1, 2. Ino Nowa amukwasyi wakwe bakali kucita mulimo nzi, alimwi mbuyumuyumu nzi bumwi mbobakajana?

NOWA wakalyoolola musana alimwi amilambi yakwe iyakali kucisa. Amweezeezye kuti mulimubwene kakkede acisamu ciyumu, kalyookezya kwaciindi cisyoonto kumilimo yakwe kumwi kalanga bwato ibwakali kuyakwa. Kwakali kununka taala iipya, alimwi kwakali kulimvwisya coongo cazibelesyo zyamapulanga. Awo mpaakakkede, Nowa wakali kukonzya kubona bana bakwe mbobakali bayumu mumulimo wakuswaanganya mapulanga mapati-pati. Lino kakwiindide myaka iili mbwiibede, bana bakwe abamakaintu babo, alimwi amukaintu wakwe uuyandwa, boonse bakazumanana kubelekela antoomwe anguwe mumulimo ooyu. Mulimo umwi wakalicitidwe kale, pele alimwi mulimo mupati wakaciliko!

² Bantu bamubusena oobo bakali kubabona kuti boonse mbafwuba-fwuba. Mulimo wakuyaka bwato nowakali kuyaabumana, bantu bakaindila kubaseka kufwumbwa bamvwa buyo kuti kuyakuboola mvwula mpati iyakali kuyakuzuzya nyika yoonse. Lunyonyooko Nowa ndwaakali kucenjezya bantu, lwakali kulibonya mbuli kuti ncintu citakonzyi kucitika naaceya! Cakali kubakatazya kumvwisya kaambo muntu uuli boobu ncaakali kusowela ciindi cakwe—aciindi cabanamukwasyi wakwe—munzila iili boobu yabufwubafwuba. Nokuba boobo, Leza wa Nowa, Jehova, tanaakali kumubona kuti mufwubafwuba.

3. Muunzila nzi Nowa mwaakeenda aa Leza?

³ Ijwi lya Leza lyaamba kuti: “Nowa wakali kweenda a-Leza.” (Amubale Matalikilo 6:9.) Ino eeci caamba nzi? Eeci tacaambi kuti Leza wakali kweenda aano anyika pe, alimwi tacaambi kuti Nowa munzila imwi wakaunka kujulu pe. Muciindi caboobo, eeci caamba kuti Nowa wakali kumvwida Leza lyoonse alimwi wakali kumuyanda kapati Leza cakuti cakali mbuli kuti walo alimwi a Jehova bakali kweendela antoomwe mbuli mbobacita balongwe. Nokwakainda zyuulu zyamyaka, Bbaibbele lyakaamba boobu kujatikizya Nowa, lyakati: ‘Kwiinda mulusyomo lwakwe wakaipa mulandu nyika.’ (Heb. 11:7) Mbuti mbwaakacita oobo? Ncinzi swebo mazuba aano ncotukonzya kwiiya kuzwa kulusyomo lwakwe?

4, 5. Mumazuba aa Nowa, mbuti nyika mboyakaindila kubija?

⁴ Nowa wakakomenena munyika yalo iyakali kuyaabwiindila kubija. Nyika yakali mbyaabi muciindi cabasyaanyinakulu ba Enoki, muntu  uumbi iwakaluleme iwakeenda a Leza. Enoki wakalisinsimide kuti buzuba bwalubeta bwakali kuboola kubantu ibatayoowi Leza. Lino, mumazuba aa Nowa, bubi bwakaindila kuvwula. Alimwi buya, kweelana akulanga kwa Jehova, nyika yakalibijide, nkaambo yakazwide lunya. (Matl. 5:22; 6:11; Jud. 14, 15) Ncinzi cakacitika icakapa kuti zyintu ziindile kubija?

⁵ Cintu cibyaabi citaambiki cakatalika kucitika akati kabana ba Leza bamuuya, ibangelo. Umwi wabo wakazangide kale kuli Jehova, akuba Saatani Diabolosi kwiinda mukubejelezya Leza akucenga ba Adamu a Eva kuti bacite cibi. Mumazuba aa Nowa, bangelo bamwi bakatalika kuzangila bweendelezi bwa Jehova bululeme. Bakakaka busena bwabo mbobakapedwe kujulu, bakaboola aano anyika, akuba mbuli bantu, akukwata bamakaintu babotu. Bangelo aabo basikulisumpula, ibakali kuliyanda bakayunga bantu kucita zibi.—Matl. 6:1, 2; Jud. 6, 7.

