Ibbaibbele Ndibbuku Ndyomukonzya Kusyoma—Cibeela 6

Roma Kuciindi ca Bbaibbele

Eeci ncibalo cacisambomwe mumulongo wazibalo zyamu “Sinsimuka!” izili ciloba izibandika masi aayendelezya nyika yoonse aali ciloba aambwa mu Bbaibbele. Makanze ngakutondezya kuti Bbaibbele lilasyomeka alimwi lyakasololelwa a Leza akuti mulumbe uuli mumo ulapa bulangizi bwakuti mapenzi oonse aaboola akaambo kalunya lwabasikudyaaminina bantunyina ayoomana.

JESU wakatalisya Bunakristo kuciindi ca Bwami bwa Roma, alimwi muciindi nciconya eeci, basikumutobela bakamwaya mulumbe wa Bunakristo mumasena manji. Mulakonzya kujana migwagwa, mifwolo yameenda, alimwi azibumbwa, izyakapangwa abana Roma mumasena manji kubikkilizya aku Britain alimwi aku Egypt. Zyintu eezyi nzyobakasiya bana Roma nkozili ncobeni. Zituyeezya kuti Jesu abaapostolo bakwe bakaliko ncobeni akuti nzyobakaamba akucita nzyamasimpe. Alimwi ikuti kamweenda mumugwagwa wansiku wiitwa kuti Appian Way, nkokuti mweenda mumugwagwa nguwenya mwakali kwiinda mwaapostolo Munakristo Paulo kuya ku Roma.—Milimo 28:15, 16.

Makani Aazyakaindi Aasyomeka

Imakani aajatikizya Jesu abaapostolo bakwe aalembedwe mu Bbaibbele alabikkilizya amakani aazyintu zyakacitika kaindi mumwaanda wamyaka  wakusaanguna. Amubone mulembi wa Bbaibbele Luka mbwaakaamba kujatikizya mwaka nokwakacitika zyintu zyobile ziyandika kapati eezyi: matalikilo aamulimo wa Johane Mubbapatizi alimwi alubbapatizyo lwa Jesu, iciindi naakaba Kristo naa Mesiya. Luka wakalemba kuti zyintu eezyi zyakacitika “mumwaka wakkumi amusanu wabulelo bwa Tiberiyo Kaisala [29 C.E.], Pontiyo Pilato naakali mweendelezi wa Judaya, Heloda wakali mweendelezi wacibeela cacooko ca Galilaya.” (Luka 3:1-3, 21) Luka alimwi wakaamba kujatikizya beendelezi bone—Filipo (imwanookwabo Heroda), Lusaniyo, Anasi alimwi a Kayafa. Mazyina oonse aali ciloba akaambwa alimwi abantu bakali kulemba makani aazyakaindi. Kwaciindi cino atulange-lange beendelezi botatwe, ba Tiberiyo, Pilato, alimwi a Heroda.

Tiberiyo Kaisala ulizyibidwe kapati, alimwi ulatondezyegwa mbwaakali kulibonya muzyakuzekaula. Wakabikkwa mubweendelezi abamu Ŋanda Yamilawo yaku Roma mu September 15, mumwaka wa 14 C.E., ciindi Jesu naakajisi myaka iili 15 yakuzyalwa.

Izyina lya Pontiyo Pilato lilajanika antoomwe azyina lya Tiberiyo mumakani aakalembwa asyaazibwene mumakani aazyakaindi muna Roma Tacitus myaka misyoonto kuzwa ciindi Bbaibbele nolyakamana kulembwa. Kujatikizya bbala lyakuti “Bunakristo,” Tacitus wakalemba kuti: “Kristo, walo nkolyakazwa zyina eeli, wakapenzyegwa kapati a Pontiyo Pilato, umwi wabasikupenzya ciindi Tiberiyo naakali kulela.”

