2 Bami 14:1-29
14 Mumwaka wabili wabulelo bwa Jehoasi+ mwana wa Jehoazi imwami wa Israyeli, Amaziya mwana wa Mwami Jehoasi wa Juda wakaba mwami.
2 Wakali amyaka iili 25 naakaba mwami alimwi wakalela kwamyaka iili 29 mu Jerusalemu. Banyina bakali ba Jehoadini baku Jerusalemu.+
3 Wakazumanana kucita ziluleme mumeso aa Jehova, pele ikutali mbuli Davida+ sikale wakwe. Wakacita zyoonse mbubonya mbuli Jehoasi usyi.+
4 Pele masena aakukombela tanaakagwisya pe,+ bantu bakacili kutuula zipaizyo alimwi akuuntumuna busi bwazipaizyo mumasena aayo.+
5 Lino mbobwakabeda buyo anguzu bwami bwakwe, wakajaya babelesi bakwe ibakajaya mwami, nkokuti bausyi.+
6 Pele bana babajayi aaba tanaakabajaya pe kweelana amulawo wa Jehova uulembedwe mubbuku lya Mulawo wa Musa waamba kuti: “Bamausyi tabeelede kujaigwa akaambo kazibi zyabana babo, abalo bana tabeelede kujaigwa akaambo kazibi zyabamausyi; umwi aumwi weelede kufwida cibi cakwe.”+
7 Amaziya wakabajaya bana Edomu+ mu Kkuti lya Munyo,+ ibaalumi bali 10,000, akubweza munzi wa Sela munkondo+ alimwi wakawuulika kuti Jokiteeli kusikila sunu.
8 Mpoonya Amaziya wakatuma batumwa kuli Jehoasi mwana wa Jehoazi mwana wa Jehu imwami wa Israyeli, kuyoomwaambila kuti: “Koboola tulwane.”*+
9 Mwami Jehoasi wa Israyeli wakatuma mulumbe ooyu ku Mwami Amaziya wa Juda wakuti: “Nsaku yamamvwa mu Lebano yakatuma mulumbe kukkedari ilyakali mu Lebano wakuti, ‘Kondipa mwanaako musimbi kutegwa mwanaangu musankwa amukwate.’ Pele cinyama camusyokwe icakali mu Lebano cakainda akulyataula nsaku yamamvwa eeyo.
10 Masimpe wamuzunda Edomu,+ aboobo moyo wako wakupa kuba antunda. Kokkomana akuzunda kwako pele kokkala muŋanda* yako. Ino nkaambo nzi ncoyanda kuliletela mapenzi akuzundwa, kuti yebo a Juda munyonyoonwe antoomwe?”
11 Pele Amaziya tanaakaswiilila pe.+
Aboobo Mwami Jehoasi wa Israyeli wakaunka, eelyo bakalwana walo a Mwami Amaziya wa Juda ku Beti-semesi,+ mucisi ca Juda.+
12 Juda wakazundwa kubana Israyeli, aboobo umwi aumwi wakatijila kuŋanda* yakwe.
13 Mwami Jehoasi wa Israyeli wakajata Mwami Amaziya wa Juda, mwana wa Jehoasi mwana wa Ahaziya, ku Beti-semesi. Mpoonya bakaboola ku Jerusalemu, alimwi wakamwaya bwaanda bwa Jerusalemu kuzwa ku Mulyango wa Efraimu+ mane kusikila ku Mulyango Waku Kkona,+ tukokola tuli 400.*
14 Wakabweza ngolida yoonse, nsiliva azintu zyoonse izyakajanwa muŋanda ya Jehova amuziyobwedo zyamuŋanda yamwami, kubikkilizya abaange. Kumane wakapiluka ku Samariya.
15 Makani oonse aakaindi aamba zya Jehoasi, zintu nzyaakacita alimwi anguzu zyakwe ambwaakalwana Mwami Amaziya wa Juda, alilembedwe mubbuku lyamakani aakaindi aamba zyamazuba aabami ba Israyeli.
