Ino inga ndacita buti kutegwa kandipaila mipailo iigwasya?
Bakubusi Balabuzya
Ino inga ndacita buti kutegwa kandipaila mipailo iigwasya?
“Ikuti kojisi zyakucita zinji kucikolo, kumulimo, noli abeenzinyoko naa banamukwasyi, zimwi ziindi inga wamuluba muntu uuyandika kapati—Leza.” —Faviola, waku United States uuli amyaka yakuzyalwa iili 15.
“AMUKOMBE cakutaleka.” (1 Ba-Tesalonika 5:17) ‘Amujatisye kukomba.’ (Ba-Roma 12:12) “Inkumbizyo zyanu zizibisigwe kuli-Leza.” (Ba-Filipi 4:6) Ikuti koli Munakristo, weelede kuti ulaazyi kale magwalo aaya. Alimwi ambweni ulizyi kuti mupailo nenzila mbotu kapati yakubandika a Leza. Koyeeya buyo—ciindi cili coonse, masikati naa masiku, ulakonzya kubandika a Leza Singuzuzyoonse. Alimwi Bbaibbele lyaamba kuti: “Ulatumvwa.” *—1 Johane 5:14.
Nokuba boobo, ulakonzya kuyeeya kuti cilakatazya kupaila mbubonya mbuli mukubusi waambwa kumatalikilo aacibalo eeci. Ikuti kolimvwa boobo, ncinzi nconga wacita? Cibalo eeci cilakugwasya (1) kubona buyumu-yumu mbobajana bamwi nobapaila, (2) mbokonzya kulibikkila mbaakani kujatikizya mipailo alimwi (3) ambokonzya kucita kutegwa mipailo yako kaivwiilwa.
Cakusaanguna, atubone buyumu-yumu mbobajana bamwi nobapaila. Mbuyumu-yumu nzi mbojana nopaila? Lemba bwiinguzi ansi aawa.
․․․․․
Intaamu iitobela nkulibikkila mbaakani. Kosala mbaakani njoyanda kuzuzikizya ali zeezyi zili ansi aawa, naa ulembe yomwe akeengo kali kumbele lya “Azimwi buyo.”
□ Ndiyanda kuti kandipaila ziindi zinji.
□ Tandiyandi kuti kandaainduluka-induluka majwi nondipaila.
□ Ndiyanda kuti kandipaila camoyo woonse.
□ Azimwi buyo ․․․․․
Kujalula “Mulyango”
Mupailo uli mbuli mulyango ujalidwe ngokonzya kujalula aciindi cili coonse. Nokuba boobo, bakubusi banji inga baamba kuti cilabaalila kupaila ziindi zinji alimwi tabalikwayi. Ikuti naa mbolimvwa oobo, utatyompwi. Walizyiba kale penzi alimwi wabikka mbaakani. Lino uyandika buyo kkii kutegwa ujalule mulyango. Kolanga-langa buyumu-yumu bumwi mbokonzya kujana ambokonzya kubumana.
▪ Loko: KUTABIKKILA MAANO. “Akaambo kakujata bubi, zimwi ziindi ndilaluba kupaila.”—Preeti waku Britain, uuli amyaka iili 20.
Kkii: “Amucenjele loko mbumweenda. Muteendi mbuli bafubafuba, pe, amweende mbuli basimaanu. Amujatisye loko ciindi canu coonse, nkaambo kakuti mazuba aasunu mabi.”—Ba-Efeso 5:15, 16.
Muzeezo: Kosala ciindi ceelede nokonzya kupaila abuzuba. Ulakonzya kulemba apepa kutegwa kotalubi. Yoshiko waku Japan, uuli amyaka iili 18 wakaamba kuti: “Ikuti naa tiindasalila limwi ciindi cakupaila, ndilaakujata bubi akuluba kupalila.”
▪ Loko: ZINYONGANYA. “Ndilaakunyongana ndanikupaila cakuti ndilaakuluba nzyondaamba mumupailo.”—Pamela waku Mexico, uuli amyaka iili 17.
