1-2. (a) Niinzi nzibeelede kuyeeya maKkristu batali mulukwatano kabatanasaanguna kuyandana? (b) “Kuyandana” nkutulikwiiya muchiiyo eechi nkuchitaanzi? (Langa “Bupanduluzi Bwamabala.”)

 ULANGILILA kuzookwata na naakuti kukwatwa? Nikuba kuti lukwatano teendulo luyandikana loko kuti bantu babotelwe, pesi maKkristu biingi batali mulukwatano bapati abaniini, balangilila kuti limwi zuba bazoojana muntu wakukwatanaawe. Nikuba oobo, kutanayandana aamuntu, weelede kuba aabweenzinyokwe busimide aJehova, lizibe kabotu alubo weelede kukonzya kuyanduula zintu zyakumubili zitazoomugwasye mulukwatano. a (1 Kor. 7:36) Kuti wachita oobo uzoobotelwa mulukwatano

² Nikuba oobo, teekuuba pe kuti ujane muntu uulikabotu wakukwatanaawe. (Tus. 31:10) Alubo, nikuba kuti wajana muntu nguyanda kuziba kabotu, nkuyumu kuti usaangune kuyandanaawe. b Muchiiyo eechi, tulabona zintu zikonzya kugwasya maKkristu batali mulukwatano mbubakonzya kujana muntu uulikabotu wakukwatanaawe akuti basaangune kuyandana. Alubo, tulabona bamwi bamumbungano mbubakonzya kubagwasya bantu bayanda kukwatana.

MBUKONZYA KUJANA MUNTU UULIKABOTU WAKUKWATANAAWE

3. Niinzi nzyayelede kulanga-langa muKkristu uutali mulukwatano chiindi nayanda kusala muntu wakukwatanaawe?

³ Kuti kuyanda kuba mulukwatano, kulikabotu kuti usaangune  kuziba buntu mbwayelede kubaabo muntu nguyanda kamutanayandana pe. Kuti teewachita oobo, ulakonzya kusiya muntu weelela nduwe mpawo uyandane aamuntu nguteendelani aawe pe. Kuti kuyanduula muntu wakukwatanaawe, yanduula aakati kamaKkristu babbabbatizidwe. (1 Kor. 7:39) Pesi, eezi tazyaambi kuti weelede kuyandana aakufumbwa muKkristu akaambo kakuti uulibbabbatizidwe. Nkinkaako, libuzye mibuzyo yakuti: ‘Ndikanzide kuchitaanzi mubuumi? Mbuubuli buntu mbundiyanda kuti abe aabo muntu ngundiyanda kuzookwatanaawe? Zintu nzindilangilila zilakonzeka na?’

4. Niinzi bamwi bakwesu abachizi batali mulukwatano nzibaswaanizya munkombyo zyabo?

⁴ Kuti kuyanda kuba mulukwatano, kweelede kuti wakayikombela nkani eeyi. (Flp. 4:6) Jehova takuyandwiidi pe muntu wakukwatanaawe. Pesi, ulaandaba azintu nzuyanda ambulimvwa alubo ulakonzya kukugwasya kuti ujane muntu uulikabotu wakukwatanaawe. Nkinkaako, yinkilila kunembo kumubuzya nzuyanda ambulimvwa. (Int. 62:8) Kombela kuti ube aamoyo mulamfu abusongo. (Jak. 1:5) Mukwesu uutanakwata uutegwa John c waku-United States wakaamba zintu nzyaswaanizya munkombyo zyakwe, wakati: “Nga ndabuzya Jehova buntu mbundiyanda kuti muntu ngundiyanda kuzookwata abe aabo. Nga ndakombela kuti ndijane myeenya yakuti ndizoobonane amuntu uuli aabuntu oobo. Alubo nga ndakumbila Jehova kuti andigwasye kuti ndibelekele kuba aabuntu butazoope kuti ndizoobe mulumi uulikabotu.” Muchizi uutanakwatwa uutegwa Tanya wakuSri Lanka wakaamba kuti: “Chiindi nindiyanduula mukwesu wakuzookwatanaawe, nga ndakumbila Jehova kuti andigwasye kuti ndikkale kandisyomeka, ndibe aamaboneno aalikabotu akuti kandibotelwa.” Nikuba kuti teewafwambaana kumujana mukwesu naakuti muchizi wakukwatanaawe, Jehova usyomezya kuti unookugwasya  kuti ujane zintu zyakumubili akuti ubotelwe alubo unookutondeezya luyando.—Int. 55:22.

