1. Niinzi Jesu nzyatazoochite lino-lino?

 TULIKUPONA muchiindi zintu zyiingi nizili kuchincha loko. Lino-lino, Jesu uzoobeteka bantu boonse batanooli aanyika. Jesu wakatubuzya kuti niinzi zitazoochitike munyika katanabeteka bantu. Wakapa basikwiiya bakwe ‘chitondeezyo chakubawo kwakwe achamamanino aabwiime bwazintu.’ (Mt. 24:3) Bupolofita oobu bulembedwe muli Mateyo chaandaano 24 a 25 amuli Makko chaandano 13 a Lukka chaandaano 21.

2. Tulalanga-langaanzi muchiiyo eechi alubo nkamboonzi?

² Jesu wakatupa nchenjezyo iigwasya loko kabelesya zikozyano zitatu. Zikozyano eezi ziswaanizya chikozyano chambelele ampongo, banakalindu bachenjede abafuba-fuba amatalenta. Chikozyano chimwi achimwi chilatugwasya kubona kuti buntu mbwalaabo umwi awumwi wesu mbubo buyoopa kuti abetekwe biyeni. Nitwanoolanga-langa zikozyano eezi, tulajana zyiiyo akubona mbutukonzya kuzibelesya mubuumi bwesu. Tulasaanguna kulanga-langa chikozyano chambelele ampongo.

MBELELE AMPONGO

3. Ndiilili Jesu natazoobeteke bantu?

³ Muchikozyano chambelele ampongo, Jesu wakapandulula mbatazoobeteke bantu bakajana mweenya wakumvwa makani mabotu abaabo bakagwasilizya maKkristu bananikidwe. (Mt. 25:​31-46) Chiindi ‘chamapenzi mapati’ Jesu mpawo mpatazoobetekele bantu aabo Amagedoni kayitanasaanguna. (Mt. 24:21) Mbuli mweembeli mbapambula mbelele kuzwa kumpongo anguwe Jesu uzoopambula aabo bakagwasilizya maKkristu bananikidwe kuli baabo bakatabagwasilizya.

4. Kweendelana a Isaya 11:​3, 4, nkamboonzi nitulachoonzyo chakuti Jesu uzoobeteka bantu munzila iilikabotu? (Langa chifanikisyo chili aachivumbyo.)

 ⁴ Bupolofita bwamuBbayibbili butondeezya kuti Mubetesi wakasalwa aaJehova Jesu uzoobeteka munzila yabululami. (Bala Isaya 11:​3, 4.) Chiindi Jesu nabeteka ulanga nzibachita bantu, nzibayeeya anzibaambuula kuswaanizya ambubabajata maKkristu bananikidwe. (Mt. 12:​36, 37; 25:40) Jesu unoobazi bantu bakagwasilizya maKkristu bananikidwe abakabagwasilizya mumulimu wabo. a Chintu chiyandikana loko chipa kuti muntu aambwe kuti nimbelele nkugwasilizya maKkristu bananikidwe kwiinda mukutola lubazu mumulimu wakukambawuka. Aabo batola lubazu mumulimu wakukambawuka bazoowambwa kuti ‘baliluleme’ alubo banooli aabulangilizi bwakupona “buumi butamani” aanyika. (Mt. 25:46; Chi. 7:​16, 17) Eechi nchilongezyo chipati loko. Kwiinkilila kunembo kabasyomeka muchiindi chamapenzi mapati anaazooyinda, kuzoopa kuti mazina aabo azoolembwe “mubbuku lyabuumi.”—Chi. 20:15.

5. Twiiyaanzi kuchikozyano chambelele ampongo alubo mbaani bagwasigwa aachikozyano eechi?

⁵ Tondeezya kuti ulasyomeka. Chikozyano chaJesu chambelele ampongo chilangene aabantu bali aabulangilizi bwakuzoopona aanyika. Bantu aaba batondeezya kuti bali aalusyomo kwiinda mukugwasilizya maKkristu bananikidwe mumulimu wakukambawuka akuzumina kuzulwidwa aamuzike uusyomeka alubo uuchenjede Jesu ngwaakasala. (Mt. 24:45) Pesi abaabo bali aabulangilizi bwakuya kujulu beelede kwiiswiilizya nchenjezyo eeyi iili atala ambelele ampongo. Nkamboonzi? Nkaambo Jesu ulazibona nzibachita, nzibayeeya anzibaambuula. Ambabo beelede kutondeezya kuti balasyomeka. Jesu wakaambula atala azikozyano zibili zimbi zilangene aamaKkristu bananikidwe. Zikozyano eezi zilembedwe muli Mateyo chaandaano 25. Lino atulange-lange chikozyano chabanakalindu bachenjede abafuba-fuba.

