1 Bakorinto 13:1-13
-
Luyando—nzila yiinda zyoonse (1-13)
13 Ikuti kandaambaula mumyaambo yabantu ayabangelo, pele kanditajisi luyando, ndilaba mbuli mulangu uulila buyo naa cibulo cisabila.
2 Alimwi ikuti kandijisi cipego cakusinsima alimwi kandaamvwisya makani oonse aamaseseke aa Leza, akuti kandijisi luzyibo loonse+ alusyomo lunji lukonzya kundipa kulonzya malundu, pele kuti kanditajisi luyando, ndili wabuyo.*+
3 Alimwi ikuti ndaaba lubono lwangu loonse kutegwa ndisanine bamwi+ alimwi ikuti ndaaba mubili wangu kutegwa ndilidunde, pele kanditajisi luyando,+ tacindigwasyi pe.
4 Luyando+ lulakkazika moyo+ alimwi lulaaluzyalo.+ Luyando talukwe munyono,+ talulidundi, talulisumpuli,+
5 talukwe cisapi,+ talubikkili buyo maano kuzintu nzyoluyanda,+ talunyemi-nyemi,+ talubikkilili.+
6 Talukkomanini kutalulama,+ pele lukkomanina kasimpe.
7 Lulajatila zintu zyoonse,+ lulasyoma zintu zyoonse,+ lulalangila zintu zyoonse,+ lulaliyumya muzintu zyoonse.+
8 Luyando talumani. Pele ikuti naa kuli zipego zyakusinsima, ziyoomana; ikuti naa kuli kwaambaula mumyaambo,* kuyoomana; ikuti naa kuli luzyibo, alwalo luyoomana.
9 Nkaambo tujisi luzyibo lutazulide+ alimwi tulasinsima cakutazulila,
10 pele eelyo twaakuba aluzyibo luzulide akusinsima cakuzulila, eezyo zitazulide ziyoomana.
11 Nindakali mwana, ndakali kwaambaula mbuli mwana, kuyeeya mbuli mwana, kubona twaambo mbuli mwana; pele lino mbwaanga ndakomena, ndatuleka tulengwa twabwana.
12 Kwaciindi cino tatuboni kabotu* nkaambo tulanga mucimbonimboni calubulo, pele kuciindi eeco tuyoobonana cantongolameso. Kwaciindi cino ndizyi buyo kusyoonto, pele kuciindi eeco ndiyoozyiba kabotu* mbubonya mbondizyibidwe kabotu a Leza.
13 Pele lino kusyeede zintu eezyi zyotatwe: lusyomo, bulangizi aluyando; pele aali zyeezyi icipati kwiinda zyoonse, nduyando.+
Bupanduluzi buyungizyidwe
^ Naa “tandikwe mulimo.”
^ Nkokuti, kwaambaula milaka iimbi camaleele.
^ Naa “zintu tatuziboni bwini mbozibede.”
^ Naa “zyoonse.”