Heroda Antipa ulizyibidwe kuti ngonguwe wakayaka munzi wa Tiberiyo kunkomwe ya Lwizi lwa Galilaya. Alimwi wakayaka aŋanda yakwe kubusena nkukwenya ooku. Kulibonya kuti kumunzi wa Tiberiyo nkonkuko Heroda nkwaakamukosweda mutwe Johane Mubbapatizi.

Bbaibbele lyaamba zyintu zinji izyakacitika ciindi cabulelo bwa Roma. Kujatikizya ciindi Jesu naakazyalwa, Ibbaibbele lyaamba kuti: “Lino mumazuba aayo, Kaisala Agusito wakabikka mulawo mubwami bwakwe wakuti bantu boonse bakalilembye (kulilembya kwakusaanguna ooku kwakacitika ciindi Kuleniyo naakali mweendelezi wa Siliya), eelyo bantu boonse bakatalika kuunka kuyoolembwa, aumwi kumunzi wakwabo.”—Luka 2:1-3.

Tacitus alimwi asyaazibwene mumakani aakaindi mu Juda Josephus, boonse bakaamba kujatikizya Kuleniyo. Makani aatondezya kuti kulilembya ooku kwakacitwa, alilembedwe mulugwalo ndwaakalemba mweendelezi muna Roma lwalo ilwakayobolwa kuŋanda iiyobwedwa mabbuku yakucisi ca Britain. Oolu lugwalo lwaamba kuti: “Akaambo kakuti ciindi cakubala bantu mumaanda casika, cilayandika kwaambila bantu boonse ibakkala muzyooko zimbi kuti bajokele kuminzi yabo.”

Alimwi Bbaibbele lilaamba kujatikizya “nzala mpati . . . kuciindi ca (Mwami wa Roma)  Kilaudiya.” (Milimo 11:28) Syaazibwene mumakani aazyakaindi wamumwaanda wamyaka wakusaanguna Josephus, wakazuminizya kuti makani aaya ngamasimpe. Wakalemba kuti: “Nzala eeyi yakapenzya bantu banji alimwi banji bakafwa.”

Kuyungizya waawo, mulugwalo lwa Milimo 18:2, Bbaibbele lyaamba kuti “Kilaudiya wakalailila ba Juda boonse kuzwa mu Loma.” Syaazibwene mumakani aakaindi Suetonius wakazuminizya kuti makani aaya ngamasimpe mubbuku ndyaakalemba mu 121 C.E. kujatikizya buumi bwa Kilaudiya. Suetonius wakalemba kuti Kilaudiya “wakabatanda ba Juda boonse kuzwa ku Roma,” alimwi wakayungizya kuti akaambo kalunya ndobakajisi ku Banakristo, ba Juda “bakazumanana kunyonganya Banakristo.”

Ibbaibbele lyaamba kuti ciindi nokwakali nzala yaambwa aatala aawa, Heroda Agripa wakalisamika “cisani cakwe cabwami,” akutalika kukanana kubuleya. Mpoonya bantu bakabungene bakatalika koompolola kuti: “Ndijwi lyaleza, talili lyamuntu pe!” Ibbaibbele lyaamba kuti; mpoonya wakaligwa mvwunyu eelyo wakafwa. (Milimo 12:21-23) Awalo Josephus wakalemba kujatikizya cakacitika eeci, akuyungizya twaambo tumbi. Wakalemba kuti Agripa wakali kukanana kasamide “cisani cipangidwe ansiliva.” Alimwi wakaamba kuti ‘Agripa wakaciswa kapati mwida, alimwi kwalo kwakatalika munzila yaluciso kapati.’ Mpoonya nikwakainda mazuba aali osanwe wakafwa.

