Luka 12:1-59
-
Bumena bwaba Farisi (1-3)
-
Amuyoowe Leza, ikutali bantu (4-7)
-
Kumuzumina Kristo (8-12)
-
Cikozyanyo camulombwana muvwubi pele mufwubafwuba (13-21)
-
Amuleke kulibilika (22-34)
-
Katanga kaniini (32)
-
-
Kupakamana (35-40)
-
Mubanzi uusyomeka amubanzi uutasyomeki (41-48)
-
Kutali luumuno, pele kwaandaana (49-53)
-
Mbokuyandika kuzyiba ciindi ncotupona (54-56)
-
Kumanizya twaambo (57-59)
12 Kuciindi eeco bantu babalilwa kuzyuulu zinji nobakabungana cakuti bakali kulyatana buya, Jesu wakasaanguna kwaambila basikwiiya bakwe kuti: “Amucenjele abumena bwaba Farisi, nkokuti kuupaupa ameso.+
2 Pele kunyina cintu cisisidwe kabotu-kabotu citakayubununwi, alimwi kunyina cintu camaseseke citakazyibwi.+
3 Aboobo zintu zyoonse nzyomwaamba mumudima ziyoomvwugwa mumumuni, alimwi nzyomuvwiya mumaanda aanu ziyookambaukilwa aziluli zyamaanda.
4 Alimwi nobeenzuma+ ndimwaambila kuti, mutabayoowi aabo bajaya mubili pele kuzwa waawo taakwe cimbi ncobakonzya kucita.+
5 Pele ndilamwaambila iweelede kuyoowegwa: Amumuyoowe ooyo uujisi nguzu zyakusowela mu Gehena*+ amana kujaya. Inzya ndimwaambila kuti amumuyoowe ooyu.+
6 Sena tutiiti tosanwe tatusambalwi makkobili* obilo aajisi mpindu nsyoonto? Nokuba boobo, kunyina nokaba komwe kalubidwe* kuli Leza.+
7 Pele naaba masusu aakumutwe wanu alibalidwe oonse.+ Mutayoowi pe; nywebo mulayandika kwiinda tutiiti tunji.+
8 “Lino ndimwaambila kuti, kufwumbwa uundizumina kumbele lyabantu,+ Mwanaamuntu awalo uyoomuzumina kumbele lyabangelo ba Leza.+
9 Pele kufwumbwa uundikaka kumbele lyabantu uyookakwa kumbele lyabangelo ba Leza.+
10 Alimwi kufwumbwa waamba majwi mabi ku Mwanaamuntu, uyakulekelelwa, pele ooyo uusampaula muuya uusalala takalekelelwi pe.+
11 Nobamutola kumbele lyabuleya,* kuli balupati-pati bamfwulumende akubeendelezi, mutalibiliki kuti muyooliiminina buti nomwiingula naa kuti muyakwaamba nzi,+
12 nkaambo muuya uusalala uyoomuyiisya aciindi nciconya eeco zintu nzyomweelede kwaamba.”+
13 Mpoonya umwi munkamu wakati kulinguwe: “O Mwiiyi, komwaambila mukwesu kuti andaabile cibeela calukono.”
14 Jesu wakati kulinguwe: “Yebo muntu, ino nguni wakandisala kuti ndibe mubetesi naa sikukosola makani akati kanu nywebo nyobilo?”
15 Mpoonya wakati kulimbabo: “Amucenjele akulikasya kubusyaacivwulemwangu* buli boonse,+ nkaambo nokuba kuti muntu kajisi zintu zinji buti, ibuumi bwakwe tabuzwi kuzintu eezyo nzyajisi.”+
16 Aboobo wakabaambila cikozyanyo kati: “Umwi muntu muvwubi wakatebula zilyo zinji kapati mumyuunda yakwe.
17 Aboobo wakatalika kulibuzya ulaamba, ‘Ino ndilacita buti mbwaanga lino ndinyina kwakuyobweda zilyo zyangu?’
18 Mpoonya wakati, ‘Mboobu mbondilaacite:+ Ndilamwaya matala aangu akuyaka mapati, eelyo oomo monditiiyobwede maila aangu oonse azintu zyangu zyoonse,
19 mpoonya ndilalyaambila kuti: “Wayobola zintu zinji zibotu zinooliko kwamyaka minji; koliiba, kolya, konywa, alimwi kosekelela.”’
