Nkaambo Nzi Bakamboni ba Jehova Ncobatasekeleli Kkilisimasi?

AMULIZYE

Mizeezo iitaluzi iidumide

Makani Aakubeja: Ikaambo Bakamboni ba Jehova ncobatasekeleli Kkilisimasi nkakuti tabasyomi muli Jesu.

Makani Aamasimpe: Tuli Banakristo. Tulasyoma kuti lufwutuko luboola buyo kwiinda muli Jesu Kristo.—Milimo 4:12.

Makani Aakubeja: Mwaandaanya mikwasyi kwiinda mukuyiisya banamukwasyi kuti kabatasekeleli Kkilisimasi.

Makani Aamasimpe: Tulaubikkila maano kapati mukwasyi, alimwi tubelesya Bbaibbele kutegwa tube aamikwasyi miyumu.

Makani Aakubeja: Mwiindwa “muuya wa Kkilisimasi” wabwaabi, luumuno anyika, alimwi azileleko kubantu.

Makani Aamasimpe: Tulasolekesya kutondezya bwaabi alimwi akuba basiluumuno buzuba abuzuba. (Tusimpi 11:25; Baloma 12:18) Mucikozyanyo, miswaangano yesu mboyeendelezyegwa alimwi ambotukambauka zileendelana amalailile aa Jesu aakuti: “Mwakapegwa cabuyo, amupe cabuyo.” (Matayo 10:8) Kunze lyaboobo, tulijisi bulangizi bwini-bwini bwakuti Bwami bwa Leza bulikke mbobuyooleta luumuno anyika.—Matayo 10:7.

Nkaambo nzi Bakamboni ba Jehova ncobatasekeleli Kkilisimasi?

Jesu wakalailila kuti katwiibaluka lufwu lwakwe kutali kuzyalwa kwakwe.—Luka 22:19, 20.
Baapostolo ba Jesu alimwi abasikwiiya bakusaanguna tiibakali kusekelela Kkilisimasi. Ibbuku lyakuti New Catholic Encyclopedia lyaamba kuti “pobwe lyakusekelela kuzyalwa kwa Jesu lyakatalika kawiindide kale mwaka wa 243 [C.E.],” kakwiindide myaka iinda ku 100 kuzwa ciindi naakafwa mwaapostolo wamamanino
Taakwe bumboni butondezya kuti Jesu wakazyalwa mu December 25; buzuba mbwaakazyalwa tabulembedwe pe mu Bbaibbele.
Tusyoma kuti Kkilisimasi taizumizyidwe a Leza nkaambo iyeeme azilengwa zyabantu batakali kukomba Leza.—2 Bakolinto 6:17.

Nkaambo nzi ncomunga mwayanda kusulaikwa abantu akaambo kakutasekelela Kkilisimasi?

Bantu banji bacisekelela Kkilisimasi nokuba kuti balizyi kuti iyeeme azilengwa zyabantu batakali kukomba Leza, alimwi akuti Bbaibbele talitulailili kusekelela Kkilisimasi. Bantu bali boobu beelede kulibuzya kuti: Nkaambo nzi Banakristo balakakatila kumuzeezo ngobasulaika bantu banji? Nkaambo nzi ncomunga mwayanda kusulaikwa abantu akaambo kakutasekelela Kkilisimasi?

Ibbaibbele litukulwaizya ‘kubelesya maano.’ (Baloma 12:1, 2) Lituyiisya kuyandisisya kasimpe. (Johane 4:23, 24) Aboobo, nokuba kuti tulabikkila maano mbobatubona bamwi, tulatobela njiisyo zyamu Bbaibbele nokuba kuti kucita boobo cipa kuti tusulaikwe abantu.

Nokuba kuti swebo tatusekeleli Kkilisimasi, tulakulemeka kusala nkobacita bantu mumakani aaya. Alimwi tatubanyonganyi nobasekelela Kkilisimasi.