BANAKALINDU BACHENJEDE ABAFUBA-FUBA

6. Banakalindu bali 5 bakatondeezya biyeni kuti balichenjede? (Mateyo 25:​6-10)

⁶ Muchikozyano chabanakalindu, Jesu wakaambuula atala abanakalindu bali 10 bakayinka kuyootambula sikukwata. (Mt. 25:​1-4) Boonse kabali 10 bakali aamakanze aakuti basindikile sikukwata kupobwe lyakwe lyamuchado. Jesu wakaamba kuti bali 5 “bakali bafuba-fuba” alubo bamwi bali 5 “bakalichenjede.” Banakalindu bachenjede bakalilibambilide alubo bakakkala kabalangide. Bakalilibambilide kulindila kusikila sikukwata naakali kuyoosika nikuba kuti wasika mansiku loko. Nkinkaako, bakali aamalambe alaamafuta aakubelesya. Alubo bakali aamafuta aambi aakuyungizya kuchitila kuti malambe atazimi pe kuti sikukwata wanonoka. Bakalilibambilide kuti malambe aabo akkale kaayaka. (Bala Mateyo 25:​6-10.) Chiindi sikukwata naakasika, banakalindu bachenjede bakanjilaamwi anguwe mupobwe lyamuchado. Munzila iikozyenie, maKkristu bananikidwe batondeezya kuti balilibambilide kwiinda mukukkala kabalangide alubo kabasyomeka kusikila Jesu natazoobape bulumbu bwabo bwakweendelezyaamwi anguwe muBwaami bwakwe bwakujulu. b (Chi. 7:​1-3) Niinzi zyakachitika kuli banakalindu bafuba-fuba?

7. Niinzi zyakachitika kuli banakalindu bafuba-fuba alubo nkamboonzi?

⁷ Kusiyana abanakalindu bachenjede, banakalindu bali 5 bafuba-fuba teebakalibambilide pe kutambula sikukwata. Malambe aabo akali  aamba kumana mafuta alubo teebakalikwe mafuta aambi pe aakuyungizya. Nibakamvwa kuti sikukwata waba aafwiifwi kusika, bakayinka kukuula mafuta aambi aakuyungizya. Sikukwata wakasika kabatanaboola pe. Aachiindi eecho, “banakalindu bakalilibambilide bakanjila aasikukwata mupobwe lyamuchado mpawo mulyango wakajalwa.” (Mt. 25:10) Nibakaboola banakalindu bafuba-fuba bakakumbila kunjila, pesi sikukwata wakabasandula kuti: “tandimuzi pe.” (Mt. 25:​11, 12) Banakalindu aabo teebakalibambilide pe kuti basindikile sikukwata. Nchiichili chiiyo nchibajana maKkristu bananikidwe?

8-9. Nchiichili chiiyo nchibayiya maKkristu bananikidwe kuchikozyano chabanakalindu? (Langa chifanikisyo.)

⁸ Tondeezya kuti ulilibambilide akuti ulilangide. Jesu taakali kwaamba kuti kuli tubunga tubili twamaKkristu bananikidwe, kamwi kalilibambilide kusika kumamanino alubo kamwi takalibambilide pe. Pesi wakali kupandulula zintu zikonzya kuchitika kumaKkristu bananikidwe kuti teebalibambila kuti bakkale kabasyomeka kusikila kumamanino. Kuti teebalibambila, balakonzya kusweekelwa chilongezyo chabo chakuzoojana bulumbu kunembo. (Joh. 14:​3, 4) Makani aaya ayandikana loko! Nikuba kuti tuli aabulangilizi bwakupona kujulu naakuti aanyika, pesi toonse tweelede kwiibikkila maanu nchenjezyo eeyi yabanakalindu bali 10. Umwi awumwi wesu weelede kukkala kalibambilide alubo kalangide kusikila kumamanino.—Mt. 24:13.

⁹ Naakazwaakwaambuula atala achikozyano chabanakalindu, Jesu katondeezya mbukuyandikana kukkala katulibambilide akukkala katulangide, wakaambuula atala achikozyano chamatalenta cheendelana aachabanakalindu. Muchikozyano eecho, wakatondeezya mbukuyandikana kubeleka changuzu.

MATALENTA

10. Bazike babili bakatondeezya biyeni kuti balasyomeka? (Mateyo 25:​19-23)

¹⁰ Muchikozyano chamatalenta, Jesu wakaambuula atala abazike babili bakasyomeka kuli simalelaabo amuzike uumwi wakatasyomeka pe. (Mt. 25:​14-18) Bazike aaba babili bakatondeezya  kuti balasyomeka kwiinda mukubeleka changuzu kuti bayungizye matalenta aajulu aamatalenta ngaakabapede simalelaabo. Katanayinka kunyika iili kule, simalelaabo wakabapa matalenta, mali nyingi loko. Bazike basyomeka babili bakabeleka changuzu alubo bakaabelesya munzila yabusongo matalenta ngibakapedwe. Njiili mpindu yakaba? Chiindi simalelaabo naakaboola, bakayungizya matalenta aajulu aamatalenta ngaakabapede. Simalelaabo wakabalumbayizya alubo wakabuzya umwi awumwi wabo kuti “njila mukukondwa kwasimalelaako.” (Bala Mateyo 25:​19-23.) Pesi niinzi zyakachitika kumuzike wachitatu? Wakalitola kuli talenta ndyaakapedwe aasimalelaakwe?

