Bakubusi Mbobakonzya Kugwasyigwa

Ikuti naa zyintu zyoonse nozyali kabotu munyika, bazyali boonse nobali kubalaya alimwi akwiisya banababo lyoonse. Nobali kubandika ambabo, kubabalila, kulya ambabo alimwi akubikkila maano kuzyintu nzyobaamba. Nokuba boobo, bazyali tabalondokede pe. Ibbaibbele lilaamba cakusalazya kuti: “Nkaambo boonse babisya akulela kubulemu bwa-Leza.”—Ba-Roma 3:23.

Ikuti koli mukubusi ulakonzya kuyeeya kuti buumi mbomupona kuŋanda tabuli kabotu alimwi andiza inga koluzi kuyeeya boobu. Nokuba boobo, kuli zyintu zinji nzyokonzya kucita kutegwa kokkomana akutalibilika kapati. Atulange-lange njiisyo zyamu Bbaibbele mbozikonzya kukugwasya ikuti naa wazibelesya.

Muzeezo wakusaanguna

Koyanzana Abantu Muciindi Cakulizandula

“Uulipambukanya ulayandaula zisusi zyakwe mwini, ulasowa kubeteka koonse kubotu.” (Tusimpi 18:1) Bakubusi bamwi tabalikwayi ikuti kabali abantu bamwi alimwi babona kuti ncuuba-uba kweebelela cipekupeku naa kusobana zisobano zyaavidiyo. Bamwi balalizandula akaambo kakuti balaansoni kapati. Mukubusi wiitwa kuti Elizabeth ulyaamba kuti “ndila nsoni zitamani alimwi ndilaakuyoowa. Cilandikatazya kubandika abantu.”

Ino ncinzi ncacita Elizabeth kutegwa azunde penzi lyakuba ansoni? Elizabeth ngu Kamboni wa Jehova aboobo ulajanika ciindi coonse kumiswangano ya Bunakristo. Elizabeth waamba kuti: “Nokuba kuti ndilaansoni, ndijisi mbaakani yakwaambaula amuntu omwe lyoonse ndaunka kumiswaangano. Ikuti naa ndakakilwa kucita boobo, tandityompwi pe. Muciindi caboobo, ndibikkila maano kuzyintu nzyondicita kabotu. Ndajana kuti kuzyiba bantu candigwasya kapati.”

Ulakonzya kulemba mazyina aabantu bobilo naa botatwe mboyanda kuzyiba kabotu. Kolibikkila mbaakani yakuti uzyibe kaambo komwe kapya kujatikizya bantu aabo nsondo iiboola. Wamana kucita boobo kolemba cintu comwe ncoyanda kuya kumucitila aumwi wabantu aabo mukati kamwezi uuboola, mpoonya ucite oobo.—Incito 20:35.

Ikuti naa walizandula kubantu bamwi akumapenzi aabo, cakutadooneka ulakonzya kutalika kulibilika kapati kujatikizya buumi bwako. Kunze lyaboobo, Ibbaibbele litulailila kuti “tamweelede kuyeeya kuligwasya nubeni luzutu, pe, umwi aumwi uleelede kwiingasila kugwasya mweenzinyina.” (Ba-Filipi 2:4) Ikuti naa waitobela njiisyo eeyi ciindi noyanzana abanamukwasyi alimwi abantu bamwi mboyaanya, inga watalika kwaalanga kabotu mapenzi ngojisi alimwi ulakonzya kuzyiba mbokonzya kwaazunda.

 Muzeezo wabili

Amucije Bwaamu

“Amucije bwaamu. Zibi zyoonse nzyacita muntu zili anze amubili, pele sibwaamu ulabisizya mubili wakwe mwini.” (1 Ba-Korinto 6:18) Ino mbuti mbomukonzya kukaka kusungilizyigwa koonana nokuba kuti ncintu cidumide kapati akati kabakubusinyoko?

Cakusaanguna, weelede kwaalanga-langa makani aaya nolitanasika sunko. Ikasimpi kamu Bbaibbele kaamba kuti: “Muntu uucenjede ulayeeya kabotu kweenda kwakwe.” (Tusimpi 14:15) Mbali, imukaintu uukkala kucisi ca South Africa waamba kuti: “Nondakali kucikolo casekondali, kuli musankwa umwi ngotwakali limwi mucikolo iwakali kuyanda kuti toonane. Basimbima kucikolo bakali kundisungilizya kuti ndizumine kusyabwa amusankwa ooyu akaambo kakuti wakali kuboneka kabotu—wakalizyibidwe abantu banji alimwi wakali kuuma abbola kucikolo. Nokuba kuti ndakabona kuti musankwa ooyu mubotu, ndakalisalide kale kuti tandikonzyi kuleka kulilemeka. Beenzuma bakali kuyeeya kuti kunyina cilubide akoonana. Pele ndakalizyi cibotu acibi alimwi ndakasalila limwi ncondakeelede kucita kanditana janika mubukkale buli boobu.”

Cabili, kopaila kuli Leza kuti akugwasye kuzumanana kutobela zyeelelo zyakwe zyakulilemeka. Maggie, imukubusi uukkala kucisi ca England waamba kuti: “Mupailo undipa nguzu zyakukaka ciindi nondisungilizyigwa koonana. Ndilizyi kuti tandikonzyi kuzwidilila munguzu zyangu. Alimwi makani aaya ndilaakwaabandika abazyali bangu alimwi zimwi ziindi abeenzuma bamwi basimide.”

