Sena Leza Ulabikkila Maano?

MU NOVEMBER 1, 1755, ciindi camafwumofwumo kwakaba muzuzumo wanyika mudolopo lya Lisbon, mucisi ca Portugal. Mpoonya kwakaba mulilo amayuwe mapati aaitwa kuti tsunami aakanyonyoona dolopo alimwi akujaya bantu banji kapati.

Nowakainda muzuzumo wanyika iwakacitika mu 2010 mucisi ca Haiti, cibalo cimwi camumuteende uutegwa National Post, waku Canada cakaamba kuti: “Zyoonse ntenda zipati izicitika zisunka lusyomo lwabantu muli Leza. Pele mbubonya mbuli cakacitika ku Lisbon, mizuzumo yanyika iicitika mazuba aano mbuli muzuzumo wakacitika kucisi ca Haiti, isunka lusyomo lwabantu kwiinda masunko amwi.” Cibalo eeci cakamanizya akwaamba kuti: “Ambweni Leza wakaleka kucibikkila maano cisi ca Haiti.”

Mbwali “Singuzuzyoonse,” Jehova Leza ulijisi nguzu ziteeli alimwi ulakonzya kwaamana mapenzi. (Intembauzyo 91:1) Kuyungizya waawo, tulakonzya kusyoma kuti ulatubikkila maano. Nkaambo nzi?

Ncinzi Ncotuzyi Kujatikizya Leza?

Leza ulabafwida lubomba bantu bapenga. Ciindi bana Israyeli nobakali kupenzyegwa mubuzike mu Egepita, Leza wakaambila Musa kuti: “Ncobeni ndibwene mapenzi aabantu bangu bali mu-Egepita. Ndimvwide mbubalila nkaambo kabaabo bababelesya. Ndizi buusu bwabo mbobubede.” (Kulonga 3:7) Ino eeci citondezya nzi? Citondezya kuti Leza ulababikkila maano bantu bali mumapenzi. Kuyungizya waawo, nokwakainda myaanda yamyaka, musinsimi Isaya wakalemba kujatikizya bana Israyeli kuti: “Mumapenzi aabo oonse wakapenga alakwe.”—Isaya 63:9.

‘Milimo yakwe yoonse ililuleme.’ (Deuteronomo 32:4) Leza uliluleme alimwi tasalululi muzyintu zyoonse nzyacita. ‘Ulailulamika migwagwa yabasalali bakwe,’alimwi ‘ulabweedezya mapenzi kuli baabo ibapenzya’ bantu baluleme. (Tusimpi 2:8; 2 Batesalonika 1:6, 7) ‘Tasalululi bana babami, na bavubi kwiinda bacete. Boonse nzilenge zyamaanza aakwe.’ (Jobu 34:19) Leza uliizyi nzila mbotu yakumana mapenzi aabantu. Mukwiimpana, kusoleka kumana mapenzi nkobacita bantu, cili mbuli kubikka bbandeji acilonda camuntu wadubulwa ntobolo. Nokuba kuti bbandeji lilakonzya kuvwumba cilonda, pele talikonzyi kucisilika nokuba kulesya cilonda kucisa.

Leza “[ngu]siluzyalo asibuuya . . . uuzwide luse.” (Kulonga 34:6) Ibbala lyakuti “luzyalo,” mbolibelesyedwe mu Bbaibbele, lyaamba lweetelelo lupa muntu kuti agwasye mweenzinyina. Ibbala lisandulwidwe kuti “buuya” mu Chihebrayo lipandulula “muntu umwi mbwakonzya kugwasya muntu uuyandika lugwasyo.” Kweelana abbuku litegwa Theological Dictionary of the Old Testament, ibbala lyakasandululwa kuti “luse” libikkilizya “kugwasya umwi muntu uuli mumapenzi naa wacitikilwa ntenda.” Jehova  Leza talimvwi buyo kucimwa ciindi bantu nobapenga pele ulabagwasya akaambo kaluzyalo, buuya, alimwi aluse ndwajisi. Aboobo, tulakonzya kusyoma cakumaninina kuti uyakwaamana mapenzi.

Cibalo cainda catondezya twaambo totatwe tupa kuti bantu kabapenga mazuba aano, pele akati katwaambo ootu, kunyina nekaba komwe kamujatikizya Leza. Lino atubone cijatikizyidwe kutwaambo ootu.

Zyintu Zyakulisalila

Kumatalikilo Adamu wakali kweendelezyegwa a Leza. Nokuba boobo, ciindi naakapegwa coolwe cakulisalila, wakakaka kweendelezyegwa a Leza alimwi eeci cakapa kuti abone mapenzi aaboola akaambo kakulyeendelezya. Kunyina naakakubikkila maano kucenjezya kwa Jehova kulembedwe mulugwalo lwa Matalikilo 2:17 ikwakuti: “Ncobeni uyoofwa.” Kukakilwa kulibombya kubweendelezi bwa Leza bulondokede kwakaleta cibi alimwi akutalondoka. Bbaibbele lipandulula kuti: “Cibi mbocakanjila munyika kwiinda mumuntu omwe alufwu kwiinda mucibi, eelyo lufwu lwakasikila bantu boonse nkaambo boonse bakabisya.” (Baloma 5:12) Pele Leza uyoogwisya mapenzi oonse aakaletwa acibi.

Zyintu Zilicitikila

Mbubonya mbuli mbotwabona kale atala aawa, muntu wakusaanguna, Adamu, wakakaka kweendelezyegwa a Leza—bweendelezi bwakali kuyandika kutegwa bantu bazumanane kukwabililwa—nokuba kuntenda zilicitikila. Kusala kwakwe kulakonzya kweezyanisyigwa amulwazi uukaka kusilikwa kumusilisi uucibwene kabotu. Ikuti mulwazi katazyi ntenda ilangilwa kuboola yalo musilisi njazyi, mulwazi ulakonzya kupenga akaambo kakubula luzyibo kwakuliyandila. Mbubwenya buyo, buyamba bwabantu anyika, anzila zitali kabotu zibelesyegwa mukuyaka alimwi akubula luzyibo kujatikizya nguzu zyamububumbo kanji-kanji nzyezileta ntenda zilicitikila. Nokuba boobo, Leza takazumizyi kuti bukkale buli boobu kuti buzumanane kukabe kutamani.

“Mweendelezi Wanyika Eeyi”

Nkaambo nzi Leza ncaazumizya Saatani kweendelezya nyika kwaciindi cilamfwu kuzwa naakazanga? Kweelana ambolyaamba bbuku limwi, “mfwulumende mpya iili yoonse noitalika kweendelezya inga ipa mulandu kumfwulumende yakali kulela kaindi.” Ikuti Jehova naakafwambaana kumugwisya Saatani, “mweendelezi wanyika eeyi,” naakapa mulandu Leza, mweendelezi wakusaanguna kuti nguwapa kuti akakilwe kweendelezya. (Johane 12:31) Pele, kuzumizya Saatani kuti ayendelezye nyika kwaciindi cilamfwu kwatondezya kuti Saatani waalilwa kweendelezya. Nokuba boobo, mubuzyo uciyandika kwiingulwa ngwakuti, Ino mbuti mbotukonzya kuba masimpe kuti kupenga kuyoomana?

[Cifwanikiso icili apeeji 6]

Sena dokota inga wabelesya kabbandeji kasyoonto kusilika cilonda cizwa bulowa camuntu wadubulwa ntobolo?