IBBUKU lya Ciyubunuzyo lijisi twaambo tuteelede kuteelelwa mbubwenya mbotulembedwe. (Ciyubunuzyo 1:1) Mucikozyanyo, lyaamba zyamwanakazi uujisi zina lyakuti “BABULONI MUPATI” lilembedwe ankumu yakwe. Imwanakazi ooyu waambwa kuti ukkede a “makamu makamu amasi amyaambo.” (Ciyubunuzyo 17:1, 5, 15) Mbwaanga kunyina mwanakazi wini uunga wacita ceeci, Babuloni Mupati weelede kuti wiiminina cintu cimwi. Aboobo ino ooyu sikuvwuula wacikozyanyo wiiminina nzi?

Ku Ciyubunuzyo 17:18, imwanakazi wacikozyanyo nguwenya waambwa kuti “ngumunzi mupati uujisi bwami kubami boonse banyika.” Ibbala lyakuti “munzi” litondezya nkamu yabantu  bacita cimwi. Mbwaanga “munzi mupati” ooyu weendelezya “bami boonse banyika,” imwanakazi wiitwa kuti Babuloni Mupati weelede kuti kali mbunga iijisi bweendelezi mumasi oonse munyika. Cakweelela inga waitwa kuti mbulelo bwanyika yoonse. Ino mbulelo buli buti? Mbulelo bujatikizya bukombi. Amubone zibalo zimwi zyeendelana mubbuku lya Ciyubunuzyo mbozitupa kwaakosola boobu makani aaya.

Ibulelo bulakonzya kabuli bwatwaambo twacisi, bwamakwebo naa bwabukombi. Imwanakazi wiitwa kuti Babuloni Mupati tabuli bulelo bwatwaambo twacisi pe akaambo kakuti Jwi lya Leza lyaamba kuti “bami boonse banyika,” naa kuti zibeela zyatwaambo twacisi zyamunyika eeyi “bakacita awe bumambi.” Ibumambi bwakwe caamba kumvwana nkwajisi abeendelezi bamunyika eeyi alimwi kupandulula kaambo ncaitwa kuti ngu “sikuvuula mupati.”—Ciyubunuzyo 17:1, 2; Jakobo 4:4.

Babuloni Mupati takonzyi kuba bulelo bwamakwebo akaambo kakuti “basambazi baansi,” ikwiiminina zibeela zyamakwebo bayoomulila aciindi cakunyonyoonwa kwakwe. Mubwini, ibami alimwi abasambazi bapandululwa kuti balangilila Babuloni Mupati kabali “alaale.” (Ciyubunuzyo 18:3, 9, 10, 15-17) Aboobo cili kabotu ikwaamba kuti Babuloni Mupati tabuli bulelo bwatwaambo twacisi naa bwamakwebo, pele bwabukombi.

Ikuzyibwa kwa Babuloni Mupati kuti ujatikizya bukombi kulasinizyigwa alimwi mukaambo kakuti weena masi oonse kwiinda “kumalozi” aakwe. (Ciyubunuzyo 18:23) Mbwaanga kusyoma mizimo koonse kujatikizya madaimona, tacigambyi pe kuti Bbaibbele lyaamba Babuloni Mupati kuti “waba bukalo bwamadaimona.” (Ciyubunuzyo 18:2; Deuteronomo 18:10-12) Ibulelo oobu alimwi bupandululwa kuti bulacikazya kapati cikombelo cakasimpe, bulabapenzya “basinsimi” alimwi a “basalali.” (Ciyubunuzyo 18:24) Mubwini, Babuloni Mupati ulacisulaika kapati cikombelo cakasimpe cakuti ulabapenzya cakuzwa munzila kusikila nkwabajaya buya ‘bakamboni ba Jesu.’ (Ciyubunuzyo 17:6) Aboobo cilisalede kuti imwanakazi ooyu uutegwa Babuloni Mupati wiiminina bulelo bwanyika yoonse bwabukombi bwakubeja, ibubikkilizya zikombelo zyoonse izimukazya Jehova Leza.