Businsimi Busyomeka

Ibbaibbele lilijisi businsimi bunji ibwakazuzikizyigwa mubulelo bwa Roma. Mucikozyanyo, ciindi Jesu naakanjila mu Jerusalemu katantide ambongolo, wakalilauka kujatikizya munzi ooyu akwaambilizya bana Roma mbobakali kuyoounyonyoona. Jesu wakati: “Mazuba ayookusikila basinkondonyoko nobayookuyakila lubaya lwazisamu zibosya. . . . Tabakasiyi bbwe atala abbwenyina mulinduwe, nkaambo tonookacizyiba ciindi ncowakali kulingulwa.”—Luka 19:41-44.

Nokuba boobo, basikumutobela Jesu, bakali kuyooba acoolwe cakuccija. Munzila nzi? Jesu wakabapa malailile aagaminide kakucili ciindi. Wakabacenjezya kuti: “Mwaakubona Jelusalemu kazingulukidwe ampi, amukazyibe kuti kunyonyoonwa kwakwe kwaswena aafwaafwi. Mpoonya aabo bali mu Judaya bakatalike kutijila kumalundu, aabo ibali mumunzi mwini abakazwe, abaabo bali muminzi iili anze aamunzi batakanjili mulinguwo.” (Luka 21:20, 21) Basikumutobela Jesu beelede kuti bakalibuzya kuti, ‘Ino inga twaccija buti mumunzi uuzingulukidwe abasikalumamba?’

Josephus wakalemba cakacitika. Mu 66 C.E., ciindi mweendelezi muna Roma naakabweza mutelo kuzwa muciyobwedo catempele, ba Juda ibakazanga bakajaya mpi yabana Roma, mpoonya bakalibikka kuba alwaanguluko. Mumwaka wakatobela mweendelezi muna Asuri Cestius Gallus, wakaboola ampi yabasikalumamba bali 30,000, mpoonya wakasika ku Jerusalemu ciindi nokwakali pobwe lyabukombi. Gallus wakanjila mutunzi tuli mumbali-mbali akutalika kunyonyoona bwaanda bwatempele, mobakali kukkala bazangi. Cakutayeeyela, Gallus wakapiluka ampi yakwe. Bama Juda bakakkomana mpoonya bakatalika kulwana mpi yakali kupiluka.

Banakristo basyomeka tiibakacengwa akaambo kakucinca kwazyintu ooku. Bakazyiba kuti businsimi bwa Jesu bwazuzikizyigwa, nkaambo imunzi wakalizingulukidwe ampi. Lino, akaambo kakuti mpi eeyi yakazwa mumunzi, Banakristo basyomeka bakabona kuti eeci ncoolwe cakuti baccije. Banji bakaunka ku Pella, imunzi uuli mumalundu kutala aa Jordano.

Ino ncinzi cakacitika ku Jerusalemu? Impi yabana Roma yakapiluka, iyakali kusololelwa a Vespasian amwanaakwe Tito—aciindi eeci bakaboola abasikalumamba bali 60,000. Bakanjila mumunzi nilyakalondelela Pobwe Lyakwiindilila lyamu 70 C.E., akusinkila bantu boonse bakali mumunzi kubikkilizya abaabo bakaboolede kukusekelela pobwe eeli. Impi yabana Roma yakanyonyoona cooko coonse camasamu alimwi akuyaka bwaanda bwazisamu, kweelana ambwaakasinsima Jesu. Nikwakainda myezi yosanwe, munzi wakawa.

Tito wakaamba kuti tempele litanyonyoonwi; pele sikalumamba umwi wakalyuumpa, alimwi busena bwakanyonyoonwa kapati—mbubwenya mbwaakaamba Jesu. Kweelana ambwaakaamba Josephus, bama Juda alimwi abamwi batakali ba Juda bali 1,100,000 bakafwa, ibunji bwabo  bakafwa anzala alimwi amalwazi, mpoonya bali 97,000 bakaangwa. Bamwi bakatolwa mubuzike ku Roma. Kuti mwaswaya munzi wa Roma sunu, mulakonzya kububona busena mbobakali kucitila zisobano, bwalo ibwakayakwa a Tito naakamana kusaala Judaya. Alimwi mulakonzya kubona abwaanda bwa Tito, bwalo butondezya kunyonyooka kwa Jerusalemu. Masimpe, businsimi bwamu Bbaibbele bulasyomeka kapati. Nkakaambo kaako cilayandika kapati kuti katubikkila maano kuzyintu nzyolyaamba kujatikizya zyakumbele.