16 Kumane Jehoasi wakoona abamausyi alimwi wakazikkwa mu Samariya+ antoomwe abami ba Israyeli; eelyo Jeroboamu*+ mwanaakwe wakaba mwami mubusena bwakwe.
17 Amaziya+ mwana wa Jehoasi mwami wa Juda wakapona myaka iili 15 kuzwa naakafwa Jehoasi+ mwana wa Jehoazi mwami wa Israyeli.+
18 Makani oonse aakaindi aamba zya Amaziya alilembedwe mubbuku lyamakani aakaindi aamba zyamazuba aabami ba Juda.
19 Mukuya kwaciindi bakamuzangila+ ku Jerusalemu, eelyo wakatijila ku Lakisi, pele bakamutumina bantu ku Lakisi akumujaya ooko.
20 Aboobo bakamunyamuna amabbiza akumupilusya, eelyo wakazikkwa ku Jerusalemu abamausyi mu Munzi wa Davida.+
21 Mpoonya bantu boonse bamu Juda bakabweza Azariya,*+ iwakajisi myaka iili 16,+ akumubikka kuba mwami mubusena bwa Amaziya usyi.+
22 Wakayakulula munzi wa Elati+ akuupilusya mumaanza aabana Juda naakafwa mwami* akuzikkwa antoomwe abamausyi.+
23 Mumwaka wa 15 wabulelo bwa Amaziya mwana wa Jehoasi imwami wa Juda, Jeroboamu+ mwana wa Mwami Jehoasi wa Israyeli wakaba mwami mu Samariya alimwi wakalela myaka iili 41.
24 Wakali kucita zibi mumeso aa Jehova. Tanaakacileka kucita zibi zyoonse Jeroboamu mwana wa Nebati nzyaakacita, eezyo nzyaakapa kuti bana Israyeli bacite.+
25 Ngowakapilusya munyinza wa Israyeli kuzwa ku Lebo-hamati*+ kusikila ku Lwizi lwa Araba,*+ kweelana ajwi ndyaakaamba Jehova Leza wa Israyeli kwiinda mumubelesi wakwe Jona+ imwana wa Amitai, musinsimi waku Gati-heferi.+
26 Nkaambo Jehova wakaabona mapenzi mapati aabana Israyeli.+ Kunyina wakasyeede iwakali kukonzya kugwasya bana Israyeli nobaba baabo bapengede naa banyina nguzu.
27 Pele Jehova wakalisyomezyede kuti izina lya Israyeli talikamwaigwi anyika.+ Aboobo wakabafwutula ajanza lya Jeroboamu mwana wa Jehoasi.+
28 Makani oonse aakaindi aamba zya Jeroboamu azintu zyoonse nzyaakacita alimwi anguzu zyakwe ambwaakalwana akwiipilusya alimwi minzi ya Damasiko+ a Hamati+ ku Juda mu Israyeli, alilembedwe mubbuku lyamakani aakaindi aamba zyamazuba aabami ba Israyeli.
29 Mpoonya Jeroboamu wakoona abamausyi, antoomwe abami ba Israyeli; eelyo Zekariya+ mwanaakwe wakaba mwami mubusena bwakwe.
Bupanduluzi buyungizyidwe
^ Naa “tubonane cantongolameso.”
^ Naa “muŋanda yabwami.”
^ Mu Chihebrayo, “kutente.”
^ Mamita aatandila ku 178. Amubone Makani Aayungizyidwe B14.
^ Nkokuti, Jeroboamu Wabili.
^ Nkokwaamba kuti “Jehova Wagwasya.” Wiitwa kuti Uziya ku 2Ba 15:13; 2Mk 26:1-23; Is 6:1; alimwi aku Zek 14:5.
^ Nkokuti, Amaziya bausyi.
^ Nkokuti, Lwizi lwa Munyo, naa Lwizi Lutajisi Buumi.
^ Naa “kumanjililo aa Hamati.”