11. Niinzi zyakachitikila muzike “mukandu” alubo nkamboonzi?

¹¹ Muzike wachitatu wakapegwa talenta limwi pesi wakali “mukandu.” Simalelaakwe wakali kulangilila kuti ulalibelesya munzila yabusongo talenta eelyo. Pesi wakalivwikkila munyika. Chiindi simalelaakwe naakaboola, muzike ooyo wakatola talenta ndyaakapedwe kupela taakwe ndyaakayungizya pe. Muzike ooyo wakali aamaboneno aatali kabotu. Kwiinda kuti akumbile kulekelelwa akaambo kakuti taakwe nzyaakachita pe kutalenta ndyaakapedwe aasimalelaakwe, muzike ooyo wakati simalelaakwe muntu “uukataazya.” Simalelaakwe taakabotelwa pe anzyaakachita muzike ooyu. Kuyungizya aali zeezi, wakanyeegwa talenta ndyaakapedwe alubo wakaandwa mung’anda yasimalelaakwe.—Mt. 25:​24, 26-30.

12. Bazike babili basyomeka bayimininani mazubaano?

¹² Bazike babili basyomeka bayiminina maKkristu bananikidwe. Simalelaabo Jesu utamba umwi awumwi wabo kati “njila mukukondwa kwasimalelaako.” Bajana bulumbu bwabo bwakujulu mububuke bwakusaanguna. (Mt. 25:​21, 23; Chi. 20:5b) Kulilimwi bbazu, chikozyano chitali kabotu chamuzike mukandu ninchenjezyo kumaKkristu bananikidwe. Munzilaanzi?

13-14. Nchiichili chiiyo nchibajana maKkristu bananikidwe muchikozyano chamatalenta? (Langa chifanikisyo.)

¹³ Tondeezya kuti ubeleka changuzu akuti ulimusungu. Muchikozyano chamatalenta  amuchikozyano chabanakalindu, Jesu taakali kwaamba kuti maKkristu bananikidwe bazooba bakandu. Pesi wakali kupandulula zintu zyakali kukonzya kuchitika kuti baleka kuba basungu. Bakali kukonzya kukachilwa kuti bape kuti ‘kwiitwa kwabo akusalwa kwabo kube kwachoonzyo’ alubo teebakalinooyelela pe kuti banjile muBwaami bwakujulu.—2 Pet. 1:10.

¹⁴ Chikozyano chabanakalindu achamatalenta, chitondeezya aantanganana kuti maKkristu boonse bananikidwe beelede kulibambila akuti bakkale kabalangide, kumwi kababeleka changuzu alubo kabali basungu. Pesi kuliimwi na nchenjezyo Jesu njaakabuzya maKkristu bananikidwe? Iiyi mpiili! Tulakonzya kujana nchenjezyo eeyo muzintu nzyaakaamba muli Mateyo 24:​40, 41.

NGWANI “UZOOBWEZEGWA”?

15-16. Lugwalo lwa Mateyo 24:​40, 41 lutondeezya biyeni kuti maKkristu bananikidwe beelede kukkala kabalangide?

¹⁵ Katanaamba zikozyano zitatu, Jesu wakapandulula mbubatazoobetekwe kamamanino maKkristu bananikidwe batambulika kulinguwe. Wakaambuula atala abaalumi babili bakali kubeleka mumuunda abanakazi babili bakali kuziya. Muchikozyano chimwi achimwi, kubonekaanga baalumi bakali kuchita mulimu uukozyenie abanakazi babonekaanga bakali kuchita mulimu uukozyenie, pesi Jesu wakaamba kuti “umwi uzoobwezegwa alubo umwi uzoosiigwa.” (Bala Mateyo 24:​40, 41.) Kuzwa waawo, wakabuzya batobeli bakwe kuti: “Amukkale kamulindide, nkaambo tamubuzi pe buzuba Mwaami wanu mbwatazoosike.” (Mt. 24:42) Jesu wakaamba makani aakozyenie naakazwaakwaambuula atala achikozyano chabanakalindu. (Mt. 25:13) Mavesi aaya alaakakunjililana na? Kubonekaanga alanjililana. MaKkristu bananikidwe chachoonzyo alubo basyomeka mbabo kupela ‘bazoobwezegwa’ aaJesu kuti banjile muBwaami bwakujulu—Joh. 14:3.

