Jeremiya 25:1-38
25 Ndeeli jwi lyakamusikila Jeremiya kujatikizya bantu boonse bamu Juda mumwaka wane wa Jehoyakimu+ mwana wa Josiya, mwami wa Juda, nkokuti mumwaka wakusaanguna wa Mwami Nebukadinezara* wa Babuloni.
2 Mboobu mbwaakaamba musinsimi Jeremiya kujatikizya bantu* boonse bamu Juda alimwi abantu boonse bakkala mu Jerusalemu:
3 “Kuzwa mumwaka wa 13 wa Josiya+ mwana wa Amoni, mwami wa Juda, kusikila buzuba obuno, imyaka eeyi iili 23 ijwi lya Jehova lyalikundisikila, alimwi nywebo ndalikumwaambila cakwiinduluka-induluka,* pele kunyina nomwali kuswiilila pe.+
4 Alimwi Jehova wakamutumina babelesi bakwe boonse ibasinsimi, wakali kubatuma cakwiinduluka-induluka,* pele kunyina nomwakali kuswiilila nokuba kucenjeka matwi aanu kuti muswiilile.+
5 Bakali kwaamba kuti, ‘Akaka nobantu amujokoloke, umwi aumwi kuzwa kunzila yakwe alimwi akuzwa kumicito yanu mibi;+ aboobo mulazumanana kukkala kwaciindi cilamfwu eeco ciboola kumbele munyika eeyo Jehova njaakamupa kaindi nywebo alimwi abamauso.
6 Mutatobeli baleza bambi kuti mubabelekele akubakotamina, akundinyemya amilimo yamaanza aanu; buyo-buyo ndilamuletela mapenzi.’
7 “‘Pele tiimwakandiswiilila pe,’ mbwaamba Jehova. ‘Muciindi caboobo, mwakandinyemya amilimo yamaanza aanu, akuliletela mapenzi nobeni.’+
8 “Aboobo, mboobu mbwaamba Jehova wamakamu, ‘“Akaambo kakuti tiimwakali kuswiilila majwi aangu,
9 ndilaita misyobo yoonse yakunyika,”+ mbwaamba Jehova, “ndilaita Mwami Nebukadinezara* wa Babuloni, mubelesi wangu,+ ndilabaleta kuzoolwana cisi eeci+ abantu bakkala mumo alimwi amasi aaya oonse aayengelede.+ Ndiyoobanyonyoona akubacita kuba cintu cigambya acintu cakusibila mulosi alimwi amatongo aanooliko lyoonse alyoonse.
10 Akati kabo ndiyoolobya jwi lyakusekelela alyakukondwa,+ ijwi lyasibwiinga ajwi lyanabwiinga,+ kulila kwaziyo alimwi amumuni walambe.
11 Eelyo nyika eeyi yoonse iyooba matongo alimwi iyooba cintu cigambya, alimwi masi aaya ayoobelekela mwami wa Babuloni myaka iili 70.”’+
12 “‘Lino myaka iili 70 yaakukkwana,+ ndiyoomusubula mwami wa Babuloni acisi eeco akaambo kacibi cabo,’+ mbwaamba Jehova, ‘alimwi ndiyoopa kuti cisi caba Kasidi cibe matongo aanyonyookede lyoonse alyoonse.+
13 Cisi eeco ndiyoociletela zintu zyoonse nzyondakaamba kujatikizya ncico, majwi oonse aalembedwe mubbuku eeli aayo ngaasinsima Jeremiya kujatikizya zisi zyoonse.
14 Nkaambo masi manji alimwi abami basinguzu+ bayoobabelesya kabali bazike babo,+ eelyo ndiyoobajolela cibi cabo kweelana amicito yabo alimwi amilimo yamaanza aabo.’”+
15 Nkaambo mboobu mbwaakandaambila Jehova Leza wa Israyeli: “Kobweza nkapu eeyi yawaini wabukali bwangu mujanza lyangu, mpoonya uunke ukanywisye bantu bamumasi oonse ooko nkondikutuma.
