Mbomukonzya Kwaambaula Cabusongo

‘NENDATAKABELESYA majwi ngondakaamba!’ Sena kuli nomwakalimvwide boobo? Inzya, toonse tulijisi penzi lyakweendelezya mulaka. Bbaibbele lyaamba kuti tulakonzya kweendelezya misyobo yabanyama boonse, “pele kunyina muntu naba omwe uukonzya kweendelezya mulaka.” (Jakobo 3:7, 8) Aboobo sena tatweelede kusola kuuzunda? Peepe! Atulange lange njiisyo zyamu Bbaibbele zikonzya kutugwasya kweendelezya cizo camubili ciniini pele cijisi nguzu kapati.

● “Mukuvwula kwamajwi tamubuli mulandu, Pele oyo uukasya milomo yakwe musongo.” (Tusimpi 10:19). Ikuti katwaamba majwi manji, tulakonzya kwaamba cabufwuba-fwuba naa majwi mabi. Inzya, mulaka uuteendelezyegwi inga waba mbuli mulilo, uumwaya kuvwiya abubeji. (Jakobo 3:5, 6) Nokuba boobo, kuti “twakasya milomo yesu” naa kuyeeya katutanaamba, tutondezya kubikkila maano kucintu cikonzya kucitika akaambo kamajwi eesu. Munzila eeyi, bantu balatuzyiba kuti tuli basongo, mpoonya balakonzya kutulemeka akutusyoma.

● “[M]weelede kufwambaana kuswiilila, kumuka kwaambaula, kumuka kukalala.” (Jakobo 1:19) Bamwi balalumba notuswiilila nzyobaamba, akaambo kakuti tutondezya bulemu kutali buyo kubikkila maano. Pele mbuti kuti umwi waamba cintu cimwi cinyemya? Nkokuti tweelede kusola “kumuka kukalala” kwiinda mukutapilusya majwi aanyemya. Tatukonzyi kuzyiba ambweni muntu ooyo walinyemede akaambo katwaambo tumwi alimwi ulakonzya kulilekelela akaambo kamajwi aakwe mabi. Sena cilamuyumina “kumuka kukalala”? Nkokuti amupaile kuli Leza kuti amugwasye kulyeendelezya. Uyooingula mipailo yanu iili boobu.—Luka 11:13.

● “Lulimi lutete lulabombya zifuwa.” (Tusimpi 25:15) Kwiindana amizeezo iidumide, kuba amoyo mutete tacaambi kukompama. Mucikozyano, nokuba kuti mulakazyigwa kapati ambweni akaambo kabukali naa kusulaikwa, ikuti mwaingula amoyo mutete inga kwapa kuti baleke kumukazya. Masimpe, cilakonzya kukatazya kuba amoyo mutete, ikapati ikuti kamunyemede. Aboobo amuyeeye mpindu zijanwa mukutobela ncolyaamba Bbaibbele alimwi amapenzi aalangilwa akaambo kakutacita boobo.

Masimpe njiisyo zyamu Bbaibbele “mbusongo buzwa kujulu.” (Jakobo 3:17) Notubelesya busongo oobu notwaambaula, majwi eesu alaba abulemu, luyando, akuyaka—mbuli “micelo yangolida mucisuwo cansiliva,” aambwa kuciindi ceelede.—Tusimpi 25:11.