Lino ciindi cainda akati kamasiku. Bapaizi bazumina kumupa mali aansiliva aali 30 Judasi kuti amwaabe Jesu. Aboobo Judasi wasololela nkamu mpati yabasilutwe babapaizi alimwi aba Farisi, kuyakuyandaula Jesu. Bali antoomwe ankamu yabasikalumamba ba Roma ibajisi zilwanyo alimwi amweendelezi wabasikalumamba.

Kuboneka kuti ciindi Jesu naakamutanda Judasi kucakulya ca Pobwe Lyakwiindilila, Judasi wakagama kuli basilutwe babapaizi. (Johane 13:27) Bakabunganya bakapaso babo alimwi ankamu yabasikalumamba. Ambweni Judasi wakasaanguna kubatola kuŋanda ooko Jesu abaapostolo bakwe nkobakalida Pobwe Lyakwiindilila. Pele lino mpumba yabantu eeyi yazabuka Kkuti lya Kidroni alimwi yuunka kumuunda wa Getesemane. Kunze lyakunyamuna zilwanyo, bajisi malambe aminzenge, bakanzide kumujata Jesu.

Ciindi Judasi nasololela nkamu yabantu aaba ibayaabweenda kukkwezyeka Cilundu ca Maolifa, ulaalusyomo lwakuti ulikuzyi kwakumujana Jesu. Mumvwiki yainda, ciindi Jesu abaapostolo bakwe nobali kwiinda kuunka ku Betaniya alimwi akujokela ku Jerusalemu, ziindi zinji balikwiima mumuunda wa Getesemane. Pele lino masiku, alimwi ambweni Jesu uli mumudima-dima wazisamu zyamaolifa izili mumuunda. Aboobo, ino basikalumamba aaba ambweni ibatanamubwene Jesu balamuzyiba buti? Kutegwa abagwasye, Judasi ulabapa citondezyo. Waamba kuti: ‘Kufwumbwa ngonditiimyonte, ngonguwe ooyo; mumujate akumutola, atamutiji pe.’—Marko 14:44.

Naasololela nkamu mumuunda, Judasi wabona Jesu abaapostolo bakwe, eelyo wagama nguwe. Judasi wati: “Kwaamba, Rabbi!” Kumane wamyonta Jesu. Jesu wati: “Ino musa walonda nzi?” (Matayo 26:49, 50) Kalivwiila mwini, Jesu waamba kuti: “Judasi, sena waaba Mwanaamuntu kwiinda mukumumyonta?” (Luka 22:48) Pele kuzwa waawa Jesu tacikwe makani asikumwaaba ooyu!

Mpoonya Jesu weenda akunjila mumumuni waminzenge awamalambe akubuzya kuti: “Ino nguni ngomuyandaula?” Nkamu yabantu yaingula kuti: “Jesu muna Nazareta.” Cabusicamba Jesu waamba kuti: “Ndendime.” (Johane 18:4, 5) Mbokunga tiibali kucilangila eeci, bantu aabo bawida ansi.

Muciindi cakuti eeci cimubede coolwe cakutija mumudima, Jesu alimwi wababuzya ngobayandaula. Nobaamba alimwi kuti, “Jesu muna Nazareta,” cakukkazika moyo wazumanana kwaamba kuti: “Ndamwaambila kale kuti ndendime. Aboobo ikuti naa ndime ngomuyandaula, amubaleke aaba baunke.” Naaba aciindi eeci ciyoosya, Jesu wayeeya ncaambide kusaanguna kuti takasweekelwi naba omwe. (Johane 6:39; 17:12) Jesu wababamba baapostolo bakwe ibasyomeka alimwi kunyina naba omwe wasweeka “ccita buyo mwana walunyonyooko,” nkokuti Judasi. (Johane 18:7-9) Aboobo lino waamba kuti babaleke basikumutobela ibasyomeka kuti baunke.

Basikalumamba nobanyamuka akutalika kweenda kuunka kuli Jesu, baapostolo bazyiba ciyanda kucitika. Bamubuzya kuti: “O Mwami, sena tubalwane apanga?” (Luka 22:49) Jesu katanavwiila, Petro wasomona panga lyomwe akati kamapanga obilo ngobajisi baapostolo. Wauma Maliko, imuzike wamupaizi mupati, akumukosola kutwi kwakululyo.

Jesu wajata kutwi kwa Maliko akumuponya. Mpoonya wayiisya ciiyo cipati kwiinda mukulailila Petro kuti: “Pilusya panga lyako muciyobwedo candilyo, nkaambo boonse aabo babweza panga bayoojaigwa apanga.” Jesu ulilibambilide kwaangwa, nkakaambo kaako waamba kuti: “Ino Magwalo alazuzikizyigwa buti aayo aamba kuti ceelede kucitika munzila eeyi?” (Matayo 26:52, 54) Wayungizya kuti: “Sena tandeelede kunywa nkapu njaandipa Taata?” (Johane 18:11) Jesu ulayanda kucita ceeco Leza ncayanda kuti acite, nokuba kufwa buya.

Jesu wabuzya nkamu yabantu kuti: “Nkaambo  nzi ncomwaboola kuti mundijate amapanga alimwi ankoli mbuli kuti muboola kuzoojata mubbi? Buzuba abuzuba ndakali kukkala mutempele kandiyiisya, pele tiimwakandijata pe. Pele zintu zyoonse eezyi zyacitika kutegwa malembe aabasinsimi azuzikizyigwe.”—Matayo 26:55, 56.

Mpoonya nkamu yabasikalumamba, amweendelezi wabasikalumamba alimwi abakapaso baba Juda bamujata Jesu akumwaanga. Babone boobu, baapostolo batija. Pele, “mulombwana umwi”—ambweni sikwiiya Marko—wacaala munkamu yabantu aabo kutegwa atobele Jesu. (Marko 14:51) Mulombwana ooyu bamuzyiba, eelyo nkamu yabantu yasola kumujata, mpoonya walo walusikka akusiya cisani cakwe camulembo muuba-uba.