Kkii: “Mulomo ulagwisya aata mumoyo.”—Matayo 12:34.
Muzeezo: Ikuti lyoonse wani kupaila koluba nzyoamba, kosoleka kupaila mipailo mifwaafwi kusikila limwi uzyibile. Muzeezo umwi ngwakuti: Kopailila zyintu zikukatazya azyintu nzyoyanda kumulumba Jehova. Marina, imusimbi waku Russia, uuli amyaka iili 14 wakaamba kuti: “Nindakakubuka, ndakazyiba kuti mupailo nkwaambaula a Leza. Eeci cakandipa kuti kandimwaambila zyoonse zili kumoyo wangu.
▪ Loko: CILENGWA. “Nendipaila ndilaakuziinduluka nzyondaamba.”—Dupe waku Benin, uuli amyaka iili 17.
Kkii: “Mbike moyo wangu kuncito zyako zyoonse, akuyeeya-yeeya milimo yako yakalekale.”—Intembauzyo 77:12.
Muzeezo: Ikuti lyoonse wani kupaila koziinduluka nzyoamba, abuzuba kolemba cintu cibotu ncaakucitila Jehova. Mpoonya komulumba akaambo kakuti wakulongezya. Wacita oobo nsondo yoonse, uyakujana kuti wapailila twaambo tuli ciloba kakunyina kuziinduluka nzyoamba. Kozumanana kucita oobo lyoonse. Bruno, waku Brazil wamyaka iili 21 wakaamba kuti “Abuzuba, ndilaakupailila zyintu zyacitika buzuba oobo.” Samantha waku United States, uuli amyaka iili 18 awalo mbwacita oobo. Wakaamba kuti: “Ndilaakubikkila maano kuzyintu zyacitika buzuba oobo iziindene azyakacitika mazuba aainda, mpoonya ndilaakuzipailila. Eeci cindigwasya kuti kanditainduluki majwi ndani kupaila.”
▪ Loko: KUDOONEKA. “Buzuba bumwi nindakajana penzi kucikolo ndakapaila, pele kunyina nilyakamana. Mapenzi akali kuya buvwula buya. Ndakayeeya kuti, ‘Tandeelede kuzumanana kupaila nkaambo Jehova taswiilili akuswiilila!’”—Minori waku Japan, uuli amyaka iili 15.
Kkii: “Antoomwe alutepauzyo ulacita cipolelo, kuti mukabe alukolelo.”—1 Ba-Korinto 10:13.
Muzeezo: Masimpe ngakuti: Jehova ‘ulaswiilila zikombyo.’ (Intembauzyo 65:2) Aboobo, wamana kupailila makani amwi, weelede kukkala ansi kuyeeya kutegwa ubone mbwatiikugwasye Leza. Muciindi cakulangila kuti mupailo wako wiingulwe mbubwenya mboyeeyela, weelede kuyeeya kuti Leza ulakonzya kukwiingula munzila imbi. Mbokunga uli Munakristo alimwi ulaliyumya, eeci cilakonzya kutondezya kuti Jehova wakawiingula kale mupailo wako—ikutali kwiinda mukulimana penzi lyako, pele kwiinda mukukupa nguzu zyakuti uliyumye.—Ba-Filipi 4:13.
▪ Loko: KUFWA NSONI. “Ndayeeya mbobakonzya kundibona basicikoloma ikuti bandibona kandipaila kanditanalya cakulya camasikati, ndilaakufwa nsoni.”—Hikaru waku Japan, uuli amyaka iili 17.
Kkii: “Zintu zyoonse zilijisi ciindi cazyo.”—Mukambausi 3:1.
Muzeezo: Nokuba kuti bantu balakonzya kukkomana kukubona kopaila, toyelede kucita oobo kutegwa bantu boonse bakubone kuti upaila buya. Mucikozyanyo, mupailo mufwaafwi Nehemiya ngwaakapaila naakali a Mwami Aritasasta wakali wamumoyo alimwi kunyina makani aatondezya kuti mwami wakazyiba kuti Nehemiya wakali kupaila. (Nehemiya 2:1-5) Andiwe ulakonzya kupaila kuli Jehova mumoyo kakunyina akulitondezya kuti ulapaila.—Ba-Filipi 4:5.