¹⁶ Tondeezya kuti ulilangide. MaKkristu boonse bananikidwe balikoona mubukombi tabazoobunganisigwaamwi pe abaabo “basalidwe.” (Mt. 24:31) Alubo bakombi baJehova boonse, bali aabulangilizi bwakukkala aanyika naakuti kujulu, beelede kuswiilizya nchenjezyo eeyi kuti bakkale kabalangide akuti bakkale kabasyomeka.

17. Nkamboonzi nituteelede kukataazikana pe kuti Jehova wasala kunanika bamwi mumazubaano ngitulikupona?

¹⁷ Twakamuziba kabotu Jehova alubo tulizi kuti zintu zyoonse nzyachita zililuleme. Tatukataazikani pe kuti Jehova wasala kunanika bamwi bakombima basyomeka muchiindi eechino. c Eezi zituyeezya nzyaakaamba Jesu atala ababelesi bakabeleka kuma 5 goko muchikozyano chakwe chamuunda wamisaansa. (Mt. 20:​1-16) Aabo bakasikila musule bakafozegwa mali iikozyenie anjibakafola aabo bakasaanguna kubeleka. Munzila iikozyenie, tazikwe ndaba pe kuti maKkristu bananikidwe basaanguna kusalwa na naakuti banonoka, pesi boonse bayoojana bulumbu bwabo bukozyenie kuti bakkala kabasyomeka.

SWIILILA NCHENJEZYO

18-19. Twiiyaanzi kuzikozyano nzitwalanga-langa?

¹⁸ Twayiyaanzi? Aabo bali aabulangilizi bwakuzoopona kukabe kutamani aanyika, chikozyano chambelele ampongo chitondeezya mbukuyandikana kuti bakkale kabasyomeka kuli Jehova lino amuchiindi chilikunembo lyamapenzi mapati. Muchiindi eecho, Jesu uyoobeteka bantu basyomeka akupa kuti ‘bazootambule buumi butamani.’—Mt. 25:46.

¹⁹ Alubo twalanga-langa zikozyano zibili zichenjezya  maKkristu bananikidwe. Muchikozyano chabanakalindu bachenjede abafuba-fuba, bali 5 bakatondeezya kuti balichenjede. Bakalilibambilide alubo bakakkala kabali basongo, bakalilibambilide kulindila sikukwata. Pesi banakalindu bafuba-fuba teebakalibambilide pe. Nkinkaako, sikukwata wakabakasya kuti banjile mupobwe lyakwe lyamuchado. Andiswe tweelede kukkala katulibambilide nitulindila kuti Jesu azoonyonyoone bweende bwazintu oobu. Alubo muchikozyano chamatalenta, twalanga-langa atala abazike basyomeka babili bakali kubeleka changuzu alubo bakali basungu. Bakabeleka changuzu kumatalenta ngibakapedwe aasimalelaabo alubo simalelaabo wakabotelwa anzibakachita. Nikuba oobo, simalelaabo wakamukaka muzike mukandu. Twiiyaanzi? Tweelede kukkala katujisikini mumulimu waJehova kusikila kumamanino. Muchikozyano chamamanino, twalanga-langa zikonzya kugwasya maKkristu bananikidwe kuti bakkale kabalangide kuchitila kuti Jesu ‘azoobabweze’ akubapa bulumbu bwabo bwakujulu. MaKkristu bananikidwe bachilangila aameso aasalala chiindi ‘nibayoobunganizigwaamwi’ aJesu kujulu. Niyaakumana nkondo ya-Amagedoni bayooba nabwiinga waJesu kumuchado waMwanaambelele.—2 Tes. 2:1; Chi. 19:9.

20. Niinzi Jehova nzyatazoobachitile aabo baswiilila nchenjezyo zyakwe?

²⁰ Chiindi chakuti Jesu azoobeteke bantu chaba aafwiifwi loko, pesi swebo tatweelede kuyoowa pe. Kuti twakkala katusyomeka Taateesu wakujulu siluyando uzootupa “manguzu aayinda manguzu eesu” kuchitila kuti ‘tuzookonzye . . . kwiimikila kunembo lyaMwanaamuntu.” (2 Kor. 4:7; Lk. 21:36) Tulakonzya kubotezya Taateesu kuti twaswiilila nchenjezyo zili muzikozyano zyaJesu kazitakwe ndaba kuti tuli aabulangilizi bwakuzoopona kujulu na naakuti aanyika. Akaambo kakuti Jehova ulaaluzyalo lupati, mazina eesu ‘anoolembedwe mubbuku’ lyabuumi.—Dan. 12:1; Chi. 3:5.