6. Ino bukkale munyika bwakacinca buti akaambo ka Babbabbani, alimwi ncinzi Jehova ncaakasala kucita?

⁶ Kuyungizya waawo, ikoonana akati kabangelo abantu kwakapa kuti bamakaintu bazyale bana basankwa bapati-pati alimwi ibakajisi nguzu kapati. Ibbaibbele libaamba kuti bakali Babbabbani, calo icaamba kuti “Basikuusya,” aabo ibakali kuwisya bantu ansi kwiinda mukubauma. Babbabbani aaba bakali basilunya, bakapa kuti bukkale munyika bwiindile kubija. Nkakaambo kaako tacigambyi kuti Mulengi wakabona kuti “bubi bwa bantu baansi bulayoosya, amiyeeyo yoonse bantu njibayeeya mumyoyo yabo mibi luzutu mazuba oonse.” Jehova wakasala kuti uyakubanyonyoona bantu babi boonse kwaakwiinda myaka iili 120.—Amubale Matalikilo 6:3-5.

7. Mbuyumuyumu nzi Nowa amukaintu wakwe mbobakajana nobakali kukwabilila bana babo kukuyunga kubi kwamumazuba aabo?

⁷ Amuyeeyele buyo mbocakali ciyumu kukomezya bana munyika iili boobo! Nokuba boobo, Nowa wakacita oobo. Wakajana mukaintu mubotu. Ciindi Nowa naakakkwanya myaka yakuzyalwa iili 500, mukaintu wakwe  wakazyala bana basankwa botatwe—Semu, Hamu, alimwi a Jafeti. * Antoomwe kabali bazyali, bakeelede kukwabilila bana babo balombe kukuyunga kubi ikwakabazingulukide. Bana balombe ziindi zinji balabayanda “basinguzu” alimwi ‘abantu basimpuwo’ alimwi balombozya kuba mbuli mbabo—aboobo bana balombe aaba kweelede kuti bakali kubayanda Babbabbani. Cakali ciyumu kuli Nowa amukaintu wakwe kukwabilila bana babo kumakani mabi aa Babbabbani aaba, nokuba boobo bakali kubayiisya kasimpe ikajatikizya Jehova Leza, ooyo uutayandi bubi buli boonse. Bakeelede kugwasya bana babo kubona kuti Jehova cakali kumucisa kubona lunya alimwi abuzangi ibwakali munyika.—Matl. 6:6.

8. Mbuti bazyali basongo mazuba aano mbobakonzya kwiiya cikozyanyo cibotu ca Nowa amukaintu wakwe?

⁸ Bazyali mazuba aano balakonzya kucimvwisya mbocakali ciyumu kuli Nowa amukaintu wakwe kukomezya bana. Munyika motupona amwalo mulizwide lunya alimwi abuzangi. Kanji-kanji mumadolopo muzwide tubunga twabakubusi bazangi. Nozyiba zyakulikondelezya zibambilwa bana basyoonto zilakonzya kuti kazijisi zyintu zikulwaizya nkondo. Bazyali basongo balacita zyoonse nzyobakonzya kutegwa balwane kuyunga kubi ikuli boobu kwiinda mukuyiisya bana babo makani aamba zya Leza waluumuno, Jehova, walo uuyakumana nkondo. (Int. 11:5; 37:10, 11) Bana balakonzya kwiiya kucita zyintu zibotu munyika ino mbyaabi. Nowa amukaintu wakwe bakazwidilila. Bana babo balombe bakakomena akuba baalumi babotu, alimwi bakakwata bamakaintu ibakali kuyandisisya kubikka Leza wakasimpe, Jehova, mubusena bwakusaanguna mubuumi bwabo.

9, 10. (a) Malailile nzi Jehova ngaakapa Nowa aakacinca buumi bwakwe? (b) Ncinzi Jehova ncaakayubunwida Nowa kujatikizya mbobwakali kuyakupangwa bwato alimwi amakanze aambubo?

⁹ Bumwi buzuba, buumi bwa Nowa bwakacincila limwi. Jehova wakabandika amubelesi wakwe uuyandwa akumwaambila makanze aakwe aakuleta mamanino kunyika yakuciindi eeco. Leza wakalailila Nowa kuti: ‘Kolipangila bwato bwazisamu zyagofa.’—Matl. 6:14.