20 Pele Leza wakamwaambila kuti, ‘Yebo ootayeeyi kabotu, masiku ngoonya aaya balabuyanda buumi bwako. Aboobo ino zilaba zyani zintu eezyi nzyoyobwede?’+
21 Mbocibede oobo kumuntu uuliyobweda lubono pele katali muvwubi kuli Leza.”+
22 Mpoonya wakaambila basikwiiya bakwe kuti: “Nkakaambo kaako ndimwaambila kuti, amuleke kulibilika kujatikizya buumi bwanu kuti muyoolya nzi naa kujatikizya mibili yanu kuti muyoosama nzi.+
23 Nkaambo buumi bulayandika kwiinda cakulya, amubili kwiinda zyakusama.
24 Amuyeeye bacikwangala: Tabasyangi mbuto naa kutebula; tabajisi butala naa ciyobwedo, nokuba boobo, Leza ulabasanina.+ Sena nywebo tamuyandiki kapati kwiinda bayuni?+
25 Ino nguni akati kanu ikwiinda mukulibilika uukonzya kulansya buumi bwakwe naaceya?*
26 Aboobo ikuti kamutakonzyi kucita cintu ciniini boobu, ino mulibilikila nzi kujatikizya zintu zyoonse eezyi zyasyaala?+
27 Amulange maluba-luba mbwaakomena: Taabeleki naa kusuma; pele ndimwaambila kuti naba Solomoni mubulemu bwakwe boonse kunyina naakasamide mbuli limwi lyayaaya.+
28 Lino ikuti naa Leza mbwazisamika oobu zimena musyokwe izinga sunu nkozili pele juunza zyayuma akusowelwa mumulilo, sena takaindi kumusamika nywebo, nywebo nobasilusyomo luniini?
29 Aboobo, amuleke kuyandaulisya nzyomuyakulya anzyomuyakunywa alimwi amuleke kulibilika lyoonse;+
30 nkaambo zyoonse eezyi nzyezintu bantu bamunyika nzyobayandaula kapati, pele Uso ulizyi kuti muyandika zintu eezyi.+
31 Muciindi caboobo, amuzumanane kuyandaula Bwami bwakwe, eelyo zintu eezyi ziyooyungizyigwa kulindinywe.+
32 “Mutayoowi, nokatanga kaniini,+ nkaambo Uso wasala kumupa Bwami.+
33 Amusambale zintu nzyomujisi akupa zipego zyaluse.*+ Amulipangile nkomo zyamali zitazakali, lubono lutamani kujulu,+ ooko mubbi nkwatasiki afwaafwi alimwi kutakwe zyuuka zilya.
34 Nkaambo ooko ikuli lubono lwanu, ayalo myoyo yanu nkwiinoobede.
35 “Amusame akulibambila,*+ aalo malambe aanu kaayaka lyoonse,+
36 alimwi nywebo amube mbuli babelesi balindila simalelaabo uupiluka+ kuzwa kupobwe lyabwiinga,+ kutegwa mbwatiisikile buyo akukonkomona, bamujalwide.
37 Balikkomene babelesi aabo simalelo asika mbatiijane balalindila! Ncobeni ndimwaambila kuti, uyoosama cisani cakukutaukila akubakkazika kuti balye alimwi uyooboola akubakutaukila.
38 Alimwi ikuti wasika aciindi cakulinda cabili* naa aciindi cakulinda catatu,* akubajana kabalibambilide, balikkomene kapati!
39 Pele kamuzyiba kuti, ikuti mwiniŋanda naakalizyi ciindi mubbi ncaakali kuboola, naatakalekela mubbi kunjila muŋanda yakwe.+
40 Kamulibambilide lyoonse andinywe, nkaambo aciindi ncomutayeeyeli, Mwanaamuntu ulaboola.”+
41 Mpoonya Petro wakabuzya kuti: “O Mwami, sena waambila buyo ndiswe cikozyanyo eeci naa boonse?”
42 Eelyo Mwami wakavwiila kuti: “Ino mubwini nguni mubanzi* uusyomeka, uucenjede,* ooyo Simalelaakwe ngwayoosala kulanganya babelesi bakwe ikuti lyoonse kabapa cakulya cikkwene aciindi ceelede?+
43 Ulikkomene muzike ooyo ikuti Simalelaakwe aakusika akamujane kacita oobo!
44 Ndimwaambila masimpe kuti, uyoomusala kulanganya lubono lwakwe loonse.
45 Pele ikuti muzike ooyo mumoyo wakwe waamba kuti, ‘Simalelaangu wamuka kuboola,’ kumane watalika kuuma bazikenyina baalumi abamakaintu, alimwi akulya, kunywa akukolwa,+
46 simalelo wamuzike ooyo uyooboola mubuzuba mbwatamulangili alimwi aaciindi ncatazyi, eelyo uyoomusubula acisubulo cipati alimwi akumubikka antoomwe abantu batasyomeki.
