Bakamboni baJehova bachita milimu yabukombi munyika zyiinda ku200. Pesi nyika zili 35 nzizyo zikonzya kulibbadalila mali yazintu ziyandikana kababelesya mali yakusanga njibajana munyika zyabo. Pesi bakwesu bakkala munyika zifwaba bayijana kuli mali yakubbadalila zintu ziyandikana?

 Kabunga Keendelezya kaBakamboni baJehova kalalanga-langa kuti niinzi nzibayanda Bakamboni munyika yoonse kuchitila kuti bakonzye kuchita milimu yabo yabukombi akukambawuka makani mabotu. Mali iibelesegwa munzila iilikabotu. Kuti umwi mutabi wajana mali nyingi kwiinda zintu nzibayanda, balakonzya kubweza mali yasyaala akwiipa umwi mutabi uutakonzyi pe kujana mali nyingi. Mabambe aaya aleendelana azyakachitwa amaKristu bakusaanguna bakagwasya bamwi “ikutegwa kube kweelana.” (2 Bakorinto 8:14) Bakabelesya zintu zyiingi nzibakalaazyo kuchitila kuti bagwasye bamwi maKristu bakali aazintu ziche.

 Bakwesu bakajana mali kuzwa kuliimwi mitabi bakamvwa biyeni? Muchikozyano, kuTanzania bantu biingi bapona amali iitasiki ku$2 abuzuba. Mali njibakapegwa bakayibelesya kubambulula Ng’anda yaBwaami yambungano yakuMafinga. Bambungano eeyi bakalemba kuti: “Kuzwa nitwakabambulula Ng’anda yesu yaBwaami, naamba yabantu banjila miswaangano yakatanta. Tulayilumba mbunga yaJehova abakombima bamunyika yoonse akaambo kamali yakatugwasya kuti tube ang’anda mbotu yakukombela Jehova.”

 Bamwi bakombima kuSri Lanka bakabula chakulya akaambo kaCOVID-19. Umwi wabo nguImara Fernando amwanaakwe mulombe uutegwa Enosh. Bakapegwa zintu ziyandikana kakubelesegwa mali yakusanga iizwa kuliimwi mitabi. Bakachita kakkaadi mpawo bakakalemba kuti: “Tulabalumba bakwesu akaambo kakututondeezya luyando muchiindi eechi chiyumu. Tulabotelwa kuba aakati kampuli eeyi alubo tulikuzumanana kukombela kuti Jehova abagwasye bakombima boonse kumazubaano aakumamanino.”

 Kazitakwe ndaba ankubakkala bakwesu abachizi balilipedelede kupa bamwi zintu nzibalaazyo. Muchikozyano, Enosh wakachita kabbokesi kaniini kuti kasanga mali kuchitila kuti izoobelesegwe kugwasya mpuli ziyanda lugwasyo. Guadalupe Álvarez anguwe wakatondeezya kuti ulaachiyandisyo chakupa. Ukkala kuliimwi ndawu iili kuMexico alubo kundawu eeyo bantu biingi tababeleki pe. Pesi ulalipeda kusanga nzyakonzya. Wakalemba kuti: “Ndilamulumba Jehova akaambo kabubotu bwakwe aluyando lwakwe lutamani. Ndilizi kuti mali njindisanga iyooswaanizigwa ayabamwi mpawo igwasye bakwesu bayanda lugwasyo.”

 Mitabi iitumizya mali kuli zimwi nyika ilabotelwa kuchita oobo. Anthony Carvalho waKkomiti yaMutabi wakuBrazil wakaamba kuti: “Kwaminyaka myiingi, twakali kuyanda kugwasigwa amali yakusanga iizwa kuli zimwi nyika. Akaambo kakugwasigwa ooko mulimu wesu wakayinkilila kunembo kuBrazil. Pesi lino zintu zyakachincha, twabukonzya kujana mali iikkwana kubbadalila zintu ziyandikana munyika yesu alubo andiswe twakaba aachilongezyo chakugwasya bamwi. Bakwesu bakuBrazil balanga zintu ziyandikana kuti mulimu wakukambawuka uchitwe munyika yoonse mpawo ngabeezya kubona mpubakonzya kugwasya.”

 Bakamboni baJehova nga balabagwasya biyeni bakombinyina bayanda lugwasyo? Kwiinda mukusanga mali mumulimu uuchitwa munyika yoonse kutali kutumizya mali kuliimwi nyika. Tulakonzya kusanga mali eeyo katubelesya kabbokesi kalembedwe kuti “Mulimu Uuchitwa Munyika Yoonse” naakuti katubelesya donate.mt1130.com. Tulazilumba zipo nzimusanga.