¹⁰ Bwato oobu tiibwakali mbuli mato aamazuba aano mbuli mbobayeeya bamwi. Bwato oobu tiibwakajisi kumutwe, kusyule, cisamu iciinda akati kabwato naa mubalo. Cakali buyo mbuli cibbokesi cipati. Jehova wakaambila Nowa mbobwakeelede kulampa bwato mumbazu zyoonse, malailile amwi aajatikizya mbobwakali kuyakupangwa, alimwi ambobakali kuyakunanika taala mukati akunze. Alimwi wakamwaambila kaambo ncaakali kucitila boobo, wakati: ‘Ndaleta izambangulwe lyamaanzi ansi. Boonse buyo bali munyika bayoofwa.’ Nokuba boobo, Jehova wakapanga cizuminano eeci, naa kumvwana, a Nowa, wakati: ‘Ukanjile mubwato, webo abana bako amukaako abamukabana bako.’ Nowa alimwi wakeelede kuleta abanyama bamisyobo yoonse. Aabo ibakali mubwato mbambabo balikke bakali kuyakufwutuka Zambangulwe.—Matl. 6:17-20.

11, 12. Mulimo nzi mupati ngwaakeelede kucita Nowa, alimwi ino wakacita buti kumulimo ooyu mupati?

 ¹¹ Nowa wakajisi mulimo mupati kapati. Bwato oobu bwakeelede kukomena ncobeni, bwakeelede kulampa mamita aasika ku 133 mubulamfwu, mamita aali 22 mubwamba, mamita aali 13 kuya mujulu. Bwato oobu bwakali bupati kwiinda mato mapati aamapulanga aapangwa mazuba aano. Sena Nowa wakasola kuuleya mulimo ooyu, kutongooka, naa kucinca malailile kutegwa cimuubaubile kuucita? Ibbaibbele liingula kuti: “Nowa wakacita obo. Wakacita mbubonya mbuli Leza mbwaakamulailila.”—Matl. 6:22.

¹² Mulimo ooyu wakatola ciindi cilamfwu, andiza myaka 40 naa 50. Kwakali kuyandika kugonka masamu, kwaakunkulusya, kwaafwala, kwaayelanya akwaanunga. Bwato bwakeelede kuba amaanda otatwe aamujulu, amaluumu manji, alimwi amulyango mumbali. Cakutadooneka, bwato oobo bwakalijisi amawindo mujulu, alimwi aciluli icakali cilamfwu akati kutegwa maanzi kaalokela mumabali.—Matl. 6:14-16.

13. Mulimo nzi Nowa ngwaakapedwe iweelede kuti wakali muyumu kapati kwiinda kuyaka bwato, alimwi ino bantu bakautambula buti?

¹³ Cakutadooneka, nokwakainda myaka iili mbwiibede mulimo wakuyaka bwato kauyaambele, Nowa weelede kuti wakakkomana kapati akaambo kakuti mukwasyi wakwe wakali kumugwasyilizya mumulimo ooyu! Kwakali mulimo uumbi weelede kuti wakali kukatazya kapati kwiinda kuyaka bwato. Ibbaibbele litwaambila kuti Nowa wakali “mukambausi wabululami.” (Amubale 2 Petulo 2:5.) Aboobo, cabusicamba wakasololela mumulimo wakucenjezya bantu kujatikizya lunyonyooko ilwakali kuboola kunyonyoona bantu babyaabi, ibatayandi Leza. Ino bantu bakacita nzi nobakamvwa kucenjezya ooku? Nokwakainda ciindi, Jesu Kristo wakayeeya icakacitika muciindi eeco, wakaamba kuti bantu “tiibakabikkila maano.” Wakaamba kuti bantu bakali kubikkila kapati maano kucita zyintu zyamubuumi zyabuzuba abuzuba—kulya, kunywa, kukwata, kukwatwa—cakuti kunyina nobakabikkila maano kuli Nowa. (Mt. 24:37-39) Cakutadooneka, bantu banji bakali kumusampaula walo amukwasyi wakwe; bamwi kweelede kuti bakali kumuyoosya alimwi akumukazya calunya. Alimwi bamwi kweelede kuti bakasola kunyonganya mulimo wakwe wakuyaka.