47 Mpoonya ooyo muzike iwakamvwisya ncaakali kuyanda simalelaakwe pele iwatakalibambila naa kucita kweelana ancaakaamba* uyakuumwa zimboko zinji.+
48 Pele ooyo watakamvwisya aboobo wakacita zintu zimupa kuumwa zimboko, uyakuumwa zisyoonto. Masimpe, kufwumbwa wakapegwa zinji, kuyooyandwa zinji kulinguwe, alimwi ooyo wakabikkwa kulanganya zinji, kuyooyandwa zinji kapati kuzwa kulinguwe.+
49 “Ndakaboolela kukunka mulilo anyika, pele kuti mulilo ooyo wayasyigwa kale, ncinzi cimbi ncondinga ndayanda?
50 Ncobeni kuli lubbapatizyo ndondeelede kubbapatizyigwa andulo alimwi ndilakatazyigwa kapati mumoyo kusikila lukainde!+
51 Sena muyeeya kuti ndakaboolela kuleta luumuno anyika? Peepe, pele ndimwaambila kuti ndakaboolela kuleta lwaandaano.+
52 Nkaambo kuzwa sunu kunooli bantu bosanwe muŋanda yomwe ibaandeene, botatwe ibakazya bobilo abobilo ibakazya botatwe.
53 Banakwaandeene, bausyi amwana wabo musankwa, mwana musankwa abausyi, banyina amwana wabo musimbi, mwana musimbi abanyina, banyinazyala amukamwana, amukamwana abanyinazyala.”+
54 Mpoonya alimwi wakaambila makamu aabantu kuti: “Mwabona kkumbi linyamuka kumbo ndilyonya mwaamba kuti, ‘Kuboola mvwula yaguwo,’ eelyo ncobeni ilaboola.
55 Alimwi muwo nowuunga kuzwa kumusanza, mwaamba kuti, ‘Kunoopya sunu,’ eelyo ncobeni kulapya.
56 Nywebo nobasikuupaupa ameso, mulizyi kupandulula mbokuboneka anyika akujulu, pele ino nkaambo nzi ncomutacizyi kupandulula ncocaamba ciindi ecino?+
57 Alimwi ino nkaambo nzi ncomutalisalili ciluleme nobeni?
58 Mucikozyanyo, nounka asitwaambonyoko kumuleli, kosoleka canguzu nomucili munzila kumanizya kaambo anguwe kutegwa ambweni atakutoli kumubetesi, kumane mubetesi akutole kuli kapaso awalo kapaso akuwaale muntolongo.+
59 Ndikwaambila kuti, kunyina noyakuzwa oomo kusikila mane ukalunge kakkobili kamamanino.”*
Bupanduluzi buyungizyidwe
^ Amubone Bupanduluzi Bwamabala.
^ Mu Chigiriki, “maasariyoni.” Amubone Makani Aayungizyidwe B14.
^ Naa “katabikkilwi maano.”
^ Naa “kucikombelo.”
^ Naa “kukulikumbuzya.”
^ Naa “kulampya buumi bwakwe abulamfwu bwakakokola nokaba komwe?” Amubone Makani Aayungizyidwe B14.
^ Naa “zipego zipegwa kubacete.” Amubone Bupanduluzi Bwamabala.
^ Mu Chigiriki, “Amulyaange muzibuno zyanu.”
^ Kuzwa kuma 9 koloko yamasiku kusikila akaandabwe kabusiku.
^ Kuzwa akaandabwe kabusiku kusikila kuma 3 koloko yamasiku.
^ Naa “sikulanganya ŋanda.”
^ Naa “musongo.”
^ Naa “kweelana akuyanda kwasimalelaakwe.”
^ Mu Chigiriki, “kalepita kamamanino.” Amubone Makani Aayungizyidwe B14.