16 Bayakwiinywa akutalika kudadalika alimwi akucita mbuli bantu basondokede akaambo kapanga ndyondituma akati kabo.”+
17 Aboobo ndakabweza nkapu eeyo mujanza lya Jehova akunywisya masi oonse ooko nkwaakandituma Jehova:+
18 kutalikila amunzi wa Jerusalemu aminzi ya Juda,+ bami banguwo alimwi abasilutwe banguwo, kuti babe matongo, cintu cigambya, cintu cakusibila mulosi acintu cisinganizyidwe,+ mbubonya mbocibede obuno buzuba;
19 mpoonya Farao mwami wa Egepita ababelesi bakwe, basilutwe bakwe abantu bakwe boonse,+
20 ankamu yabo yoonse yabantu bamisyobo-misyobo; bami boonse bamucisi ca Uzi; bami boonse bamucisi caba Filisiti,+ cisi ca Asikeloni,+ Gaza, Ekroni abantu basyeede mu Asidodi;
21 Edomu,+ Moabu+ alimwi abana Amoni;+
22 bami ba Turo boonse, bami ba Sidoni+ boonse alimwi abami bansumbu iili mulwizi;
23 Dedani,+ Tema, Buzi abaabo boonse bageledwe malezu aamumpobe;*+
24 bami boonse babana Arabiya+ abami boonse bankamu yabantu bamisyobo-misyobo ibakkala munkanda;
25 bami boonse ba Zimuri, bami boonse ba Elamu,+ abami boonse babana Medi;+
26 abami boonse bakunyika, ibali afwaafwi abali kulamfwu, kabatobelana umwi aumwi wabo, amami aambi aamunyika oonse aali atala aanyika; mpoonya mwami wa Sesaki*+ uyoonywa baakumanizya boonse.
27 “Alimwi weelede kubaambila kuti, ‘Mboobu mbwaamba Jehova wamakamu, Leza wa Israyeli: “Amunywe mukolwe, mwamana muluke akuwa cakuti cimwaalile kunyamuka+ akaambo kapanga ndyondituma akati kanu.”’
28 Lino ikuti naa bakakake kubweza nkapu kuzwa mujanza lyako kuti banywe, ukabaambile kuti, ‘Mboobu mbwaamba Jehova wamakamu: “Ncobeni mulainywa nemuyanda nemutayandi!
29 Nkaambo amubone! Ikuti naa munzi wiitwa azina lyangu+ ngonditiisaangune kuletela mapenzi, sena nywebo mweelede kulekwa buyo kakunyina kusubulwa?”’+
“‘Kunyina nomutiilekwe buyo kakunyina kusubulwa pe, nkaambo kuli panga ndendiitila bantu boonse bakkala munyika,’ mbwaamba Jehova wamakamu.
30 “Lino yebo ukabasinsimine majwi aaya oonse akubaambila kuti,‘Kuzwa kujulu Jehova uyoovwuluma,Alimwi kuzwa kubusena bwakwe busalala uyoopa kuti jwi lyakwe limvwugwe.Uyoovwulumina busena bwakwe bwakukkala.
Uyakwiimba ajwi lyaatala mbuli baabo balyatauka mucikandilo camisaansa,
Uyakwiimba akaambo kakuzunda bantu boonse bakkala munyika.’
31 ‘Ciyoyooyo ciyoolimvwisya kumamanino aanyika,Nkaambo Jehova ujisi kaambo amasi.
Walo mwini uyoobabeteka bantu boonse.+
Bantu babi uyoobaaba kupanga,’ mbwaamba Jehova.
32 Mboobu mbwaamba Jehova wamakamu:
‘Amubone! Mapenzi ayaabumwaika mucisi acisi,+Alimwi guwo pati liyootalisyigwa kuzwa kumasena aakumamanino aanyika.+
33 “‘Aabo bayoojaigwa a Jehova mubuzuba oobo bayoojanika koonse-koonse kuzwa kumagolelo amwi aanyika kusikila kumagolelo aambi aanyika. Tabakalilwi pe, nokuba kuyobolwa naa kuzikkwa. Bayooba buyo mbuli mbolezi atala aanyika.’
34 Amulile, nywebo nobeembezi, akoomoka!
Amwaalabane ansi, nywebo nobalupati-pati babutanga,Nkaambo ciindi canu cakuti mujaigwe akuti mumwaigwe casika,Alimwi muyoowa mbuli nongo njandisi!
35 Beembezi tabajisi busena bwakutijila,Abalo balupati-pati babutanga tabajisi matijilo.
36 Amuswiilile! Kukwiila kwabeembeziAkulila kwabalupati-pati babutanga,Nkaambo Jehova unyonyoona macelelo aabo.
37 Alimwi mumasena aakukkala aaluumuno tamucikwe bantu baponaAkaambo kabukali bwa Jehova buvwilima mbuli mulilo.
38 Wazwa mumayubilo aakwe mbuli syuumbwa uucili mwana,+Nkaambo nyika yabo yaba cintu cigambyaAkaambo kapanga liyoosyaAlimwi akaambo kabukali bwakwe buvwilima mbuli mulilo.”
Bupanduluzi buyungizyidwe
^ Mu Chihebrayo, “Nebukadirezara,” nzila imbi mbolilembwa zina eeli.
^ Naa “kubantu.”
^ Mu Chihebrayo, “ndalikufwuma kubuka akumwaambila.”
^ Mu Chihebrayo, “wakali kufwuma kubuka akubatuma.”
^ Mu Chihebrayo, “Nebukadirezara,” nzila imbi mbolilembwa zina eeli.
^ Bamwi baamba kuti “munzanyu.”
^ Kuboneka kuti eeli ndizina lyamaambilambali lya Babelo (Babuloni).