14. Ncinzi mikwasyi ya Banakristo mazuba aano ncoikonzya kwiiya kuli Nowa amukwasyi wakwe?

¹⁴ Nokuba boobo, Nowa amukwasyi wakwe kunyina nobakacileka pe. Nowa amukwasyi wakwe bakazumanana kuyaka bwato nokuba kuti bamwi bantu bakali kubona mbuli kuti kucita boobo kwakali buyo kusowa ciindi, kwakanyina mpindu, naa kuti bwakali buyo bufwubafwuba. Mikwasyi ya Banakristo mazuba aano ilakonzya kwiiya zinji kuzwa kulusyomo lwa Nowa amukwasyi wakwe. Ibbaibbele lyaamba kuti tupona ‘mumazuba aamamanino’ aabweende bwazyintu bwanyika eeyi. (2 Ti. 3:1) Jesu wakaamba kuti ciindi cesu ncotupona ciyakuba mbubwenya mbuli ciindi Nowa naakayaka bwato. Ikuti bantu munyika kabatatukkomanini, kabatusampaula, naa kutupenzya notumwaya mulumbe wa Bwami bwa Leza, Banakristo bayakucita kabotu kuyeeya cikozyanyo ca Nowa. Tabali bakusaanguna kujana buyumuyumu oobo pe.

15. Nkusweekelwa kuli buti Nowa nkwaakacitikilwa ciindi myaka yakwe yakuzyalwa noyakali afwaafwi kusika ku 600?

¹⁵ Kwakainda myaka minji kutegwa bwato bumane kuyakwa. Ciindi Nowa naakali afwaafwi kukkwanya myaka iili 600 yakuzyalwa, wakafwidwa bayandwa bakwe. Bausyi, ba Lameki bakafwa. * Nokwakainda myaka yosanwe, bakaapanyina Nowa ba Metusela ibakali bausyi baba Lameki, bakafwa kabajisi myaka iili 969 yakuzyalwa—ba Metusela mbambabo bakapona kwaciindi cilamfwu kwiinda bantu boonse akati kabantu baambidwe mu Bbaibbele. (Matl. 5:27) Metusela a Lameki boonse bobilo bakapona ciindi muntu wakusaanguna Adamu ncaakapona.

16, 17. (a) Mulumbe nzi mupya Nowa ngwaakatambula naakajisi myaka iili 600 yakuzyalwa? (b) Amupandulule cintu cikkomanisya citalubiki Nowa amukwasyi wakwe ncobakabona.

¹⁶ Kajisi myaka iili 600 yakuzyalwa, syaanene Nowa wakatambula mulumbe mupya kuzwa kuli Jehova Leza kumwaambila kuti: ‘Njila mubwato, yebo abaŋanda yako boonse.’ Aciindi ncicona eeco, Leza wakaambila Nowa kuti abweze banyama bamisyobo yoonse akubanjizya mubwato—banyama basalala ibakali kweelela kupa cipaizyo, kabali ciloba, beenze abazyazi musyobo umwi aumwi, mpoonya aaba bambi bobilo-bobilo.—Matl. 7:1-3.

¹⁷ Kweelede kuti cakali cintu citalubiki icakali cakusaanguna kubona. Kuzwa mumalundu amumasena aasiyene-siyene, banyama banji bakaboola,  bamwi kabeenda, kabauluka, kabakalaba, bamwi kabeenda asyoonto-syoonto—kabaindene kukomena, mubala abube, alimwi kabagambya. Tatweelede kuyeeya kuti Nowa wakapenga kubinga banyama kubaleta antoomwe, kubaanga ntambo, naa kunyengelela banyama bamwi kutegwa banjile mubusena bweelede mubwato. Cibalo caamba kuti ‘bakanjila mubwato kuli Nowa.’—Matl. 7:9.

18, 19. (a) Mbuti mbotukonzya kwiingula mibuzyo njobabuzya basikukazya kujatikizya makani aambidwe mucibalo camakani aamba zya Nowa? (b) Mbuti mbotububona busongo bwa Jehova munzila njaakasala kubelesya kufwutula banyama?

¹⁸ Bamwi basikukazya balakonzya kubuzya kuti: ‘Mbuti cintu cili boobu mbocakali kunga cacitika? Alimwi mbuti mbocakali kukonzyeka kubanyama abo boonse kukkala antoomwe muluumuno mubusena oobo?’ Amulange kaambo aaka: Sena muyeeya kuti Mulengi wabubumbo boonse inga waalilwa kweendelezya banyama bakwe, akupa kuti banyama aabo bakkale abantu akubalesya kuba bakali? Mutalubi kuti, Jehova ngo Leza wakalenga banyama. Nokwakainda ciindi, wakaandaanya Lwizi Lusalala alimwi akwiimika zuba. Sena inga waalilwa kucita zyintu zyaambidwe mucibalo caamba zyamakani aa Nowa? Peepe, takonzyi kwaalilwa, ngonguwe wakazicita!