5. Nkuukuli maKkristu batali mulukwatano nkubakonzya kubonana aabakwesu abachizi bayanda Jehova? (1 Bakkorinte 15:58) (Langa chifanikisyo.)

⁵ Bbayibbili litusungwaazya kuti tube “aazyiingi zyakuchita mumulimu waMwaami.” (Bala 1 Bakkorinte 15:58.) Kuti wakkala kuli aazyiingi zyakuchita mumulimu waJehova akujana chiindi chakuba aabakwesu abachizi basiyene-siyene, ulasungwaazigwa akusungwaazya bamwi alubo ulajana myeenya yakubonana aabamwi batali mulukwatano bali mbuli nduwe bayanda kubelekela Jehova. Alubo kuti wabeleka changuzu kuti uchite zintu zibotezya Jehova, unoobotelwa chachoonzyo mubuumi.

6. Niinzi nzyayelede kuyeeya muKkristu uutanakwata naakuti utanakwatwa chiindi nayanduula muntu wakukwatanaawe?

⁶ Ngaya makani aanchenjezyo: Utalijayi biya pe kuyanduula muntu wakukwatanaawe. (Flp. 1:10) Kubotelwa kwachoonzyo, takuyeeme aakuti uli mulukwatano na naakuti pe. Pesi kuyeeme aabweenzinyokwe mbulaabo aJehova. (Mt. 5:3) Alubo kuti kutanakwata naakuti kukwatwa, ulaalwaangunuko lwiingi lwakuti uyungizye mulimu wako wakukambawuka. (1 Kor. 7:​32, 33) Chibelesye kabotu chiindi chako lino. Umwi muchizi uutegwa Jessica waku-United States wakakwatwa kali waamba kusisya minyaka iili 40, wakaamba kuti, “Kanditanakwatwa, ndakalijisikini mumulimu wakukambawuka alubo eezi zyakandigwasya kuti ndikkutisikane nikuba kuti ndakali kuyanda kukwatwa.”

LIPE CHIINDI CHAKUMWIIYA

7. Nkamboonzi nikuli kabotu kuti ulipe chiindi chakuti umuzibe kabotu muntu kutanamubuzya kuti ulamuyanda? (Tusimpi 13:16)

⁷ Kutegwani kuti wamumenena mate umwi mukwesu naakuti muchizi mpawo wabonaanga uleelela kuti muzookwatane? Weelede kuchijaanina kumubuzya na kuti ulamuyanda? Bbayibbili lyaamba kuti muntu musongo usaanguna kuba aaluzibo katanabweza ntaamu. (Bala Tusimpi 13:16.) Nkinkaako, mbusongo kuti walipa chiindi chakwiiya muntu ooyo kutanamubuzya kuti ulamuyanda. Aschwin wakuNetherlands wakaamba kuti: “Moyo ulafwambaana kuuma kuti wabona musimbi pesi ulafwambaana koola. Nkinkaako, kuti walipa chiindi chakumuziba kabotu, zilakugwasya kuti utachijaanini kumubuzya pe kuti ulamuyanda, akaambo kakuti nga tawuli kutumwa aanzila njulikumvwaayo iifwambaana kumana. Chiindi nulikweezya kumuziba kabotu muntu nguuyanda, ulakonzya kuzoobona kuti tamweendelani pe.

8. Niinzi nzyakonzya kuchita muKkristu uutanaba mulukwatano chiindi nayezya kumuziba kabotu muntu ngwayanda kuzookwatanaawe? (Langa chifanikisyo.)

⁸ Niinzi nzukonzya kuchita kuti umuzibe kabotu muntu nguyanda kuzookwatanaawe? Kumiswaangano yambungano naakuti chiindi nimulikulikondelezya abakombinyokwe, ulakonzya kubona mbasimide mubukombi, buntu mbwalaabo ambalijata. Umvwanana aabantu bali biyeni alubo uvuzya kwaambuula atalaanzi? (Lk. 6:45) Zipeekezyo zyakwe zileendelana na azipeekezyo zyako? Ulakonzya kubuzya zyiingi kubaalu bamumbungano yakwe naakuti kuli bamwi maKkristu basimide mubukombi bamuzi kabotu. (Tus. 20:18) Ulakonzya kubuzya kuti uli aabuntu bulibiyeni alubo ulaampuwo iili biyeni. (Rut. 2:11) Chiindi nulikweezya kumuziba kabotu, utachiti zintu zikonzya kupa kuti alimvwe kataangunukide pe. Alubo mulemeke, utakkali kumutobelela naakuti kuyanduulisisya kantu koonse nkachita.