Bbaibbele Lilapa Bulangizi Mbomukonzya Kusyoma

Ciindi Jesu naakali kubetekwa amweendelezi muna Roma Pontiyo Pilato, wakaamba kujatikizya Bwami, naa mfwulumende, yalo ‘itali yanyika eeyi.’ (Johane 18:36) Masimpe, Jesu wakayiisya basikumutobela kupailila mfwulumende eeyi. Wakaamba kuti: “Taateesu ooli kujulu, . . . abuboole Bwami bwako. Akucitwe kuyanda kwako ansi aano mbubonya mbuli kujulu.” (Matayo 6:9, 10) Amubone kuti Bwami bwa Leza buyoopa kuti kuyanda kwa Leza—kutali kuyanda kwabantu balisumpula—kucitwe anyika.

Jesu ulalela kali Mwami mu Bwami oobu bwakujulu. Kweelana amakanze aa Leza aakumatalikilo, uyoocinca nyika yoonse kuba paradaiso.—Luka 23:43.

Ino ndilili Bwami bwa Leza nobuyootalika kweendelezya bantu? Jesu wakapa bwiinguzi ciindi naakaambaula amwaapostolo wakwe Johane, walo wakali muntolongo ansumbu ya Patmo ciindi Mwami Domitian wa Roma, imwanookwabo Tito naakali kulela. Jesu wakaamba kuti: “Kuli bami bali ciloba: bosanwe bakawa, omwe nkwali lino, ooyo umbi tanasika pe, pele aakusika uyookkala buyo kwakaindi kaniini.”—Ciyubunuzyo 17:10.

Ciindi Johane naakali kulemba majwi aaya, “bami” bosanwe ibakawide kale mba: Egepita, Asuri, Babuloni, Mediya a Persia, alimwi a Gilisi. Omwe iwakaambwa kuti “nkwali lino,” naa kuti iwakali kulela ciindi naakali kupona Johane, ngu Roma. Aboobo, kwakaceede buyo omwe—bulelo bwamamanino bwanyika yoonse kweelana a Bbaibbele. Ino mbwami nzi oobo? Ino buyootola ciindi cilamfwu buti? Imibuzyo eeyi iyoobandikwa mucibalo citobela cazibalo eezyi.

[Cifwanikiso icili apeeji 10]

Paulo wakeenda mumugwagwa wiitwa kuti Appian Way

[Cifwanikiso icili apeeji 10]

Tiberiyo Kaisara ngumwi wabeendelezi banji bana Roma ibaambwa mu Makani Mabotu ngaakalemba Luka

[Cifwanikiso icili apeeji 11]

Bulembo butondezya zyina lya Pontiyo Pilato

[Cifwanikiso icili apeeji 12, 13]

Tito, mwana wa Vespasian mbuli mbokutondezyedwe amali aabana Roma

[Kulumba]

Musée de Normandie, Caen, France

[Cifwanikiso icili apeeji 13]

Bwaanda bwa Tito ku Roma, butondezya kunyonyooka kwa Jerusalemu mu 70 C.E.

[Nkotwakajana cifwanikiso icili apeeji 10]

Mujulu, aali zifwanikiso zyabami: Aakalembedwe makani abwaanda ku Egepita alimwi acifwanikiso ca Nero: Zyakazumizyigwa aba British Museum; Aakalembedwe makani abwaanda ku Persia: cakazumizyigwa aba Musée du Louvre, ku Paris; ansi, cifwanikiso ca Tiberiyo Kaisara: Cakazumizyigwa aba British Museum