¹⁹ Leza naakasala kufwutula banyama bakwe munzila imbi. Nokuba boobo, cabusongo wakasala nzila iituyeezya zyamukuli ngwaakapa bantu kumatalikilo wakulanganya zyintu zyoonse zyuumi aano anyika. (Matl. 1:28) Bamazyali banji mazuba aano babelesya makani aamba zya Nowa kuyiisya bana babo kuti Jehova ulababikkila kapati maano banyama abantu mbaakalenga.

20. Mbuti Nowa amukwasyi wakwe mbobakajisi bubi munsondo yamamanino Zambangulwe kalitanatalika?

²⁰ Jehova wakaambila Nowa kuti Zambangulwe lyakali kuyakuboola  kwainda nsondo yomwe. Kweelede kuti aciindi eeci, mukwasyi ooyu wakajisi bubi kusola kumaninizya milimo yakaceede. Amuyeeye buyo mulimo wakunjizya banyama boonse alimwi azyakulya zyabanyama azyabo beni, kuzibikka kabotu-kabotu alimwi akubikka mpasya zyabo mukati. Kweelede kuti mukaintu wa Nowa alimwi abamakaintu ba Semu, Hamu, a Jafeti bakajisi bubi kubotya busena bwakukkala mukati mubwato.

21, 22. (a) Nkaambo nzi kusampaula nkobakali kucita bantu bamumazuba aa Nowa ncokuteelede kutugambya? (b) Ndilili basimukobonyina Nowa nobakaleka kumusampaula amukwasyi wakwe?

²¹ Ino bantu bakabazingulukide bakacita buti? Bakazumanana “kutabikkila maano”—nokuba kuti zyintu zyakali kutondezya kuti Jehova wakali kumulongezya Nowa amilimo yakwe. Bakali kwiile kugambwa kubona banyama kabayoboloka akunjila mubwato. Pele kutaswiilila kwabo takweelede kutugambya pe. Mbubwenya buyo bantu mazuba aano tababikkili maano kuzyintu zitondezya kuti tupona mumazuba aamamanino aanyika yabweende oobu bwazyintu. Mbubwenya mbwaakaambila limwi mwaapostolo Petro, basikasampusampu baboola akusampaula kwabo, akufwubaazya baabo ibabikkila maano kukucenjezya kwa Leza. (Amubale 2 Petulo 3:3-6.) Mbubwenya buyo, bantu bakamusampaula Nowa amukwasyi wakwe.

²² Ino Nowa wakaleka lili kusampaulwa? Cibalo citwaambila kuti ciindi Nowa naakanjila mukati mubwato amukwasyi wakwe abanyama, “Jehova wakamujalila” mulyango. Ikuti basikusampaula bamwi bakali afwaafwi, eeco ncaakacita Leza cakabayumya mate. Ikuti naa tiicakali boobo, nkokuti imvwula yakacita oobo, nkaambo mvwula yakaboola kweelana ambwaakaambide! Alimwi yakazumanana kuwa, kuwa, kuwa—mane nyika yoonse yabbila mumaanzi, mbubwenya mbwaakaambide Jehova.—Matl. 7:16-21.

23. (a) Tuzyi buti kuti Jehova kunyina naakakkomana akaambo kalufwu lwabasimucita zibi bamumazuba aa Nowa? (b) Nkaambo nzi ncocili cabusongo kwiiya lusyomo lwa Nowa mazuba aano?

²³ Sena Jehova wakakkomana alufwu lwabantu aabo basizibi? Peepe! (Ezk. 33:11) Muciindi caboobo, wakalibapede ciindi cinji kutegwa bacince nzila zyabo akucita ciluzi. Sena nobakacikonzya kucita oobo? Buumi mbwaakapona Nowa bwakawiingula mubuzyo ooyo. Kwiinda mukweenda a Jehova, kumvwida Leza wakwe muzyintu zyoonse, Nowa wakatondezya kuti lufwutuko lwakali kukonzyeka. Munzila eeyo, lusyomo lwakwe lwakapa mulandu nyika; lwakatondezya caantangalala bubi bwabantu ibakali kupona muciindi eeco. Lusyomo lwakwe lwakamufwutula walo amukwasyi wakwe. Ikuti mwaiya lusyomo lwa Nowa, andinywe mulakonzya kulifwutula alimwi abaabo mbomuyanda. Mbubwenya mbuli Nowa, mulakonzya kweenda a Jehova Leza kali Mulongwe wanu. Alimwi cilongwe canu cilakonzya kuzumanana kukabe kutamani!