“Ndiyanda Kuti Tulekane!”

Iŋanda yasopoka itondezya kuti tiibambwi kabotu. Kwamyaka minji yali kwiimvwi nji, muziindi zyamvwula naa guwo. Pele lino yabaaŋanzi alimwi ilaafwi kuwa.

OOBU mbozibede zikwati zinji mazuba aano. Sena mubona kuti acalo cikwati cenu mbocibede oobu? Ikuti kakuli boobo, amuzyibe kuti tamuli nyolikke pe, banabukwetene boonse balijisi mapenzi. Alimwi Ibbaibbele lilaamba cakusalazya kuti aabo bakwatana balangilwa ‘kujana mapenzi.’—1 Ba-Korinto 7:28.

Kukankaizya mbwaali aamasimpe majwi aaya, kabunga kabasikuvwuntauzya kamwi kaamba kukwatana kuti “ncintu cikonzya kuletela ntenda pele bantu banji ncobakazyibila kucita.” Bakayungizya kuti: “Kumatalikilo nkuyanzana kukondelezya alimwi ikujisi zisyomezyo zibotu pele kumbele cilakonzya kupa muntu kutyompwa akupenga kapati mubuumi bwakwe.”

Ino cikwati cenu cili buti? Sena mulakatazyigwa apenzi lyomwe naa aainda ali lyomwe akati kayaaya aatobela?

● Kuzwangana lyoonse

● Kubelesya majwi mabyaabi

● Kutasyomeka

● Kusulaikana

Ikuti naa tamukkali kabotu mucikwati cenu alimwi mubona mbuli kuti mulaafwi kulekana, ino ncinzi ncomweelede kucita? Sena kulekana njenzila yakumana mapenzi?

[Kabbokesi/Cifwanikiso icili apeeji 3]

“ICINTU CATAKALI KUCITIKA-CITIKA LINO CABA CILENGWA BUYA”

Mumasi aamwi, ibantu balekana bavwula kapati. Amuyeeye cisi ca United States, kwamyaka minji ikulekana tiikwakadumide mucisi oomu. Mubbuku lyabo litegwa The Divorce Culture, ba Barbara Dafoe Whitehead bakalemba kuti kuzwa mu 1960 “imweelwe wabantu balekana wakayungizika kapati. Mumikwasyi iisumpukide yamumasi Aabukuwa, mweelwe ooyu wakali kuyungizika ziindi zyobile mumyaka iili kumi alimwi wakazumanana kuyaambele mane kusikila muma 1980. Aboobo, akaambo kakuyungizika ooku, ikulekana kwatakali kucitika-citika, lino caba cilengwa buya akati kabana America kwamyaka iili 30.”