9. Ngaali maboneno nguyelede kubaawo kutanabuzya muntu kuti ulamuyanda?

⁹ Weelede kutola chiindi chilamfu biyeni kulikweezya kumuziba kabotu muntu ngumenena mate mpawo nutazoomubuzye kuti ulamuyanda? Kuti wafwambaana kumubuzya kuti ulamuyanda,  muntu ooyo ulakonzya kubona kuti tusaanguni wayeeya pe chiindi nuyanda kusala zimwi zintu. (Tus. 29:20) Alubo, kuti watola chiindi chilamfu loko mpawo muntu nguyanda kali wakaziziba kale kuti ulamuyanda, ulazibona kuti uuli muntu uubalila. (Muk. 11:4) Kutanabuzya muntu kuti ulamuyanda, toyelede kwiinka kuli aamizeezo naakuti kuli aachoonzyo chakuti nguwe ngutazookwatanaawe. Pesi, weelede kwiinka kuli aachoonzyo chakuti walipeda kuba mulukwatano akuti muntu nguyanda kuzookwatanaawe muleendelana.

10. Niinzi nzweelede kuchita kuti wabona kuti umwi muntu ulikukuyanda pesi iwe kutamuyandi pe?

¹⁰ Niinzi nzukonzya kuchita kuti wabona kuti umwi muntu ulikukuyanda? Kuti kutamuyandi, zitondeezye aantanganana kuti tumuyandi pe kwiinda muzintu nzuchita. Ndunya kuti upe kuti umwi muntu abonaanga mukuya kwachiindi muzooyandana kakuli iwe tumuyandi pe.—1 Kor. 10:24; Ef. 4:25.

11. Kuti kuli kuyanda kuyandwiida bbululu wako naakuti mweenzinyokwe muntu wakukwatanaawe, niinzi nzweelede kusaanguna kuyeeyesesya atala anzizyo?

¹¹ Muli zimwi nyika, bazyali naakuti bamwi bachipati basalila babbululu babo bantu bakukwatanaabo. Alubo kuli zimwi nyika, bamumpuli naakuti beenzinyina bamuntu uutanaba mulukwatano balakonzya kumuyandwiida muntu wakukwatanaawe. Kuzwa waawo, nga babamba kuti bantu aabo bazoobonane kuchitila kuti bazoobone kuti baleendelana na. Kuti wakumbilwa kuti uyandwiide uumwi muntu musimbi naakuti mulombe, yanduula muntu ngwayendelanaawe. Kuti wamujana, yaanduula zyiingi atala abuntu bwakwe akuti usimide biyeni mubukombi. Kuba aabweenzuma busimide aJehova kuyandikana loko kwiinda mali, lwiiyo naakuti kuzibikana. Pesi sikuyandwiidwa nguwe weelede kuzoolisalila kuti ulayanda na kukwatana aamuntu ooyo.—Gal. 6:5.

MBUKONZYA KUSAANGUNA KUYANDANA AAMUNTU

12. Kuti kuli kuyanda umwi muntu, niinzi nzweelede kuchita kuti azizibe kuti uli kumuyanda?

¹² Kuti kuyanda umwi muntu, niinzi nzweelede kuchita kuti azizibe kuti ulamuyanda? d Ulakonzya kubamba kuti uzoomubuzye kamubwenene naakuti ulakonzya kubelesya fooni. Muzwide aantanganana kuti ulamuyanda. (1 Kor. 14:9) Kuti kakuyandikana, mupe chiindi chakuti ayeeyesesye kuti ulayanda na anguwe.  (Tus. 15:28) Kuti wakaka, zitambule kuti nzizyo zinooli zyachitika.

13. Niinzi nzukonzya kuchita kuti umwi muntu wakubuzya kuti ulakuyanda? (Bakkolose 4:6)

¹³ Niinzi nzukonzya kuchita kuti umwi muntu wakubuzya kuti ulakuyanda? Musandule kabotu alubo umulemeke nkaambo nga watondeezya chibindi kuti akubuzye kuti ulakuyanda. (Bala Bakkolose 4:6.) Kuti kuyanda chiindi chakusaanguna kuyeeya atala anzwaabuzigwa, mubuzye. Pesi, utabwezi chiindi chilamfu loko kuli kuyeeya, yezya kufwambaana kumusandula. (Tus. 13:12) Kuti kutamuyandi pe, muzwide aantanganana pesi kuli kumubuzya munzila iilikabotu. Bona umwi mukwesu waku-Austria uutegwa Hans mbaakasandula umwi muchizi naakamubuzya kuti ulamuyanda. Wakati: “Ndakamubuzya nzindakali ndasala, pesi teendakaambuula munzila iipa kuti abe aabweeme. Ndakamubuzya mpawaawo nkaambo teendakali kuyanda pe kuti abonaanga ndakali kumuyanda. Kuzwa waawo, ndakeezya kuti nditaambuuli naakuti kuchita zintu zipa kuti abonaanga ndakazoochincha mizeezo.” Pesi, kuti kumuyanda anduwe muntu uunga wakukkombisya naakuti wakukonkola, mubuzye mpawo mwaambuule atala azintu nzimulangilila kuti muzoochite nimwanooyandana. Mulakonzya kuba aamaboneno aasiyene kuzintu nzimuyanda. Kulakonzeka kuti zilasiyana akaambo kankumwakakomenena naakuti akaambo kazimwi zintu.

