Zileleko Ziinda Buvwubi

BA JON bakkala mucisi ca United States bakali kubeleka mulimo uuvwolelwa muzyeete. Kabacili bakubusi, bakeenda mumasi manji alimwi bakali kujana mali manji. Balo abakaintu babo bakalijisi ŋanda mbotu alimwi bakali kukkala kabotu. Bantu banji bakali kubaamba kuti balilelekedwe.

Amubone cikozyanyo cimbi. Akati kabantu bainda ku 5,000 bakalembela mulimo kubbanga pati lyaku Europe, ba Kostas bakaba acoolwe cakuba akati kabantu bali 80 bakasalwa. * Mumyaka buyo misyoonto yakatobela, bakabeleka mumakkampani aaindene-indene alimwi bakasumpulwa cakuti bakaba acuuno cakulanganya cibeela cipati mubbanga limwi. Nibakacileka kubeleka kukkampani eeyo bakatalika kkampani yabo alimwi bakali kujana mali manji kwiinda ngobajana bantu bamwi mubuumi bwabo boonse. Bakali kulimvwa kuti balilelekedwe.

Nokuba boobo, basankwa aaba bobilo balizyi kuti kuli zileleko ziinda buvwubi. Mucikozyanyo, ba Jon lino babeleka mulimo wakulisungula iwakuyiisya bantu Bbaibbele akubagwasya kuba acilongwe a Leza. Ba Jon baamba kuti: “Ndalibonena kuti buvwubi tabupi kukkomana pe. Kubeleka canguzu kuti buvwubi butamani kupa  kuti ubule ciindi cakucita zyintu zimbi. Kulubazu lumwi, ikupona kweelana anjiisyo zyamu Bbaibbele kuletela zileleko zinji mbuli kukkala kabotu mucikwati, luumuno alimwi amanjezyeezya mabotu.”

Abalo ba Kostas baamba kuti: “Leza tayandi kuti katuyandisya kuba azyintu zinji zyakumubili. Ndilimvwa kuti kufwumbwa zyintu nzyatupa iziinda zyeezyo nzyotuyandika kuti katupona, tweelede kuzibelesya kweelana amakanze aakwe.” Caino-ino, ba Kostas amukwasyi wabo, bakatalika kwiiya mwaambo uumbi kutegwa bayiisye bantu banji injiisyo zyamu Bbaibbele. Baamba kuti: “Twabona kuti ikupa kupa kuti katukkomana kapati kwiinda kupegwa.”—Incito 20:35.

Masimpe, boonse bobilo ba Jon aba Kostas babona kuti zileleko zyakumuuya zilayandika kapati kwiinda buvwubi. Bahaabupampu baacikolo cipati ca Harvard ba Daniel Gilbert, bakaamba kuti basyaabusongo ibabona mbwiibeleka mizeezo “bali kwiiya kwamyaka minji kutegwa bazyibe buvwubi mbobweendelana alukkomano, alimwi bajana kuti buvwubi bupa kuti muntu akkomane ikapati ikuti naa walimucete.” Pele bakayaambele kwaamba kuti, “ikuti katakkutili azyintu nzyajisi, takonzyi kukkomana.”

Kwiiya Munzila Iikatazya

Mwaalumi umwi wakaamba kuti: “Icigambya ncakuti, bantu bavwubide tabakkomani kapati.” Kumatalikilo aamwaanda wamyaka wamana, simubweza twaambo umwi wakaiya ciiyo naakali kubuzya ba Andrew Carnegie, ibakali kubeleka mulimo wakubamba zibulo, alimwi bakali akati kabantu bavwubide kapati munyika yoonse aciindi eeco. Ba Carnegie bakamwaambila kuti: “Bantu tabeelede kunyomenena mbondikkala. Ino mbuti lubono lwangu mbolukonzya kundigwasya? Ndilaamyaka iili 60 alimwi tandicikonzyi kutafwuna kabotu.  Ibukubusi akutaciswa-ciswa nozyali kuulwa, nindazyuula alubono lwangu loonse.”

Simubweza twaambo wakayungizya kuti: “Kumane ba Carnegie, bakacenguluka kumwi kabakopene kapati mumizeezo akwaamba ajwi lyaansi-ansi kuti, ‘Inga ndauzya zyoonse nzyondijisi kutegwa ndibe mukubusi alimwi.’” Aumwi wakavwubide kapati kwiinda mukuulisya mungwimba, J. Paul Getty, wakaazumina makani aaya kati: “Imali taapi muntu kukkomana lyoonse. Aletela buyo mapenzi.”

Mulakonzya kukazumina kaambo kamwi kasikulemba Bbaibbele umwi wakalomba kuti: “Utandipi bucete nanka buvubi; undisanine zilyo zyeelede, kuti ntakutisyi akukukaka cakwaamba kuti, Ma! Ngwani Jehova? Alimwi ntapengi mubucete akubba akusampaula izina lya-Leza wangu.”—Tusimpi 30:8, 9.

Solomoni, Mwami waku Israyeli yansiku wakaamba kuti: “Ndakali kuya bukomena kwiinda boonse ibakanditaangunina mu-Jerusalemu.” Nokuba boobo wakaamba kuti: “Zintu zyoonse nzyabuyo. Tazigwasyi pe.” Alimwi Solomoni wakaamba kuti: “Lulongezyo lwa-Jehova lulavubya, alimwi tayungizyi mause kulindulo.”—Mukambausi 2:9-11; 5:12, 13; Tusimpi 10:22.

Mbomukonzya Kujana Zileleko Zitamani

Mubwini, tulakonzya kuba alukkomano lwini-lwini alimwi lutamani kwiinda mukuba acilongwe a Leza. Ikuti naa Leza twamubikka mubusena bwakusaanguna, tulakonzya kukkomana mubuumi bwesu boonse.

Tulikkomene ikuzyiba kuti ipenzi lyamali liya kumana. Ibbaibbele litusyomezya bukkale bubotu kumbele eelyo bulyato abusyaacivwule mwangu nobuya kumana. (1 Johane 2:15-17) Bweende bwazyintu bupya bwa Leza buna kweendelezyegwa anjiisyo zyakwe ziluleme. Inyika iyakuba paradaiso kweelana amakanze ngaakajisi Leza naakabikka banabukwetene bakusaanguna mulinjiyo. Eelo kaka kunakukkomanisya ikukkala munyika yaluumuno alimwi izwide bantu bayandana!—Isaya 2:2-4; 2 Petro 3:13; 1 Johane 4:8-11.

Aciindi eeco, buumi bunakukkomanisya. Tuya kulelekwa kumuuya akumubili ciindi Leza aakuzuzikizya makanze ngaakajisi kumatalikilo aakuti bantu kabapona lyoonse kukabe kutamani anyika. Tusyomezyegwa kuti kuya kuba zyakulya zinji, maanda mabotu amilimo iikondelezya. Bucete buya kumana do!—Intembauzyo 72:16; Isaya 65:21-23; Mika 4:4.

Boonse basyoma Jehova, Leza wakaanza Bbaibbele, tabakausyigwi nsoni pe. (Ba-Roma 10:11-13) Aboobo, kulagwasya kucita zyintu lino zikonzya kutupa kuba azileleko ziinda buvwubi—1 Timoteo 6:6-10.

Bupanduluzi buyungizidwe

[Majwi aakwelelezya sikubala aali apeeji 8]

Ikuti naa Leza twamubikka mubusena bwakusaanguna, tulakonzya kukkomana mubuumi bwesu boonse

[Cifwanikiso icili apeeji 8]

Ikwaabelesya kabotu mali kulakonzya kutupa kukkomana