CIIYO 03
Sena Mulakonzya Kulisyoma Bbaibbele?
Bbaibbele lilijisi zisyomezyo zinji alimwi lilapa lulayo lunji. Kweelede kuti mulayandisisya kuzyiba ncoliyiisya, pele ambweni cilamukatazya kulisyoma. Sena mweelede kuzisyoma zisyomezyo alimwi alulayo luzwa mubbuku eeli lyakaindi? Sena nzyolyaamba Bbaibbele zilagwasya mazuba aano alimwi akumbele? Sena inga twazisyoma nzyolyaamba kujatikizya zyakumbele? Bantu banji balazisyoma. Atubone naa andinywe inga mwazisyoma.
1. Sena nzyolyaamba Bbaibbele nzyamasimpe naa nzyakuyeeyela buyo?
Bbaibbele lyaamba kuti lijisi “majwi aaluzi aakasimpe.” (Mukambausi 12:10) Lyaamba zintu zyakacitika ncobeni izijatikizya bantu beni. (Amubale Luka 1:3; 3:1, 2.) Basyaazibwene mumakani aakaindi banji alimwi abasikuvwukkula zyakaindi bakaamba kuti madeeti, bantu, masena, alimwi azintu zyaambidwe mu Bbaibbele zililuzi.
2. Nkaambo nzi ncotukonzya kwaamba kuti Bbaibbele lilagwasya nokuba kuti ndyakaindi?
Kanji-kanji Bbaibbele lilaamba zintu zyatakazyibidwe aciindi nolyakali kulembwa. Mucikozyanyo lilaamba makani aajatikizya sayaansi. Bantu banji tiibakaasyoma makani aayo ciindi naakalembwa. Nokuba boobo, sayaansi yamazuba aano ilazumina kuti nzyolyaamba Bbaibbele zililuzi. ‘Lilasyomeka ciindi coonse, lino mane kukabe kutamani.’—Intembauzyo 111:8.
3. Nkaambo nzi ncotweelede kuzisyoma nzyolyaamba Bbaibbele kujatikizya zyakumbele?
Bbaibbele lijisi businsimi a ibwaamba “zintu zitanacitika.” (Isaya 46:10) Lyakasinsima zintu zinji ziluzi kaindi kazitanacitika. Alimwi lyakaamba zintu zinji, zicitika munyika mazuba aano. Muciiyo eeci, tulanga-langa businsimi bumwi bwamu Bbaibbele. Kusyomeka kwambubo kulagambya!
AMWIIYE ZINJI
Atulange-lange sayaansi yamazuba aano mboyeendelana a Bbaibbele, akubona businsimi bumwi bwamu Bbaibbele ibukkomanisya.
4. Sayaansi ileendelana a Bbaibbele
Kaindi, bantu banji bakali kusyoma kuti nyika ikkede acintu cimwi. Atweebelele VIDIYO.
Atubone makani aakalembwa mubbuku lya Jobu myaka iili 3,500 yainda. Amubale Jobu 26:7, akubandika mubuzyo ooyu:
-
Nkaambo nzi majwi aakuti nyika yaanzikidwe “aatakwe cintu” ncaagambya?
Kwainda myaka iitandila ku 200, kuzwa ciindi bweende bwameenda (water cycle) nobwakazyibwa kabotu-kabotu. Pele amubone ncolyakaamba Bbaibbele myaka iitandila ku 3,500 yainda. Amubale Jobu 36:27, 28, akubandika mibuzyo eeyi:
-
Ncinzi cimukkomanisya kujatikizya bupanduluzi oobu butakatazyi?
-
Sena magwalo ngotwabala ayumya lusyomo ndomujisi mu Bbaibbele?
5. Bbaibbele lyakasinsima zintu ziyandika kapati
Amubale Isaya 44:27–45:2, akubandika mubuzyo ooyu:
-
Ino ntwaambo nzi ntolyakasinsima Bbaibbele kakucili myaka iili 200 kuti Babuloni anyonyoonwe?
Makani aakaindi asinizya kuti Mwami Koresi wa Persia ampi yakwe, bakazunda munzi wa Babuloni mu 539 B.C.E. b Bakanyona mulonga iwakali kukwabilila munzi. Nobakanjila mumunzi kwiinda mukubelesya milyango yakasiidwe bukwazi, bakauzunda kakunyina kulwana. Lino kwainda myaka iinda ku 2,500, Babuloni ucili matongo. Pele atubone Bbaibbele ncolyakasinsima.
Amubale Isaya 13:19, 20, akubandika mubuzyo ooyu:
-
Ino businsimi oobu bwakazuzikizyigwa buti?
Matongo aa Babuloni mu Iraq yamazuba aano
6. Bbaibbele lyakasinsima zintu nzyotubona mazuba aano
Bbaibbele lyaamba kuti tupona “kumazuba aamamanino.” (2 Timoteyo 3:1) Amubone Bbaibbele ncolyakasinsima kujatikizya mazuba aamamanino.
Amubale Matayo 24:6, 7, akubandika mubuzyo ooyu:
-
Ino Bbaibbele lyakaamba nzi kujatikizya mazuba aamamanino?
Amubale 2 Timoteyo 3:1-5, akubandika mibuzyo eeyi:
-
Mbuti Bbaibbele mbolyakabupandulula bube bwabantu ibapona kumazuba aamamanino?
-
Mbube nzi akati kabube oobu mbomubona?
BAMWI BAAMBA KUTI: “Bbaibbele ndibbuku lijisi twaano twakubeja.”
-
Kweelana ambomuyeeya, mbumboni nzi mbomujisi bwakuti Bbaibbele lilasyomeka?
MUBUFWAAFWI
Makani aakaindi, sayaansi alimwi abusinsimi zyoonse zitondezya kuti mulakonzya kulisyoma Bbaibbele.
Ncinzi Ncomwaiya?
-
Sena nzyolyaamba Bbaibbele nzyamasimpe naa nzyakuyeeyela buyo?
-
Muunzila nzi sayaansi moyeendelana a Bbaibbele?
-
Sena muyeeya kuti Bbaibbele lilasinsima ziyoocitika kumbele? Nkaambo nzi ncomwaambila boobo?
AMUZYIBE ZINJI
Sena kuli twaambo twasayaansi itutaluzi mu Bbaibbele?
“Sena Sayaansi Ileendelana a Bbaibbele?” (Cibalo caaintaneti)
Ino ntwaambo nzi twamasimpe tuliko kujatikizya “mazuba aamamanino”?
Atubone businsimi bwamu Bbaibbele bujatikizya Bulelo bwaba Giriki mbobwakazuzikizyigwa.
Atubone businsimi bwamu Bbaibbele mbobwakagwasya mwaalumi umwi kucinca mbwaakali kulibona Bbaibbele.
“Ndakali Kusyoma Kuti Leza Tako” (Ngazi Yamulindizi No. 5 2017)
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