BAMWI NGA BALABAGWASYA BIYENI MAKKRISTU BAYANDANA?

14. Nga tulabasungwaazya biyeni maKkristu batali mulukwatano?

¹⁴ Kujana twabagwasya biyeni maKkristu bayandana? Imwi nzila, nkuchenjelela zintu nzitwaambuula. (Ef. 4:29) Tulakonzya kulibuzya mibuzyo eeyi: ‘Ndaambuula zintu zisesya na atala abantu bayandana pesi kazipa kuti babule aakunjila naakuti babonaanga banonoka kukwatana? Kuti ndabona mukwesu amuchizi batakwetene kabali kabalaamwi, nga ndayeeyela kuti balayandana na?’ (1 Tim. 5:13) Alubo, tatweelede kuchita zintu zipa kuti maKkristu batali mulukwatano babonaanga kuli chintu nchibabulide akaambo kakuti tabakwete naakuti tabakwetwe. Hans waambwa musule wakaamba kuti: “Bamwi bakombima nga babuzya kuti, ‘Uchilindideenzi kuti ukwate? Wakomena pela.’ Majwi aali boobu, apa kuti aabo batali mulukwatano balibone kabatagwasyi alubo nga zyapa kuti babonaanga basyaalilide musule akaambo kakutaba mulukwatano.” Tweelede kujana myeenya yakubalumbayizya bakwesu abachizi batali mulukwatano.—1 Tes. 5:11.

15. (a) Kweendelana alugwalo lwa Baroma 15:​2, niinzi nzitweelede kusaanguna kuyeeya katutanayandwiida uumwi muntu wakukwatanaawe? (Langa chifanikisyo.) (b) Ntuutuli twaambo tuyandikana ntwaajana mukavidiyo?

 ¹⁵ Niinzi nzitukonzya kuchita kuti twabonaanga umwi mukwesu awumwi muchizi baleendelana kuti bakwatane? Bbayibbili litubuzya kuti tuyeeye mbubalimvwa bamwi. (Bala Baroma 15:2.) MaKkristu biingi batali mulukwatano, tabayandi pe kuti tubayandwiide muntu wakukwatanaawe alubo tweelede kulemeka zintu nzibayanda. (2 Tes. 3:11) Kulakonzeka kuti bamwi balayanda kuti tubagwasye, pesi tatweelede kubayandwiida pe kuti teebatukumbila. e (Tus. 3:27) Bamwi tabayiyandi pe nzila eeyi yakukumbila kugwasigwa. Umwi muchizi uutanakwatwa wakuGermany uutegwa Lydia wakaamba kuti: “Mulakonzya kutamba mukwesu amuchizi kuti bamujoyine nimuli kulikondelezya. Mpawo mujule myeenya yakuti mukwesu amuchizi ooyo babonane akuti balisalile nzibayanda kuchita.

16. Niinzi nzibeelede kuyeeya maKkristu batali mulukwatano?

¹⁶ Toonse, bali mulukwatano abatali mulukwatano tulakonzya kubotelwa akukkutisikana mubuumi. (Int. 128:1) Kuti kuyanda kukwata naakuti kukwatwa pesi kutanamujana muntu wakukwatanaawe, yinkilila kunembo kubelekela Jehova. Muchizi uutegwa Sin Yi wakuMacao wakaamba kuti: “Chiindi nchulaacho lino kuchili aawulikke nchiche loko kuti wacheezyanisya aachiindi nuzoobotelwa kulaamwi amuntu ngutazookwatanaawe muParadayizi. Nkinkaako, botelwa lino alubo uchibelesye kabotu chiindi chako.” Pesi, niinzi nzukonzya kuchita kuti kuli wakamujana kale muntu uulikabotu wakuti uzookwatanaawe? Muchiiyo chitobela, tuzoolanga-langa zintu zitazoomugwasye kuti muzoosale munzila yabusongo.