▪ Loko: KUTALIKWAYA. “Jehova ulaazyi kale mapenzi aangu alimwi ndiyeeya kuti awalo alamucima mbubonya mbwaandicima. Zimwi ziindi tandilikwayi kwaambaula anguwe.”—Elizabeth waku Ireland, uuli amyaka iili 20.
Kkii: “Makatazyo aanu oonse amwaasowele kumaanza [aa Leza], nkaambo nguumucebuka lyoonse.”—1 Petro 5:7.
Muzeezo: Nobala Bbaibbele, kovwuntauzya akukkala ansi kuyeeya ncaamba magwalo aaya aatobela: Luka 12:6, 7; Johane 6:44; Ba-Hebrayo 4:16; 6:10; 2 Petro 3:9. Aya magwalo alakugwasya kuzyiba kuti Jehova ulayanda kuswiilila mipailo yako akuti tasali pe, ulaswiilila mipailo ya Banakristo boonse. Sintembauzyo Davida—iwakali amapenzi mubuumi bwakwe—wakasyoma kuti “Jehova uli afwaafwi kubawizukide mumoyo, ulafutula batete myuuya.” *—Intembauzyo 34:18.
Akaambo kakuti Jehova ulaiswiilila mipailo yako ncitondezyo cakuti ulakuyanda. Nicole waku Italy uuli amyaka iili 17 wakaamba kuti: “Jehova taakwe naakapa mukuli wakuswiilila mipailo yesu kubangelo. Eeci citondezya kuti Leza ulaibikkila maano mipailo yesu.”
Bupanduluzi buyungizidwe
^ munc. 4 Mulengi wesu taswiilili buyo mipailo iipailwa cakupozya, ‘ulamvwa’ niiba yeeyo iipailwa cakaumuumu naa mumoyo.—Intembauzyo 19:14
^ munc. 32 Ikuti naa uyeeya kuti cibi ncookacita ncipati cakuti Leza taiswiilili mipailo yako, weelede kubaambila bazyali bako. Alimwi weelede ‘kwiita baalu bambungano kuti bakugwasye.’ (Jakobo 5:14) Ibaalu balakonzya kukugwasya kuti ube acilongwe a Leza alimwi.
TWAAMBO TWAKUYEEYA
▪ Nzyintu nzi zipati nzyayanda Jehova nzyokonzya kupailila?
▪ Makani nzi aajatikizya bamwi ngokonzya kubikkilizya mumupailo?
[Kabbokesi/Zifwanikiso izili apeeji 20]
NZYOBAAMBA BEENZINYOKO
“Imupailo uli mbuli kabbuku molembela maseseke aajatikizya zyintu nzyocita abuzuba, ikakonzya buyo kubonwa anduwe alimwi a Jehova.”—Olayinka, waku Nigeria.
“Koyeeya buyo mbonga walimvwa ikuti buzuba bumwi imweenzinyoko ngookapa zyintu zinji waleka kukwambauzya. Oobo mbwanga walimvwa Jehova ikuti twaleka kupaila kulinguwe.” —Chinta, waku Australia.
“Lyoonse ndakali kuyeeya kuti taciluzi kwaamba mbondilimvwa. Ikupaila kwandigwasya kuzyiba kuti ikukkomana, kuusa, kunyongana alimwi akuzyaamba zyintu eezyi kuli Jehova kuli buyo kabotu. Lino ndilaakukkazyika moyo noliba leelyo nondili mumapenzi.” —Amber, waku United States.
[Cifwanikiso icili apeeji 19]
Ikuti kacikukatazya kupaila, inga wabelesya twaambo tuli Mujwi lya Leza, Ibbaibbele ituli mbuli makkii