Tusimpi 24:1-34
24 Utanyonokeli bantu babi,Alimwi utalombozyi kuba munkamu yabo,+
2 Nkaambo myoyo yabo iyeeya buyo kucita milimo yabugwebenga,Ayalo milomo yabo yaamba buyo zyakuleta mapenzi.
3 Ŋanda* ilayakwa abusongo,+Alimwi ilayumizyigwa abupampu.
4 Kwiinda muluzyibo twaanda twanjiyo twamukati tulazuzyigwaZintu zyamisyobo yoonse ziyandisi alimwi zikkomanisya.+
5 Muntu musongo ulaanguzu kapati,+Alimwi muntu uujisi luzyibo uyungizya nguzu zyakwe.
6 Kwiinda mubusolozi bwamaano* yebo uyoolwana nkondo yako,+Alimwi nokuli basikulaya banji kuli kuzunda.*+
7 Mufwubafwuba takonzyi kubujana busongo bwini-bwini pe;+Tajisi cakwaamba kumulyango wamunzi.
8 Kufwumbwa muntu uukanza kucita zibiUnakwiitwa kuti syaazibwene mukucita zintu zyabumpelenge.+
9 Makanze aabufwubafwuba* mabi,Alimwi sikusampaula ncisesemyo kubantu.+
10 Ikuti watyompwa mubuzuba bwamapenzi,*Nkokuti nguzu zyako zilaceya.
11 Kobavwuna aabo batolwa kulufwu,Alimwi kobafwutula aabo badadalikila kuyoojaigwa.+
12 Ikuti naa waambe kuti, “Pele tiitwacizyi eeci,”
Sena ooyo uulingula myoyo* takoobona?+
Masimpe, ooyo uukulanga ulazyibaAkujolela muntu umwi aumwi kweelana amicito yakwe.+
13 Mwanaangu kolya buci, nkaambo mbubotu;Buci buzwa mucimbulwe cabuci bulalweela mukanwa.
14 Mbubonya buyo, kozyiba kuti busongo bulakugwasya.*+
Ikuti naa wabujana, nkokuti mazuba aako aakumbele anooli mabotuAlimwi bulangizi bwako tabukamani pe.+
15 Utayubilili afwaafwi aŋanda yamululami kojisi makanze mabi;Utanyonyooni busena bwakwe bwakulyookezyela.
16 Nkaambo mululami ulakonzya kuwa ziindi zili ciloba, nokuba boobo ulanyamuka alimwi,+Pele ibabi balalebwa amapenzi.+
17 Ikuti sinkondonyoko wawa, utasekeleli pe,Alimwi ikuti naa walebwa, moyo wako utakkomani pe;+
18 Buyo-buyo Jehova ulabona akubijilwa,Eelyo ulaleka kutondezya bukali bwakwe kulinguwe.*+
19 Utanyemi* akaambo kabasimucita zibi;Utanyonokeli bantu babi,
20 Nkaambo muntu mubi woonse takabi abuumi kumbele;+Lambe lyabantu babi liyoozimwa.+
21 Mwanaangu, koyoowa Jehova amwami.+
Utayanzani abazangi,*+
22 Nkaambo mapenzi ayoobasikila cakutayeeyela.+
Ino nguni uuzyi lunyonyooko aaba bobilo* ndobayooletela bazangi aaba?+
23 Majwi aaya aalo ngabasongo:
Tacili kabotu pe kusalulula mulubeta.+
24 Kufwumbwa muntu waambila muntu mubi kuti, “Yebo uliluleme,”+
Bantu bayoomusinganya, azyalo zisi ziyoomusampaula.
25 Pele zintu ziyoobeendela kabotu aabo bamusinsa;+Bayoopegwa zileleko zyazintu zibotu.+
26 Bantu bayoomyonta milomo yamuntu uuvwiila camasimpe.*+
27 Kolibambila mulimo wako aanze, alimwi kozibambila limwi zintu zyoonse mumuunda;Mpoonya koyaka ŋanda* yako.
28 Utabi kamboni uubejekezya mweenzinyoko kaambo katako.+
Utabelesyi milomo yako kucenga bantu.+
29 Utaambi kuti: “Ndilamucitila mbubonya mbwaandicitila;Ndilamujolela kweelana ancaakacita.”+
30 Ndakainda kumuunda wamutolo,+Kumuunda wamisaansa wamuntu uutakwe maano.*
31 Ndakabona kuti muunda woonse wakajisi buyo nsaku;Muunda woonse wakazwide buyo mamvwa,Alimwi bwaanda bwanguwo bwamabwe bwakaliwide.+
32 Cintu eeci ndakacibona alimwi cakandinjila mumoyo;Ndakacibona alimwi ndakaiya ciiyo eeci cakuti:*
33 Kuti koamba kuti, kaasye ndoonoone aniini, nduumfwule-umfwule aniini,Kandicilivwunga maanza aniini kutegwa ndilyookezye,
34 Bucete bulakunjilila mbuli cigwebenga,Akwalo kubula zintu kulakusikila mbuli muntu uujisi zilwanyo.+
Bupanduluzi buyungizyidwe
^ Naa “Mukwasyi.”
^ Naa “mubusolozi bwabusongo.”
^ Naa “kuzwidilila; lufwutuko.”
^ Naa “Makanze aamufwubafwuba.”
^ Naa “muziindi zyamapenzi.”
^ Naa “makanze.”
^ Naa “bulalweela kulinduwe.”
^ Nkokuti, sinkondonyoko.
^ Naa “Utacimwi.”
^ Naa “abaabo bayanda kucinca zintu.”
^ Nkokuti, Jehova alimwi amwami.
^ Naa ambweni, “Kuvwiila cakutainda mumbali kuli mbuli kumyonta.”
^ Naa “mukwasyi.”
^ Mu Chihebrayo, “uutakwe moyo.”
^ Mu Chihebrayo, “ndakatambula lulayo oolu:”