 Muzeezo watatu

Koba Alweetelelo Kubazyali Bako

“Amube amoyo omwe, amube akweetelelana akuyandana kwabunyina, aluzyalo, amoyo mutete.” (1 Petro 3:8) Kunyina ncokonzya kucita ikuti bazyali bako basala kuti baandaane naa balekane, naa boonse bobilo basala kuti kababeleka. Pele ikuti koyanda, ulakonzya kusala kuti eezyi zyintu zinyonganye cilongwe cako ambabo. Ikuzumanana kuba alweetelelo kubazyali bako kwiinda mukumvwisya buyumuyumu mbobajana nenzila yomwe iikonzya kupa kuti kokkomana akutalibilika kapati mubuumi.

Mukubusi wiitwa kuti Amber wakalubelesya lulayo oolu. Waamba kuti zimwi ziindi kuli zyintu zipa kuti walo abanyina baimpane, bakazyanye alimwi akunyemezyanya. Nokuba boobo, waamba kuti: “Bamaama baliyumya muzyintu zinji mubuumi bwabo. Batukomezya balikke, mebo, bapati bangu basankwa bobile alimwi amusyoonto wangu musankwa. Bamaama balatupa zyoonse ziyandika, ŋanda, zyakulya azyakusama. Kuliyumya kwabo kulandigambya kapati, aboobo ndiyanda kuti andime ndikaliyumye ndaakujana buyumuyumu.”

Ikuti naa wasola kulibikka muciimo cabazyali bako akulimvwa mbuli mbobalimvwa, ciyoopa kuti kwaalanga kabotu mapenzi aako. Alimwi ikucita boobo kulakonzya kukugwasya kubona bube bubotu mbobajisi bazyali bako alimwi akubutobela.

Nkokonzya Kujana Lulayo Lugwasya

Mizeezo yapegwa atala aawa ili akati kalulayo lwabusongo lutalivwulili lujanika mu Jwi lya Leza, Ibbaibbele. Noiya makani aali mu Bbaibbele, uyoozyiba kuti lulayo luli mulindilyo lulagwasya. *

Nzila imwi iikonzya kukugwasya kwiiya makani aali mu Bbaibbele nkuyanzana a Bakamboni ba Jehova akwiiya Bbaibbele ambabo. Akati kabantu aaba uyoojana balongwe beni-beni ibakonzya kukugwasya muciindi camapenzi akukugwasya kubona mbokonzya kubelesya lulayo lwabusongo luli mu Bbaibbele. Mubwini, kutobela zyeelelo zyamu Bbaibbele tacili cuuba-uba pe. Pele ikuti wasala kupona munzila eeyi, uyoogwasyigwa mubuumi bwako boonse.—Isaya 48:17, 18.

Bupanduluzi buyungizidwe

[Kabbokesi/Zifwanikiso izili apeeji 8]

Bakubusi Ncobayanda Kuzwa Kubazyali Babo

Bakubusi bayanda Ciindi Cakuba Abazyali Babo: Jehova Leza wakaambila bazyali bana Israyeli kuti bakeelede kubandika abana babo lyoonse—“ciindi cakukala muŋanda aciindi cakweenda munzila, ciindi cakoona aciindi cakubuka.” (Deuteronomo 6:6, 7) Kutegwa bacite boobo, bazyali beelede kujana ciindi cakuba abana babo. Cakutadooneka, Jesu wakalizyi kuti wakeelede kujana ciindi cakuba abana. Mucikozyanyo, ciindi bantu ‘nobakamuletela twana kuti atwaampe,’ ino Jesu wakacita buti? “Wakatubukata, watulongezya akutubikila maanza aakwe.” (Marko 10:13, 16) Elo kaka eeci ncikozyanyo cibotu kubazyali!

Bakubusi Bayanda Kubandika Cakulikwaya Acamoyo Woonse: Ibbaibbele lyaamba kuti: “Mibandi ilasinkinizigwa naa kwabula [kubandika kwamaseseke, NW].” (Tusimpi 15:22) Kuti naa kubandika kwamaseseke kwalikuyandika bana nobakacili baniini nkokuti kulayandika kapati mumyaka yabukubusi—ciindi bana nobalangilwa kutakkala aŋanda alimwi nobasowa ciindi abeenzyinyina bakucikolo alimwi abeenzyinyina bambi. Ikuti kakunyina kubandika kwamaseseke—kakunyina kubandika cakulikwaya acamoyo woonse akati kabana abazyali—bakubusi balakonzya kulibonya mbuli kuti mbeenzu mumukwasyi.

Bakubusi Beelede Kulaigwa: Kulaya caamba kululamika alimwi akuyiisya—nokuba kuti kusubula akwalo inga kwayandika. Lugwalo lwa Tusimpi 15:5 lwaamba kuti: “ Mufubafuba ulasampaula lulayo lwawisi, pele uuswiilila kutapatilwa musongo.” Mukubusi takonzyi ‘kuswiilila lulayo’ ikuti kalutako. Masimpe ngakuti, bazyali nobalaya bakubusi, tabeelede kutikila kubbazu lyomwe. Tabeelede kuciindilizya kunyema ikuti bana balubizya andiza kubanyemena cakunga bana babo baleka kulisyoma. (Ba-Kolose 3:21) Nokuba boobo, bazyali tabeelede kubalendekezya bana babo alimwi akukakilwa kubapa lwiiyo luyandika kapati. Ikulendekezya bana kulakonzya kuleta mapenzi. *

Bupanduluzi buyungizidwe