Isaya 66:1-24
66 Mboobu mbwaamba Jehova:
“Majulu ncuuno cangu cabwami, alimwi nyika ncilyatilo camaulu aangu.+
Aboobo, ino ili kuli ŋanda njomunga mwandiyakila,+Alimwi ino buli kuli busena bwangu bwakulyookezyela?”+
2 “Janza lyangu ndilyakapanga zintu eezyi zyoonse,Alimwi oobu mbombubo mbozyakabako eezyi zyoonse,” mbwaamba Jehova.+
“Aboobo ooyu ndiyoomulanga,Ooyu uulicesya alimwi uuside mumoyo, uukankama* akaambo kajwi lyangu.+
3 Ooyo uujaya mupoho uli buyo mbuli yooyo uujaya muntu.+
Ooyo uutuula mbelele uli buyo mbuli yooyo uutyola nsingo yamubwa.+
Ooyo uutuula cipego uli buyo mbuli yooyo uutuula bulowa bwangulube!+
Ooyo uuleta tununkilizyo twaciibalusyo+ uli buyo mbuli yooyo uuleleka amajwi aamasalamuzi.*+
Balisalila nzila zyabo beni,Alimwi bakkomanina zintu zisesemya.
4 Aboobo ndiyoosala nzila zyakubelesya kubasubula,+Alimwi ndiyoobaletela zintu nzimunya nzyobayoowa.
Akaambo kakuti nindakaita, kunyina wakavwiila;Nindakaamba, kunyina wakaswiilila.+
Bakazumanana kucita zintu zibyaabi mumeso aangu,Alimwi bakasala kucita cintu catakali kundikkomanisya.”+
5 Amumvwe jwi lya Jehova, nywebo nomukankama* akaambo kajwi lyakwe:
“Banabokwanu ibamusulaika nywebo alimwi ibamusalulula akaambo kazina lyangu, cakuupaupa ameso bakati, ‘Aalemekwe Jehova!’+
Pele walo uyoolibonya akumupa kukondwa nywebo,Eelyo balo mbabayakuusyigwa nsoni.”+
6 Kwamvwika ciyoyooyo calupyopyongano mumunzi, ciyoyooyo mutempele!
Nciyoyooyo cijatikizya mbwabapilusyila cibeelede Jehova basinkondonyina.
7 Kalitanabuka da, Ziyoni wakatumbuka.+
Katanatalika kumyongwa, wakatumbuka mwana musankwa.
8 Ino nguni wakamvwa kale cintu cili boobu?
Ino nguni wakabona kale zintu zili boobu?
Sena nyika inga yazyalwa mubuzuba bomwe?
Sena cisi inga cazyalwa aciindi comwe?
Nokuba boobo, Ziyoni mbwaakamyongelwa buyo, wakatumbuka bana bakwe basankwa.
9 “Sena mebo inga ndapa kuti ciindi cakutumbuka cisike mpoonya akumulesya kutumbuka?” mbwaamba Jehova.
“Naa sena inga ndapa kuti mutumbu atalike kutumbuka mpoonya akusinka cizyalilo?” mbwaamba Leza wako.
10 Amukondwe a Jerusalemu alimwi amusekelele anguwe,+ nywebo nyoonse nomumuyanda.+
Amusekelele kapati anguwe, nywebo nyoonse nomumulila,
11 Nkaambo muyoonyonka akukkuta kapati kulukolo lwakwe luumbulizya,Alimwi muyoonywa lilekele akubotelwa mubulemu bwakwe bupati.
12 Nkaambo mboobu mbwaamba Jehova:
“Ooyu ndilamupa luumuno mbuli mulonga+Abulemu bwazisi mbuli kalonga kapaya.+
Nywebo muyoonyonka akunyamudwa akasolo,Alimwi muyoosumpaudwa amagondo.
13 Mbubonya mutumbu mbwaumbulizya mwanaakwe,Andime ndiyoozumanana kumuumbulizya nywebo;+Alimwi muyakuumbulizyigwa akaambo ka Jerusalemu.+
14 Eeci muyoocibona, eelyo myoyo yanu iyookondwa,Mafwuwa aanu ayookomena mbuli mweemvwe.
Alimwi janza* lya Jehova liyoozyibwa kubabelesi bakwe,Pele basinkondonyina uyoobakalalila.”+
15 “Nkaambo Jehova uyooboola mbuli mulilo,+Azyalo nkalaki zyakwe zili mbuli guwo pati,+Kuzoosubula bantu abukali butaambiki,Akubanyemena amabangabanga aamulilo.+
16 Nkaambo Jehova uyoobabeteka amulilo,Inzya, apanga lyakwe, uyoobeteka bantu boonse;Alimwi aabo mbayoojaya Jehova banooli banji.
17 “Aabo balisalazya akusamba kuti banjile mumyuunda*+ kabatobela yooyo uuli akati, ibalya nyama yangulube+ azintu zisesemya alimwi ambeba,+ boonse buyo bayoomana doo,” mbwaamba Jehova.
18 “Mbokunga ndiliizyi milimo yabo alimwi amizeezo yabo, ndilaboola kuzoobunganya bantu bamumasi oonse alimwi amyaambo yoonse, eelyo bayooboola akubona bulemu bwangu.”
19 “Ndiyoobikka citondezyo akati kabo, mpoonya bamwi akati kabaabo ibayoofwutuka ndiyoobatuma kumasi, nkokuti ku Tarisi,+ ku Puli aku Ludi,+ kulibaabo bakwela buta, ku Tubali, ku Javani,+ alimwi akunsumbu zili kulamfwu, kubantu batanamvwa mpuwo yangu nokuba kubona bulemu bwangu; eelyo bayakwaambilizya bulemu bwangu akati kamasi.+
20 Bayooleta banabokwanu boonse kuzwa muzisi zyoonse+ kuti babe cipego kuli Jehova, kabatantide amabbiza, munkalaki, muŋola zivwumbidwe, aamamyuulu* alimwi aankamela zyeendesya, bayoobaleta mane kucilundu cangu cisalala, ku Jerusalemu,” mbwaamba Jehova, “mbubonya mbuli leelyo bana ba Israyeli nobaleta cipego mucibikkilo cisalala muŋanda ya Jehova.”
21 “Alimwi akati kabo ndiyoobweza bamwi kuti babe bapaizi alimwi aba Levi,” mbwaamba Jehova.
22 “Nkaambo mbubonya majulu mapya anyika mpya+ nzyondipanga mboziyookkalila kumbele lyangu,” mbwaamba Jehova, “alwalo lunyungu lwanu alimwi azina lyanu ziyookkalilila.”+
23 “Lino kuzwa noukkala mwezi kusikila noukkala mwezi uumbi akuzwa kusabata imwi kusikila kusabata iimbi,Bantu boonse banooboola kuzoondikotamina kumbele lyangu,”*+ mbwaamba Jehova.
24 “Alimwi bayakuunka akulanga mitunta yabantu ibakandizangila;Nkaambo mvwunyu zinakwiibumbide tazikafwi pe,Awalo mulilo uunooyuumpa taukazimwi pe,+Eelyo iyooba cintu cisesemya kubantu boonse.”
Bupanduluzi buyungizyidwe
^ Naa “uulibilika.”
^ Naa ambweni, “mbuli yooyo uutembaula mutuni.”
^ Naa “nomulibilika.”
^ Naa “nguzu.”
^ Nkokuti, myuunda iilibedelede iyakali kubelesyegwa mukukomba mituni.
^ Aaba mbanyama bazyalwa ikuti mbongolo yaswaangana abbiza.
^ Naa “kuzoondikomba.”
