Isaya 43:1-28
43 Lino mboobu mbwaamba Jehova,Mulengi wako, O Jakobo, Mubumbi wako, O Israyeli:+
“Utayoowi pe, nkaambo ndakunununa.+
Ndakwiita azina lyako.
Yebo uli wangu.
2 Waakwiinda mumaanzi manji, ndinooli anduwe,+Alimwi waakwiinda mumilonga, tiikakutoli pe.+
Waakwiinda mumulilo, tokapyi pe,Alimwi naaba mabangabanga aamulilo taakakubabuli pe.
3 Nkaambo mebo ndime Jehova Leza wako,Uusalala wa Israyeli, Mufwutuli wako.
Ndapa Egepita kuti abe cinunuzyo cako,Ndapa Etiopiya a Seba mubusena bwako.
4 Nkaambo wakali kuyandika kapati mumeso aangu,+Wakalemekwa, alimwi mebo ndakuyanda.+
Aboobo ndiyoopa bantu kuba mubusena bwakoAkwaaba misyobo yabantu muciindi cabuumi bwako.
5 Utayoowi pe, nkaambo ndilaanduwe.+
Ndiyooleta lunyungu lwako kuzwa kujweAkukubunganya antoomwe kuzwa kumbo.+
6 Ndiyakwaambila cooko cakunyika kuti, ‘Kobalekezya!’+
Acakumusanza kuti, ‘Utabakasyi pe.
Kobaleta bana bangu basankwa kuzwa kubusena bwakulamfwu kapati, abana bangu basimbi kuzwa kumagolelo aanyika,+
7 Woonse wiitwa azina lyangu+Angundakalenga kutegwa kandilemekwa,Ngundakabumba alimwi akupanga.’+
8 Kobaleta bantu boofwu nokuba kuti balijisi meso,Abasinkematwi nokuba kuti balijisi matwi.+
9 Masi oonse aabungane abusena bomwe,Alimwi misyobo yabantu aibungane antoomwe.+
Ino nguni akati kabo uukonzya kucaamba eeci?
Sena balakonzya kutupa kumvwa zintu zyakusaanguna?*+
Abalete bakamboni babo kutegwa batondezye kuti baliluzi,Abamvwe akwaamba kuti, ‘Aayo masimpe!’”+
10 “Nywebo ndinywe bakamboni bangu,”+ mbwaamba Jehova,“Inzya, mubelesi wangu ngondasala,+Kutegwa muzyibe akundisyomaAkuti mumvwisye kuti mebo ndendime ngomunya lyoonse.+
Musyule lyangu kwakanyina Leza wakabumbidwe,Alimwi kumbele lyangu takunabede uumbi pe.+
11 Mebo, ndime Jehova,+ alimwi kunze lyangu kunyina mufwutuli uumbi pe.”+
12 “Mebo ndime ndakaamba, ndakafwutula akupa kuti cizyibweCiindi nokwakanyina leza mweenzu akati kanu.+
Aboobo nywebo ndinywe bakamboni bangu,” mbwaamba Jehova, “eelyo mebo ndime Leza.+
13 Kunze lyaboobo, ciindi coonse mebo ndendime ngomunya;+Alimwi kunyina uukonzya kukwempa cintu cili coonse kuzwa mujanza lyangu.+
Ikuti ndabweza ntaamu, ino nguni uukonzya kundikasya?”+
14 Mboobu mbwaamba Jehova, Munununi wanu,+ Uusalala wa Israyeli:+
“Akaambo kandinywe ndiyootuma bantu ku Babuloni kuti bakaziwisyile ansi mpingizyo zyoonse zyamilyango,+Alimwi bana Kasidi, kabali mumato aabo bayoolila akaambo kamapenzi.+
15 Ndime Jehova, Uusalala+ wanu, Mulengi wa Israyeli,+ Mwami wanu.”+
16 Mboobu mbwaamba Jehova,Ooyo uupanga nzila yiinda mulwiziAlimwi amugwagwa wiinda mumaanzi aakopene,+
17 Ooyo uuleta nkalaki yankondo alimwi abbiza,+Impi yabasikalumamba alimwi abasinguzu aciindi comwe, wati:
“Bayakootobala, alimwi tabakabuki pe.+
Bayoozimwa, bayoozimwa mbubonya mbuli katambo kalambe ikayaka.”
18 “Mutayeeyi zintu zyakaindi,Alimwi mutazibikkili maano zintu zyakaindi.
19 Amubone! Ndicita cintu cipya;+Noliba lino cilalibonya.
Sena tamucizyi?
Ndiyoopanga nzila yiinda munkanda+Akwiinzya milonga mucimpayuma.+
20 Banyama bamusyokwe bayoondilemeka,Bamwaaba alimwi ampowani,Nkaambo ndime ndipa maanzi munkanda,Amilonga mucimpayuma,+Kutegwa ndipe bantu bangu, inzya musale wangu,+ kuti banywe,
21 Ibantu mbondakalibumbilaKutegwa baambilizye ntembauzyo zyangu.+
22 Pele yebo tonoondiita, O Jakobo,+Nkaambo wandicimwa, O Israyeli.+
23 Tonoondiletela mbelele zyazituuzyo zyako zyuumpwa buumbuluAlimwi tonoondilemeka azipaizyo zyako.
Mebo tiindakusinikizya kuti undiletele cipego pe,Alimwi tiindakuminya kwiinda mukuyanda tununkilizyo twalibano kulinduwe.+
24 Tonoonduulila munsale uulweela* amali aako,Alimwi tonoondikkutya amafwuta aazipaizyo zyako.+
Muciindi caboobo, wandikatazya azibi zyakoAlimwi wandiminya azinyonyoono zyako.+
25 Mebo ndendime yooyo uumwaya nsotoko* zyako+ akaambo kandime kundigama,+Alimwi zibi zyako tandikaziyeeyi limbi pe.+
26 Kondiyeekezya; atubetekane;Amba mbokabwene kaambo kutegwa utondezye naa uliluzi.
27 Bauso ibataanzi bakabisya,Abalo aabo ibakwaambawida* bandizangila.+
28 Aboobo ndiyoosofwaazya basilutwe babusena busalala,Alimwi ndiyakwaaba Jakobo kuti anyonyoonweAkupa kuti Israyeli atukilwe.+
Bupanduluzi buyungizyidwe
^ Ambweni kwaamba zintu zyakusaanguna ziboola kumbele.
^ Ooyu munsale uununkilila.
^ Naa “micito yabuzangi.”
^ Ambweni kwaamba bamayi ba Mulawo.
