Pesi uyooyendelezya bantu kujulu kali Mwaami waBwaami bwaLeza. Niinzi chipa kuti Jesu ayelele kuba Mwaami? Atulange-lange zintu nzyaakachita naakali aanyika.

•   Jesu wakali aandaba abantu. Jesu wakagwasya baalumi abanakazi, bana abapati kazitakwe ndaba ambubakakomezegwa. (Matayo 9:36; Marko 10:16) Chiindi mwaalumi wakali aachinsenda naakamubuzya kuti: “Ikuti koyanda, ulakonzya kundisalazya,” Jesu wakamufwida luzyalo alubo wakamuponia.—Marko 1:40-42.

• Jesu wakatuyiisya mbutukonzya kubotezya Leza. Wakati: “Tamukonzyi kubelekela Leza alimwi a Lubono.” Wakalayilila bantu kuti bachitile bamwi zintu nzibayanda kuti ambabo bachitilwe. Kuyungizya waawo, Jesu wakaamba kuti Leza tabikkili maanu kuzintu nzituchita luzutu pesi akuzintu nzituyeeya ambutulimvwa. Nkinkaako, kuti tukonzye kubotezya Leza tweelede kubikkila maanu muzintu nzituyeeya ambutulimvwa. (Matayo 5:28; 6:24; 7:12) Naakali kwaambuula atala ankani yakubotelwa, Jesu wakaamba kuti tweelede kuziba nzyayanda Leza akuzichita.—Luka 11:28.

• Jesu wakali kuyiisya luyando mumajwi amumichito. Majwi aaJesu anzyaakali kuchita zyakali kubasika aamoyo bantu bakali kumuswiilila. “Makamu aabantu akagambwa kapati ambwaakali kuyiisya, wakali kubayiisya mbuli muntu uujisi nguzu zya Leza.” (Matayo 7:28, 29) Wakabayiisya kuti: “Amuzumanane kuyanda basinkondonyoko.” Nikuba naakali aachisamu chakupenzezya wakakomba kati: “Taata, kobalekelela nkaambo tabazyi ncobacita.”—Matayo 5:44; Luka 23:34.

Zilaantanganana kuti Jesu uleelela kuti abe Mweendelezi wanyika yoonse nkaambo uli aaluzyalo. Pesi uzoosaanguna lili kweendelezya?